உலகளாவிய வனவிலங்கு மற்றும் காட்டு விலங்குகளின் எண்ணிக்கை 1970ஆம் ஆண்டு முதல் சராசரியாக 73 சதவீதம் வரை வீழ்ச்சியடைந்துள்ளதாக உலகளாவிய இயற்கை நிதியம் (WWF) தனது ‘லிவிங் பிளானட் ரிப்போர்ட் 2026’ (Living Planet Report 2026) அறிக்கையில் தெரிவித்துள்ளது. இருப்பினும், உலக நாடுகள் விரைந்து நடவடிக்கை எடுத்தால் இயற்கையை மீட்டெடுக்க முடியும் என்றும் அந்த அறிக்கையில் கூறப்பட்டுள்ளது.
லண்டன் விலங்கியல் சங்கம் (ZSL) தொகுத்த ‘லிவிங் பிளானட் இன்டெக்ஸ்’ தரவுகளின் அடிப்படையில் இந்த அறிக்கை தயாரிக்கப்பட்டுள்ளது. 1970 முதல் 2022 வரை 5,790 முதுகெலும்பு இனங்களைச் சேர்ந்த 35,803 விலங்கினக் குழுக்கள் இதில் கண்காணிக்கப்பட்டுள்ளன. இது விலங்குகளின் மொத்த எண்ணிக்கைக் குறைவு அல்ல, மாறாக விலங்கினக் குழுக்களின் சராசரி அளவுக் குறைவைக் குறிப்பதாகும். வேளாண் விரிவாக்கம் காரணமாக ஏற்படும் வாழிட அழிவு, அதிகப்படியான சுரண்டல் மற்றும் பருவநிலை மாற்றம் ஆகியவை இதற்கு முக்கியக் காரணங்களாகக் கூறப்பட்டுள்ளன.
எங்கு பாதிப்பு அதிகம்?
லத்தீன் அமெரிக்கா மற்றும் கரீபியன் பகுதிகளில் மிக அதிகபட்சமாக 95% வீழ்ச்சி பதிவாகியுள்ளது. ஆப்பிரிக்காவில் 80% மற்றும் ஆசியா-பசிபிக் பகுதியில் 49% சரிவு ஏற்பட்டுள்ளது. நிலப்பரப்பில் 69% மற்றும் கடலில் 59% வீழ்ச்சி ஏற்பட்டிருந்தாலும், நன்னீர் வாழிடங்களில் வாழும் உயிரினங்கள் 85% வரை கடுமையாகப் பாதிக்கப்பட்டு மோசமான நிலையைச் சந்தித்துள்ளன.
உலகப் பொருளாதாரத்தில் பாதியளவு இயற்கையைச் சார்ந்துள்ளதால், இது சுற்றுச்சூழல் சார்ந்த பிரச்சனை மட்டுமல்ல, பொருளாதார நெருக்கடியும் கூட என்று WWF எச்சரித்துள்ளது. பயிர்கள் கருகியமை மற்றும் காட்டுத்தீ போன்றவற்றுக்கு இங்கிலாந்து மற்றும் ஐரோப்பாவில் நிகழ்ந்த தீவிர வானிலை மாற்றங்களே சாட்சியாகும் என்று WWF-ன் பிரிட்டன் தலைமை நிர்வாகி தான்யா ஸ்டீல் (Tanya Steele) தெரிவித்துள்ளார். உணவுப் பாதுகாப்பு, நீர் வழங்கல் மற்றும் பொருளாதாரத்திற்கு இது பெரும் அச்சுறுத்தலாக மாறியுள்ளதாக அவர் கவலை தெரிவித்தார்.
நெருக்கடியான சூழல் நிலவினாலும், இயற்கையை மீட்டெடுப்பது சாத்தியமே என்று இந்த அறிக்கை நம்பிக்கை அளிக்கிறது. கணக்கெடுக்கப்பட்ட உயிரினக் குழுக்களில் பாதியளவு நிலையாகவோ அல்லது அதிகரித்துக்கொண்டோ உள்ளன.
புலிகள்: 2010ஆம் ஆண்டில் உலகளவில் சுமார் 3,200 காட்டுப் புலிகள் மட்டுமே இருந்த நிலையில், 2025ஆம் ஆண்டிற்குள் அந்த எண்ணிக்கை சுமார் 5,700 ஆக உயர்ந்துள்ளது (70%க்கும் அதிகமான வளர்ச்சி).
நீலச்சிறகு சூரை மீன்கள் (Bluefin Tuna): அதிகப்படியான மீன்பிடித்தலால் அழியும் விளிம்பில் இருந்த இந்த மீன்கள் தற்போது அச்சுறுத்தலுக்கு உள்ளானவை என்ற பட்டியலில் இருந்து மீண்டு வந்துள்ளன.
ஆயுள் நீடித்த பசுமை கடல் ஆமைகள்: 50 ஆண்டுகால தொடர் முயற்சியின் பலனாக, 2025ஆம் ஆண்டில் பசுமை கடல் ஆமை முதன்முறையாக ‘அழிந்துவரும் இனம்’ என்ற நிலையிலிருந்து ‘குறைந்த ஆபத்துள்ள இனம்’ என்ற நிலைக்கு மாற்றப்பட்டுள்ளது.
ஆனாலும், இந்த வெற்றிகள் தற்காலிகமானவை என்றும், மனிதர்களின் கூட்டு முயற்சியால் மட்டுமே பல்லுயிர் இழப்பைத் தடுத்து இயற்கையை முழுமையாக மீட்க முடியும் என்றும் WWF வலியுறுத்தியுள்ளது.
