அமெரிக்க ஓபன் டென்னிஸ் போட்டியில் ஸ்பெயின் வீரர் கார்லஸ் அல்காரஸ் சாம்பியன் பட்டம் வென்று சாதனை படைத்துள்ளார்.
அமெரிக்க ஓபன் டென்னிஸ் தொடரின் ஆடவர் ஒற்றையர் பிரிவு இறுதி ஆட்டத்தில் தொடரின் 3-ஆம் நிலை வீரரான கார்லஸ் அல்காரஸ் கார்பியா, 5ஆம் நிலை வீரரான நார்வேயின் கேஸ்பர் ரூட் உடன் பலப்பரீட்சை நடத்தினார். கிராண்ட் ஸ்லாம் போட்டியில் முதல் முறையாக பட்டம் வெல்லும் முனைப்பில் இருவரும் களமிறங்கினர். விறுவிறுப்பு நிறைந்த போட்டியில் முதல் செட்டை 6-4 என அல்காரஸ் கார்பியாவும், இரண்டாவது செட்டை 6-2 என ரூடும் கைப்பற்றினர். மூன்றாவது மற்றும் நான்காவது செட்களை 7-6, 6- 3 என 19 வயதான அல்காரஸ் கார்பியா கைப்பற்றினார். இதன் மூலம் கிராண்ட்ஸ்லாம் டென்னிஸ் போட்டியில் முதல் முறையாக அவர் பட்டம் வென்று அசத்தினார்.
மேலும், டென்னிஸ் வீரர்களுக்கான உலகத் தரவரிசையிலும் முதலிடத்திற்கு அவர் முன்னேறியுள்ளார். இதன் மூலம் மிக இள வயதில் நம்பர் 1 வீரர் என்ற இடத்தை எட்டிய சாதனையும் அல்காரஸ் வசம் வந்து சேர்ந்துள்ளது. லீட்டன் ஹெவிட் என்ற வீரர் தனக்கு 20 வயது 9 மாதங்கள் இருக்கும்போது உலகின் நம்பர் 1 வீரராக திகழ்ந்ததே முந்தைய சாதனையாக இருந்தது.
