மத்திய கிழக்கில் மோதலை முடிவுக்குக் கொண்டுவருவதாகவும், அதன் தலைமையும் இராணுவமும் முற்றிலுமாக அழிக்கப்பட்டுவிட்டதாகவும் டிரம்ப் கூறிய கருத்துகளை ஈரான் மீண்டும் கடுமையாகச் சாடியது. அமெரிக்கா நிரந்தர அவமானத்தை சந்திக்கும் வரை போர் தொடரும் என்று ஈரான் தெரிவித்துள்ளது..
ஈரானின் கடற்படை மற்றும் விமானப்படை கணிசமாக பலவீனமடைந்துள்ளதாகவும், அதன் தலைமை அமைப்பு பெரும் பின்னடைவுகளைச் சந்தித்துள்ளதாகவும் டிரம்ப் நாட்டு மக்களுக்கு ஆற்றிய உரையில் கூறியயதை தொடர்ந்து ஈரானின் இந்த எதிர்வினை வந்தது.
மத்திய தலைமையகத்தின் செய்தித் தொடர்பாளர், ஈரானின் இராணுவ உள்கட்டமைப்புக்கு ஏற்பட்ட சேதம் குறித்த அமெரிக்காவின் கூற்றுகளை நிராகரித்தார். ஈரானின் திறன்கள் குறித்த அமெரிக்க உளவுத்துறை இன்னும் முழுமையடையவில்லை என்றும் அவர் தெரிவித்தார்..
ஈரானின் திறன்களை குறைத்து மதிப்பிடும் அமெரிக்கா
டிரம்பின் கூற்றுகளை நிராகரித்த செய்தித் தொடர்பாளர், ஈரானின் பரந்த மூலோபாயத் திறன்கள் குறித்து அமெரிக்காவுக்கு புரிதல் இல்லை என்றும், மோதலின் போது ஏவுகணைகள் மற்றும் ஆளில்லா விமானங்களை நிலைநிறுத்தும் தெஹ்ரானின் திறன் கணிசமாகக் குறைக்கப்பட்டுள்ளது என்பதையும் மறுத்தார்.
“எங்கள் இராணுவ சக்தி மற்றும் உபகரணங்கள் குறித்த உங்கள் உளவுத் தகவல் முழுமையற்றது. எங்கள் பரந்த மூலோபாயத் திறன்களைப் பற்றி உங்களுக்கு எதுவும் தெரியாது. எங்கள் மூலோபாய ஏவுகணை உற்பத்தித் தளங்கள், நீண்ட தூரத் தாக்குதல் மற்றும் துல்லியமான ஆளில்லா விமானங்கள், நவீன வான் பாதுகாப்பு அமைப்புகள், மின்னணுப் போர் அல்லது சிறப்பு உபகரணங்களை நீங்கள் அழித்துவிட்டதாக எண்ண வேண்டாம்,” என்று அந்த செய்தித் தொடர்பாளர் கூறினார்.
“இத்தகைய அனுமானங்கள் நீங்கள் நுழைந்துள்ள சகதியை மேலும் ஆழமாக்கும். நீங்கள் தாக்கியதாக நம்பும் தளங்கள் முக்கியமற்றவை; எங்கள் மூலோபாய இராணுவ உற்பத்தி உங்களுக்குத் தெரியாத மற்றும் உங்கள் கைக்கு எட்டாத இடங்களில் இருந்து செயல்படுகிறது.” “எங்கள் ஏவுகணைகள், ஆளில்லா விமானங்கள் மற்றும் மூலோபாய அமைப்புகளை எண்ண முயற்சிக்காதீர்கள், நீங்கள் தவறாகக் கணக்கிடுவீர்கள், எதையும் அடைய மாட்டீர்கள்,” என்று அந்தப் பேச்சாளர் தெரிவித்துள்ளார்..
ஈரானின் மிக உயர்ந்த செயல்பாட்டுக் கட்டளைப் பிரிவான கதம் அல்-அன்பியா மத்திய தலைமையகம், தேசிய இராணுவம் மற்றும் இஸ்லாமியப் புரட்சிகரப் பாதுகாப்புப் படைக்கு இடையேயான கூட்டு நடவடிக்கைகளை ஒருங்கிணைக்கிறது.
இந்த மோதலை அமெரிக்காதான் தொடங்கியது என்றும், தொடர்ச்சியான பதிலடி கொடுக்கப்படும் என்றும் அந்தப் பேச்சாளர் குற்றம் சாட்டினார்.
“எங்கள் கண்ணியமிக்க மற்றும் அன்புக்குரிய முஸ்லிம் தேசத்திற்கு எதிராக நீங்கள் தொடுத்த ஆக்கிரமிப்புக்கு நீங்கள் பதிலளிக்க வேண்டும். நீங்கள் நீடித்த அவமானம், வருத்தம் மற்றும் சரணடைதலை எதிர்கொள்ளும் வரை இந்தப் போர் தொடரும்.” “ஏற்கனவே கொடுக்கப்பட்ட கடுமையான அடிகளின் தொடர்ச்சியாக, மேலும் நசுக்கும் மற்றும் பேரழிவை ஏற்படுத்தும் தாக்குதல்களை எதிர்பார்க்கலாம்,” என்று அவர் கூறியதாக பிரஸ் டிவி மீண்டும் மேற்கோள் காட்டியுள்ளது.
ஈரான் மீது வெற்றி பெற்றதாக டிரம்ப்
பிப்ரவரி மாத இறுதியில் போர் மூண்ட பிறகு டொனால்ட் டிரம்ப் ஆற்றிய உரையைத் தொடர்ந்து இந்தக் கருத்துக்கள் வெளிவந்தன. அந்த உரையில், ஈரானுக்கு “முடிவான” அடியைக் கொடுத்ததற்காக அமெரிக்க இராணுவத்தைப் பாராட்டிய அவர், இந்தப் போர் நடவடிக்கையின் முக்கிய நோக்கங்கள் நிறைவேறும் தருவாயில் இருப்பதாகவும் குறிப்பிட்டார்.
ஈரானின் கடற்படை மற்றும் விமானப்படைத் திறன்கள் திட்டமிட்டு சிதைக்கப்பட்டுவிட்டதாகவும், அதன் பரந்த இராணுவ உள்கட்டமைப்பு கடுமையாக பலவீனப்படுத்தப்பட்டுவிட்டதாகவும் டிரம்ப் வலியுறுத்தினார். “ஈரானின் கடற்படை அழிந்துவிட்டது, அதன் விமானப்படை சிதைந்துவிட்டது, அதன் தலைவர்கள், அவர்களில் பெரும்பாலோர் பயங்கரவாதிகள், இப்போது இறந்துவிட்டனர்,” என்று அவர் அறிவித்தார்.
