ஆப்பிள் நிறுவனத்தின் தலைமை செயல் அதிகாரியாகப் (CEO) கடந்த 2011-ஆம் ஆண்டு முதல் பணியாற்றி வந்த டிம் குக் (Tim Cook), ஆகஸ்ட் 31-உடன் அப்பதவியிலிருந்து அதிகாரப்பூர்வமாக விலகியுள்ளார். இன்று (செப்டம்பர் 1, 2026) முதல் ஜான் டெர்னஸ் (John Ternus) ஆப்பிள் நிறுவனத்தின் புதிய CEO-வாகப் பொறுப்பேற்கிறார்.
தனது கடைசி நாளில் ‘X’ தளத்தில் பதிவிட்ட டிம் குக், “ஆப்பிள் குடும்பத்திற்கு எனது மனமார்ந்த அன்புகள். நாளை எனது பதவி மாறலாம், ஆனால் ஆப்பிள் மீதான என் அன்பு மாறாது. என் நன்றிகள் என்றென்றும் தொடரும்,” எனக் குறிப்பிட்டுள்ளார். CEO பதவியிலிருந்து விலகினாலும், டிம் குக் ஆப்பிள் நிறுவனத்தின் ‘நிர்வாகத் தலைவராக’ தொடர்ந்து செயல்படுவார்.
15 ஆண்டுகால சாதனை பயணம்:
2011-இல் ஸ்டீவ் ஜோப்ஸுக்குப் பிறகு பொறுப்பேற்ற டிம் குக், ஆப்பிள் நிறுவனத்தைச் சிகரத்திற்கு கொண்டு சென்றுள்ளார். ஆப்பிளின் சந்தை மதிப்பு $350 பில்லியனில் இருந்து சுமார் $4 டிரில்லியன் ஆக உயர்ந்துள்ளது. நிறுவனத்தின் பங்குகள் 2,359% வரை உயர்ந்துள்ளது. ஆப்பிளின் வருடாந்திர வருவாய் $108 பில்லியனில் இருந்து $400 பில்லியனுக்கும் அதிகமாக அதிகரித்துள்ளது.
ஐபோன் விற்பனை மட்டுமின்றி App Store, Apple Music, Apple Pay போன்ற ‘சர்வீசஸ்’ பிரிவை உருவாக்கி, ஆப்பிள் நிறுவனத்தைப் பிரம்மாண்ட வளர்ச்சிப் பாதையில் செலுத்தியது டிம் குக்கின் மிகப்பெரிய சாதனையாகக் கருதப்படுகிறது.
