தருமபுரி மாவட்டம் அரூர் அருகே செல்போனில் பெண் ஒருவருடன் பேசியதை கண்டித்த மனைவியின் மீது, தின்னர் ஊற்றித் தீ வைத்துக் கொலை செய்ய முயன்ற கணவரால் பரபரப்பு ஏற்பட்டுள்ளது.
அரூர் அடுத்த சங்கிலிவாடி பகுதியைச் சேர்ந்தவர் தனகோட்டி (51). கூலித் தொழிலாளியான இவருக்கு தீத்தி (48) என்ற மனைவியும், ஒரு மகன் மற்றும் ஒரு மகளும் உள்ளனர். தனகோட்டி தனது செல்போன் மூலம் தொடர்ந்து ஒரு பெண்ணிடம் மணிக்கணக்கில் பேசி வந்ததாக கூறப்படுகிறது. தனது கணவருக்கு அந்தப் பெண்ணுடன் கள்ளத்தொடர்பு இருப்பதாக சந்தேகித்த தீத்தி, அவரை கண்டித்துள்ளார். இதனால், கணவன்-மனைவி இடையே தினசரி வாக்குவாதமும் குடும்பத் தகராறும் ஏற்பட்டு வந்துள்ளது.
வழக்கம்போல இவர்களுக்குள் மீண்டும் கடுமையான தகராறு மூண்டது. வாக்குவாதம் முற்றியதில் ஆத்திரத்தின் உச்சிக்குச் சென்ற தனகோட்டி, வீட்டில் இருந்த தின்னரை எடுத்துத் தீத்தியின் மீது ஊற்றித் தீ வைத்துள்ளார். இதில் உடல் முழுவதும் தீப்பிடித்து எரிந்ததில் அலறிய தீத்தியின் சத்தம் கேட்டு ஓடிவந்த அக்கம் பக்கத்தினர், தீயை அணைத்து அவரை மீட்டு அரூர் அரசு மருத்துவமனையில் சேர்த்தனர். மேல் சிகிச்சைக்காக தருமபுரி அரசு மருத்துவக் கல்லூரி மருத்துவமனைக்கு மாற்றப்பட்டார்.
மருத்துவமனையில் உயிருக்குப் போராடி வரும் தீத்தி, தனது கணவர் தனகோட்டிதான் தன் மீது தின்னர் ஊற்றித் தீ வைத்தார் என வாக்குமூலம் அளித்துள்ளார். இதையடுத்து கொலை முயற்சி வழக்குப் பதிவு செய்த அரூர் போலீசார், தப்பியோட முயன்ற தனகோட்டியை கைது செய்து தீவிர விசாரணை மேற்கொண்டு வருகின்றனர்.
