பிரபல மலையாள நடிகர் ஷைன் டாம் சாக்கோவின் தந்தை சிபி சாக்கோ, இன்று காலை பெங்களூரு அருகே நடந்த சாலை விபத்தில் காலமானார். இந்த விபத்தில் காயமடைந்த ஷைன், அவரது தாயார், சகோதரர் மற்றும் ஓட்டுநர் காயமடைந்து மருத்துவமனையில் சிகிச்சை பெற்று வருகின்றனர்.
தருமபுரிக்கு அருகிலுள்ள பாலக்கோட்டை அருகே காலை 7 மணியளவில் இந்த விபத்து நிகழ்ந்தது. ஷைன் டாமின் குடும்பத்தினர் எர்ணாகுளத்திலிருந்து பெங்களூருக்கு காரில் சென்று கொண்டிருந்தபோது. அவர்களின் வாகனம் முன்னால் இருந்த லாரியுடன் மோதியதில், 5 பேரும் காயமடைந்ததாக நேரில் பார்த்தவர்கள் தெரிவித்தனர். மருத்துவமனைக்கு கொண்டு செல்லப்பட்ட போதிலும், சிபி சாக்கோ உயிரிழந்தார்.
காயமடைந்தவர்கள் தற்போது பாலக்கோட்டையில் உள்ள அரசு மருத்துவமனையில் சிகிச்சை பெற்று வருகின்றனர். ஷைனின் சகோதரர் ஓட்டுநருடன் முன் இருக்கையில் அமர்ந்திருந்தார் என்றும், அவரது தந்தை மற்றும் தாயார் நடு இருக்கையில் இருந்ததாகவும் கூறப்படுகிறது. பின் இருக்கையில் தூங்கிக் கொண்டிருந்த ஷைன் டாம் சாக்கோவின் வலது கையில் காயம் ஏற்பட்டதாகவும் மலையாள ஊடகங்கள் செய்தி வெளியிட்டுள்ளன.
முன்னாள் உதவி இயக்குனரான ஷைன் டாம் சாக்கோ மலையாள திரையுலகின் பிரபல நடிகராகவும் வலம் வருகிறார். பிரபல இயக்குனர் கமலின் உதவி இயக்குநராக தனது திரை வாழ்க்கையைத் தொடங்கிய அவர், பின்னர் நடிகராக மாறினார். 2011 இல் கட்டமா திரைப்படத்தின் மூலம் நடிகராக அறிமுகமானார் ஷைன் டாம் சாக்கோ.
அப்போது முதல் மலையாளத்தில் பல படங்களில் துணை வேடங்களில் நடித்திருந்தாலும் 2019 ஆம் ஆண்டு வெளியான இஷ்க் திரைப்படத்தில் நெகட்டிவ் ரோலில் நடித்ததற்காக அவர் அங்கீகாரம் பெற்றார். இந்தப் படத்திற்காக, ஷைன் டாம் SIIMA 2019 இல் சிறந்த எதிர்மறை நடிகர் (மலையாளம்) விருதையும் பெற்றார். சாக்கோ ஹூ (2018), உண்டா (2019), பூமியிலே மனோகர ஸ்வகார்யம் (2020), ஆபரேஷன் ஜாவா (2021), மற்றும் வுல்ஃப் (2021) போன்ற பல படங்களில் நடித்து பிரபலமானார்.
தமிழில் நெல்சன் இயக்கத்தில் விஜய் நடிப்பில் வெளியான பீஸ்ட் படத்தின் மூலம் ஷைன் டாம் சாக்கோ அறிமுகமானார். ஜிகர்தாண்டா டபுள் எக்ஸ், குட் பேட் அக்லி ஆகிய படங்களில் அவர் நடித்திருந்தார். தெலுங்கிலும் தசரா, தேவரா உள்ளிட்ட படங்களில் அவர் நடித்திருந்தார் என்பது குறிப்பிடத்தக்கது.
Read More : இயக்குநர் பாரதிராஜா வீட்டில் அடுத்த அதிர்ச்சி.. உடன்பிறந்த சகோதரி காலமானார்..!!
