சாணக்கியர் சிறந்த சிந்தனையாளர், பொருளாதார நிபுணர் மற்றும் அரசியல் ஆலோசகராக அறியப்படுகிறார். அவர் எழுதியதாகக் கூறப்படும் ‘சாணக்கிய நீதி’ நூலில், ஒருவர் வாழ்க்கையில் எவ்வாறு நடந்துகொள்ள வேண்டும் என்பது குறித்து பல்வேறு கருத்துகள் இடம்பெற்றுள்ளன. சமூகத்தில் சிலருக்கு அதிக மரியாதையும் மதிப்பும் கிடைக்கிறது. அவர்களுக்கு தேவையான நேரங்களில் உதவுவதற்கும் பலர் முன்வருகிறார்கள். அதே நேரத்தில், சிலருக்கு சமூகத்தில் உரிய மதிப்போ மரியாதையோ கிடைப்பதில்லை. அவர்களுக்கு உதவவும் பலர் தயங்குகிறார்கள். ஒருவரின் இந்த நிலைக்கு அவரது குணநலன்களும், நடத்தையும் முக்கிய காரணமாக இருக்கலாம் என சாணக்கியர் கூறுகிறார்.
எனவே, வாழ்க்கையில் நல்ல பண்புகளை வளர்த்துக்கொள்வது அவசியம் என அவர் வலியுறுத்துகிறார். முதலில், ஒருவர் தனது சுயமரியாதையை எப்போதும் பாதுகாத்துக்கொள்ள வேண்டும். ஒருவர் தன்னைத் தானே மதிக்காமல் இருந்தால், மற்றவர்களிடமிருந்து மரியாதையை எதிர்பார்க்க முடியாது. கண்ணியத்துடனும் மதிப்புடனும் வாழ்க்கையை நடத்த விரும்புபவர்கள் தங்களின் சுயமரியாதையை ஒருபோதும் விட்டுக்கொடுக்கக் கூடாது என்பது சாணக்கியரின் கருத்தாகும்.
அதேபோல், ஒருவர் பேசும் வார்த்தைகளிலும் கவனமாக இருக்க வேண்டும். மற்றவர்களிடம் கொடுத்த வாக்குறுதியை எக்காரணம் கொண்டும் மீறாமல் இருப்பது முக்கியம். ஒருவருக்கு அளித்த வாக்கை காப்பாற்றும்போது, அவர்களிடம் நம்பிக்கையும் மரியாதையும் அதிகரிக்கும். சொன்ன வார்த்தையை நிறைவேற்றும் பழக்கம் ஒருவரின் நற்பெயரையும் உயர்த்தும்.
நேரத்துக்கும் ஒருவர் அதிக முக்கியத்துவம் கொடுக்க வேண்டும். குறிப்பிட்ட நேரத்தில் ஒரு விஷயத்தை செய்து முடிப்பது அல்லது ஒருவருக்கு கொடுத்த நேரத்தை மதிப்பது நல்ல பண்பாக கருதப்படுகிறது. சொன்ன வார்த்தையையும், கொடுத்த நேரத்தையும் மதித்து நடப்பவர்களுக்கு சமூகத்தில் நம்பிக்கையும் மரியாதையும் அதிகமாக இருக்கும் என சாணக்கியர் குறிப்பிட்டுள்ளார்.
எனவே, வாழ்க்கையில் மற்றவர்களின் மதிப்பையும் மரியாதையையும் பெற விரும்புபவர்கள் சுயமரியாதை, வாக்கை காப்பாற்றுதல், நேரத்தை மதித்தல் போன்ற நல்ல பண்புகளை கடைப்பிடிப்பது அவசியம் என சாணக்கிய நீதியின் கருத்துகள் எடுத்துரைக்கின்றன.
Also Read: அடிக்கடி மாத்திரை போடும் பழக்கம் இருக்கா..? சீக்கிரமே உங்களுக்கு இந்த பிரச்சனைகள் வரும்..!!
