தமிழ்நாட்டின் தென்மேற்குப் பகுதியில் அமைந்துள்ள தென்காசி மாவட்டம், பசுமை மலைகளாலும் இயற்கை அழகாலும் சூழப்பட்ட ஆன்மிகப் பிரதேசமாக விளங்குகிறது. இங்கு அமைந்துள்ள சிவசைலம் என்ற ஊர், இயற்கையும் இறை நம்பிக்கையும் ஒன்றாக கலந்த புனிதத் தலமாக பக்தர்களால் போற்றப்படுகிறது.
இந்த ஊரில் அமைந்துள்ள சிவசைலம் கோவில்-ல், சிவசைலநாதர் மற்றும் பரம கல்யாணி அம்மன் அருள்பாலிக்கிறார்கள். தொன்மையான சைவ மரபில் முக்கிய இடம் பெற்ற இந்த ஆலயம், அதன் அமைதி, சுற்றுப்புற இயற்கை, சிற்பக் கலை மற்றும் புராணச் சிறப்புகளால் தனித்துவம் பெற்றதாகக் கருதப்படுகிறது.
பொதுவாக தமிழக கோவில்களில் இறைவன் சன்னதி கிழக்கு நோக்கி அமைந்திருக்கும் நிலையில், இந்த கோவில் அதற்கு விதிவிலக்காக மேற்கு நோக்கி அமைந்துள்ளது. இதற்குப் பின்னால் புராணக் கதை ஒன்று சொல்லப்படுகிறது. அதிர்மான முனிவர் கடனாநதி கரையில் மேற்குத் திசையை நோக்கி தியானம் செய்தபோது, அவருக்கு சிவபெருமான் அந்த திசையிலேயே தரிசனம் அளித்ததாக நம்பப்படுகிறது. அதன் அடிப்படையிலேயே இங்கு கோவில் அமைக்கப்பட்டதாக கூறப்படுகிறது.
மேலும், இந்தத் தலத்தில் நந்தி சிலை தொடர்பான ஒரு தனித்துவமான புராணக் கதை உள்ளது. சிற்பி நந்தியை வடிக்கும் போது, அது உயிருள்ளதைப் போல தோன்றியதால் ஆச்சரியமடைந்து, உலியை அதன் முதுகில் வைத்ததாக கூறப்படுகிறது. அந்த அடையாளம் இன்று வரை நந்தியின் முதுகில் தெளிவாகக் காணப்படுவது இத்தலத்தின் சிறப்பாக கருதப்படுகிறது.
இங்குள்ள சிவலிங்கம் சுயம்பு என நம்பப்படுகிறது. அதாவது மனிதனால் உருவாக்கப்படாமல் இயற்கையாக தோன்றிய லிங்கம். லிங்கத்தின் பின்புறத்தில் சடையைப் போன்ற கோடுகள் தென்படுவதால், இத்தல இறைவன் “சடையப்பர்” என்றும் அழைக்கப்படுகிறார்.
கோவிலின் கட்டிடக் கலைவும் சிறப்பாக விளங்குகிறது. ஐந்து அடுக்குகள் கொண்ட ராஜகோபுரம், நர்த்த மண்டபம், மணிமண்டபம், அர்த்த மண்டபம் ஆகியவை தமிழ்ச் சைவ கட்டிடக் கலையின் சிறந்த உதாரணங்களாகக் கருதப்படுகின்றன. 63 நாயன்மார்கள், விநாயகர், முருகன், சனீஸ்வரன், தட்சிணாமூர்த்தி உள்ளிட்ட தெய்வங்களுக்கான சன்னதிகளும் இங்கு அமைந்துள்ளன.
இத்தலத்தின் தாயார் பரம கல்யாணி அம்மன் தனி சன்னதியில் அருள்பாலிக்கிறார். இவரை வழிபடுவதால் குடும்ப அமைதி, மன நிம்மதி மற்றும் உடல் நலம் கிடைக்கும் என பக்தர்கள் நம்புகின்றனர். அதனால் தினமும் பலர் கடனாநதியில் புனித நீராடி அம்மனை வழிபடுகின்றனர்.
மாதாந்திர பிரதோஷம், அமாவாசை, பௌர்ணமி நாட்களில் சிறப்பு பூஜைகள் நடைபெறுகின்றன. குறிப்பாக பங்குனி உத்திரத் திருவிழா இங்கு மிகப் பிரசித்தி பெற்றதாகும். அந்நாளில் தேரோட்டத்துடன் முழு ஊரும் ஆன்மிக விழாவாக மாறுகிறது. மேற்கு நோக்கி வீற்றிருக்கும் சிவசைலநாதர், கருணைமிகு பார்வையுடன் பக்தர்களை அருள்புரிவதாக நம்பப்படுகிறது. இயற்கையின் அமைதி, ஆற்றின் ஓசை மற்றும் தெய்வீக அனுபவம் இணைந்த இந்த சிவசைலம் கோவில், தென்காசி மாவட்டத்தின் முக்கிய ஆன்மிக அடையாளமாக விளங்குகிறது.
