ஐ.நா. காலநிலை மாற்றம் குறித்த கட்டமைப்பு மாநாட்டின் (யு.என்.எஃப்.சி.சி.சி – UNFCCC) கட்சிகளின் 30வது மாநாடு (சி.ஓ.பி.30), ஆண்டுதோறும் நடைபெறும் இரண்டு வார காலநிலை பேச்சுவார்த்தைகள் ஆகும். இது திங்கள்கிழமை பிரேசிலின் பெலெம் நகரில் தொடங்கியது. இது உலகளாவிய காலநிலையைக் காப்பாற்றுவதுடன், ஐ.நா.வால் கட்டாயப்படுத்தப்பட்ட இந்தப் பேச்சுவார்த்தை செயல்முறையின் நம்பகத்தன்மையை மீட்டெடுப்பது பற்றியும் பேசுகிறது.
இந்தநிலையில், நேற்றைய மாநாட்டில், 50,000 க்கும் மேற்பட்ட தூதரக அதிகாரிகள், பத்திரிகையாளர்கள் மற்றும் ஆர்வலர்கள் கூடியிருந்தனர். இந்த மாநாடு நடைபெற்ற மண்டபத்திற்குள், திடீரென புகை மூட்டம் ஏற்பட்டது. இதனை தொடர்ந்து, தீபிடித்தது. மாநாட்டு கட்டிடத்தின் உள்ளேயும் வெளியேயும் புகை கிளம்பியதால் தீயணைப்பு வீரர்கள் சம்பவ இடத்திற்கு வந்தனர். இதையடுத்து, பிரதிநிதிகள் வெளியேற்றப்பட்டனர்.
தீ விபத்து நடந்த இடத்தில், மத்திய சுற்றுச்சூழல் அமைச்சர் பூபேந்தர் யாதவ் உட்பட இந்தியக் குழுவைச் சேர்ந்த சுமார் 20 பேர் உடனிருந்தனர். அவர்கள் பாதுகாப்பான பகுதிக்கு சென்று, எந்தத் தீங்கும் ஏற்படாதவாறு பாதுகாப்பாக இருப்பதாக செய்திகள் வெளியாகியுள்ளன. இருப்பினும், தீ கட்டுக்குள் கொண்டுவரப்பட்டுள்ளதாகவும், யாருக்கும் காயம் ஏற்படவில்லை என்றும் பிரேசில் சுற்றுலா அமைச்சர் செல்சோ சபினோ தெரிவித்தார். “
COP 30 உச்சிமாநாட்டில், கிரகத்தை ஆபத்தான முறையில் வெப்பமாக்கும் பசுமை இல்ல வாயு வெளியேற்றத்தைக் குறைப்பதற்கான வழிகள் குறித்து விவாதிக்கவும் உடன்படவும் கிட்டத்தட்ட 200 நாடுகளைச் சேர்ந்த ஆயிரக்கணக்கான மக்கள் பெலெமில் வந்துள்ளனர்.
கடந்த வாரம், கூட்ட அரங்கில் பெய்த பலத்த மழையால், பிரதிநிதிகள் மீது மழைநீர் சொட்டத் தொடங்கியதால், உச்சிமாநாடு நடைபெறும் இடம் விமர்சனத்திற்கு உள்ளானது. உணவுப் பற்றாக்குறை குறித்தும் புகார்கள் வந்தன, மேலும் அதிக வெப்பம் மற்றும் ஈரப்பதம் காரணமாக ஏர் கண்டிஷனர்களால் மக்கள் தொடர்ந்து சிரமப்பட்டனர்.
