ராஞ்சியில் உள்ள மதுக்கடைக்குள் திடீரென புகுந்த குரங்கு ஒன்று, மதுபாட்டிலை எடுத்து குடித்துவிட்டு அங்கே இருந்த மது பெட்டிகள் மீது மயங்கி விழுந்த சம்பவம் அப்பகுதியில் பரபரப்பை ஏற்படுத்தியுள்ளது.
ஜார்க்கண்ட் மாநிலம் ராஞ்சியின் ஒர்மாஞ்சி சவுக் பகுதியில் மதுக்கடை ஒன்று செயல்பட்டு வருகிறது. வழக்கம்போல் ஊழியர்கள் பணியில் ஈடுபட்டிருந்தபோது, திடீரென ஒரு குரங்கு மதுக்கடைக்குள் புகுந்தது. அப்போது அங்கிருந்த ஊழியர்கள் முதலில் கடைக்குள் வந்த குரங்கை வெளியேற்ற முயன்றனர். அதனை திசைதிருப்புவதற்காக பிஸ்கெட்டுகளை கொடுத்ததாக கூறப்படுகிறது. ஆனால், அங்கிருந்து செல்லாமல் கடைக்குள் சுற்றித்திரிந்த குரங்கு மதுபாட்டில் ஒன்றை எடுத்து பின்னர் அந்த பாட்டிலை உடைத்து அதில் இருந்த மதுவை சுமார் பாதி பாட்டில் அளவிற்கு குடித்ததாக கூறப்படுகிறது. இதனை பார்த்த கடை ஊழியர்கள் மற்றும் அங்கிருந்தவர்கள் அதிர்ச்சியடைந்தனர்.
மது குடித்த சிறிது நேரத்திலேயே குரங்கின் நடவடிக்கையில் மாற்றம் ஏற்பட்டு மது பெட்டிகள் வைக்கப்பட்டிருந்த இடத்திற்குச் சென்று, ஒரு அட்டைப்பெட்டிமீது படுத்து மயக்க நிலையில் தூங்கியுள்ளது. நீண்ட நேரம் கடைக்குள் இருந்து அது எழுந்திருக்காமல் இருந்ததால், சம்பவத்தை பார்த்தவர்கள் ஆச்சரியமடைந்தனர்.மேலும் இந்த காட்சியை அங்கிருந்தவர்கள் தங்களது செல்போன்களில் வீடியோவாக பதிவு செய்தனர். தற்போது அந்த வீடியோ சமூக வலைதளங்களில் கவனம் பெற்றுள்ளது.
Also Read:கர்ப்பிணி பெண்களுக்கான ரயில் பயணத்தில் இப்படி ஒரு வசதியா? பலருக்கும் தெரியாத முக்கிய தகவல்!
