மேற்காசிய போர்.. அனைத்து மாநில முதலமைச்சர்களுடன் பிரதமர் மோடி இன்று முக்கிய ஆலோசனை..!

மேற்காசிய போர் தீவிரமடைந்து வருகிறது.. இந்த போர் காரணமாக எரிபொருள் விநியோகம் உலகளவில் பாதிக்கப்பட்டுள்ளது.. இந்த நிலையில் பிரதமர் மோடி இந்த போர் குறித்து அனைத்து மாநில முதலமைச்சர்களுடன் காணொளி வாயிலாக ஆலோசனை நடத்த உள்ளார். இருப்பினும், தேர்தலை எதிர்நோக்கியுள்ள மாநிலங்களின் தலைவர்கள் இந்த கலந்துரையாடலில் பங்கேற்க வாய்ப்பில்லை.

இந்தக் கலந்துரையாடல், ஒருங்கிணைந்த நடவடிக்கை மற்றும் ‘டீம் இந்தியா’ என்ற உணர்வில் ஒருமித்த அணுகுமுறையை வளர்ப்பதில் கவனம் செலுத்தும் என எதிர்பார்க்கப்படுகிறது.

மேற்காசிய நெருக்கடி குறித்த இந்தியாவின் நிலைப்பாடு

தொடர்ந்து நடைபெற்று வரும் மேற்காசிய மோதல் குறித்து பிரதமர் மோடி சமீபத்தில் நாடாளுமன்றத்தில் உரையாற்றினார்.. அப்போது, இந்தப் போரை ஒரு கடுமையான உலகளாவிய எரிசக்தி நெருக்கடிக்கான தூண்டுதலாக விவரித்தார். மேலும், இந்த நிலைமை தொடர்ந்தால், அதன் விளைவுகள் நீண்ட காலத்திற்கு நீடிக்கக்கூடும் என்றும், தவிர்க்க முடியாத பின்விளைவுகளை ஏற்படுத்தும் என்றும் குறிப்பிட்டார்.

மேலும் பொதுமக்கள் அனைத்து இடையூறுகளுக்கும் தயாராக இருக்குமாறு மோடி வலியுறுத்தினார். அதே நேரத்தில், இந்தியா மீதான தாக்கத்தைக் குறைக்க அரசாங்கம் தீவிரமாகச் செயல்பட்டு வருவதாகவும் அவர் உறுதியளித்தார்.

திட்டமிட்ட முன்னெச்சரிக்கை மற்றும் தூதரக அணுகுமுறை ஆகியவற்றுடன் இந்தியா பணியாற்றி வருகிறது.. கோவிட் காலத்தில் பயன்படுத்திய முறைபோல், ஏழு அதிகாரமளிக்கப்பட்ட குழுக்களை மத்திய அரசு அமைத்துள்ளது. இந்த குழுக்கள் எரிபொருள், விநியோகச் சங்கிலிகள், உரங்கள், பணவீக்கம் போன்ற முக்கிய துறைகளை மேலாண்மை செய்யும்.

இதனிடையே, இந்தியா தனது எரிசக்தி ஆதாரங்களை பல்வேறு நாடுகளுக்கு விரிவுபடுத்தி வருகிறது. அதாவது, கச்சா எண்ணெய் மற்றும் எரிவாயு வாங்க புதிய சந்தைகளைத் தேடி பயன்படுத்துகிறது. இதன் மூலம், அத்தியாவசிய பொருட்களின் தடையில்லா விநியோகத்தை உறுதி செய்யும் முயற்சியும் மேற்கொள்ளப்படுகிறது.

இந்த பிரச்சனையை தீர்க்க இந்தியா தூதரக பேச்சுவார்த்தை மற்றும் பதற்றத்தை குறைக்கும் முயற்சிகளையும் ஊக்குவித்துள்ளது. பிரதமர் மோடி “டீம் இந்தியா” என்ற ஒருங்கிணைந்த அணுகுமுறையை வலியுறுத்தியுள்ளார். அதாவது, மாநிலங்களும் மத்திய அரசும் சேர்ந்து செயல்பட்டு, விநியோகச் சங்கிலிகளை சரியாக நிர்வகிக்கவும், இந்த நெருக்கடியின் தாக்கத்திலிருந்து பலவீனமான மக்களை பாதுகாக்கவும் வேண்டும் என்று கேட்டுக் கொண்டுள்ளார்.

மேலும், விவசாயிகளை பாதுகாப்பதும், ஏழை மக்கள் மற்றும் குடிபெயர்ந்த தொழிலாளர்களுக்கு அத்தியாவசிய பொருட்கள் எளிதாக கிடைப்பதை உறுதி செய்வதும் மிகவும் அவசியம் என்று அவர் கூறியுள்ளார்.

Read More : மிகவும் தாமதமாவதற்கு முன்பே இதை சீரியஸா எடுத்துக்கோங்க.. ஈரானுக்கு டிரம்ப் மீண்டும் கடும் எச்சரிக்கை..!