அமெரிக்காவின் அரிசோனா மாநிலத்தில் “Nothing” எனும் பெயரை உடைய நகரம் உள்ளது. தமிழில் சொன்னால் அதற்கு அர்த்தமே “எதுவுமில்லை” என்பதாகும். பெயரைப் போலவே, அந்த நகரம் வெறுமையாகவே உள்ளது. சாலையோரத்தில் சில சிதைந்த கட்டிடங்கள், அடையாள பலகை, சுற்றிலும் பரந்த பாலைவன காட்சி மட்டுமே காணக்கிடைக்கின்றன.
1977 ஆம் ஆண்டு ரிச்சர்ட் பிங்கம் என்பவரால் இந்நகரம் உருவாக்கப்பட்டதாகக் கூறப்படுகிறது. ஒருகாலத்தில் எரிபொருள் நிலையம், சிறிய கடை போன்ற சில வசதிகள் இருந்தாலும், அவை காலப்போக்கில் மூடப்பட்டு தற்போது சின்னஞ்சிறு சிதைவுகளாகவே மீதமுள்ளது. மக்கள் வசிப்பதற்கான வீடுகள், வாழ்க்கையின் இயல்பான இயக்கங்கள் எதுவும் இல்லாததால், “Nothing” உண்மையில் “எதுவுமில்லை” என்ற பெயருக்கு ஏற்ப வாழ்கிறது.
இந்நகரம், பெயர் மட்டுமல்ல; வாழ்க்கையின் ஓர் உண்மையையும் சுட்டிக்காட்டுகிறது. மனிதர் உருவாக்கிய நகரங்கள், தொழில்கள், வசதிகள் அனைத்தும் ஒருநாள் மறைந்து போகும். மனித வாழ்வின் வீண் பெருமிதங்கள், காலத்தின் ஓட்டத்தில் வெறுமையாய் மாறும் என்பதை “Nothing” நகரம் நம்மை நினைவூட்டுகிறது.
சுற்றுலா பயணிகள் இன்றும் அந்த இடத்தை பார்வையிடச் செல்கின்றனர். வெறிச்சோடிய அந்த நகரத்தில் நின்று படம் எடுப்பதும், சமூக வலைதளங்களில் பகிர்வதும் ஒரு அனுபவமாக மாறியுள்ளது. “Nothing” என்ற நகரம், மனித நாகரிகத்தின் நிலையாமையை வெளிப்படுத்தும் ஓர் உயிர்த்த சின்னமாகவே திகழ்கிறது. எதுவும் நிலைத்து நிற்பதில்லை; வாழ்வின் அடையாளங்கள் ஒருநாள் வெறும் வெறுமையாய் போகும் என்பதைப் புரியவைக்கும் அதிசயமான நகரமிது.
Read more: லுலு மால் vs டிமார்ட்: மலிவான விலை முதல் ஆஃபர் வரை.. பொருட்களை வாங்க எது பெஸ்ட்..?
