1955 ஆம் ஆண்டு இந்து திருமணச் சட்டத்தின் (HMA) கீழ், பரஸ்பர சம்மதத்தின் மூலம் விவாகரத்து கோரும் தம்பதிகள் குறைந்தது ஒரு வருடம் தனித்தனியாக வாழ வேண்டும் என்ற நிபந்தனை அனைத்து வழக்குகளிலும் கட்டாயமில்லை என்று டெல்லி உயர் நீதிமன்றம் தெளிவுபடுத்தியுள்ளது. பொருத்தமான வழக்குகளில் இந்த நிபந்தனையை தள்ளுபடி செய்ய நீதிமன்றங்களுக்கு அதிகாரம் உள்ளது என்றும் நீதிமன்றம் கூறியுள்ளது.
பரஸ்பர ஒப்புதலின் மூலம் விவாகரத்து மனு தாக்கல் செய்வதற்கான காலக்கெடு குறித்து தெளிவான வழிகாட்டுதல் கோரிய குறிப்புக்கு பதிலளித்தே இந்த விளக்கம் வழங்கப்பட்டுள்ளது. இந்த விவகாரத்தில், “விருப்பமில்லாத தம்பதிகளை திருமணப் படுகுழிக்குள் தள்ளுவதா நீதிமன்றத்தின் பணி?” என்ற கேள்வியையும் நீதிமன்றம் எழுப்பியது.
நீதிபதிகள் நவீன் சாவ்லா, அனுப் ஜெய்ராம் பம்பானி மற்றும் ரேணு பட்நாகர் ஆகியோர் அடங்கிய மூன்று நீதிபதிகள் கொண்ட பெஞ்ச், HMA பிரிவு 13B(1)-இல் குறிப்பிடப்பட்டுள்ள “ஒரு வருடம் தனித்தனியாக வாழ்தல்” கட்டாயமானது அல்ல எனத் தீர்ப்பளித்தது. குறிப்பாக, HMA பிரிவு 14(1)-ன் கீழ், மனுதாரருக்கு “விதிவிலக்கான சிரமம்” அல்லது பிரதிவாதியின் தரப்பில் “விதிவிலக்கான ஒழுக்கக்கேடு” உள்ள வழக்குகளில், காத்திருப்பு காலங்களைத் தள்ளுபடி செய்ய நீதிமன்றங்களுக்கு அதிகாரம் உள்ளது எனக் கூறப்பட்டது.
பரஸ்பர சம்மதத்தின் மூலம் விவாகரத்து கோரும் தம்பதிகள் ஏற்கனவே ஒரு அடிப்படை காரணத்தால் பிரிவைத் தீர்மானித்திருப்பார்கள் என்றும், அத்தகைய சூழலில் அவர்களை மோசமான திருமணத்தில் சிக்க வைப்பது தேவையற்ற உளவியல் மற்றும் உணர்ச்சி பாதிப்பை ஏற்படுத்தும் என்றும் நீதிமன்றம் குறிப்பிட்டது. மேலும், விவாகரத்தை தாமதப்படுத்துவது அவர்களின் மறுமணம், சமூக ஒருங்கிணைப்பு போன்ற எதிர்கால வாய்ப்புகளையும் பாதிக்கக்கூடும் என எச்சரித்தது.
திருமணத்தின் சமூக, கலாச்சார முக்கியத்துவத்தை ஏற்றுக்கொண்டாலும், இரு தரப்பும் திருமணத்தை முடிக்க ஒருமித்த முடிவில் இருந்தால், அதை வலுக்கட்டாயமாகத் தொடரச் செய்வது அவர்களின் சுயாட்சி மற்றும் கண்ணியத்திற்கு எதிரானது என்றும் நீதிமன்றம் வலியுறுத்தியது.
இந்தத் தீர்ப்பு, இந்து திருமணச் சட்டத்தின் கீழ் உள்ள காத்திருப்பு காலங்கள் தொடர்பான குழப்பங்களுக்கு தெளிவை வழங்குவதோடு, அர்த்தமற்ற திருமணத்தை வலுக்கட்டாயமாகத் தொடர வேண்டாம் என்ற நீதித்துறை அணுகுமுறையையும் வலுப்படுத்துகிறது.
Read more: Flash : விஜய்யை பார்க்க சென்றவருக்கு திடீர் வலிப்பு..! ஈரோட்டில் முதல் அதிர்ச்சி சம்பவம்! Video!
