நடிகர் விஜய் நடித்துள்ள ‘வாரிசு’ திரைப்படம் பொங்கல் பண்டிகையை முன்னிட்டு வரும் ஜனவரி 11ஆம் தேதி திரையரங்குகளில் வெளியாகவுள்ளது. வம்சி இயக்கத்தில் உருவாகியுள்ள இப்படத்தை தில் ராஜு தயாரித்துள்ளார். இப்படத்தின் அனைத்து பாடல்களும், ட்ரெய்லரும் வெளியாகி ரசிகர்களுக்கு மத்தியில் பலத்த வரவேற்பை பெற்று படத்தின் மீதுள்ள எதிர்பார்ப்பை அதிகமாக்கியுள்ள நிலையில், படத்தின் டிக்கெட்டுகளுக்கான முன்பதிவுகள் தொடங்கி விறுவிறுப்பாக நடைபெற்று வருகிறது.
தமிழில் வெளியாவதை போலவே தெலுங்கிலும் ‘வாரசுடு’ என்ற பெயரில் இப்படம் வெளியாகவுள்ளது. முன்னதாக படம் தெலுங்கிலும் 11ஆம் தேதி வெளியாகும் என கூறப்பட்டது. ஆனால், தற்போது சில காரணங்களால், ‘வாரசுடு’ திரைப்படம் 3 நாட்கள் தள்ளி அதாவது ஜனவரி 14ஆம் தேதி வெளியாகும் என படத்தின் தயாரிப்பு நிறுவனம் ஸ்ரீ வெங்கடேஸ்வரா கிரியேஷன்ஸ் அறிவித்துள்ளது. இதனால், தெலுங்கு விஜய் ரசிகர்கள் சோகத்தில் உள்ளனர்.
