SARS-CoV-2 வைரஸ் நோயெதிர்ப்பு மண்டலத்தை குழப்பி, ஆரோக்கியமான செல்களைத் தவறாகத் தாக்கச் செய்யும் என்று இஸ்ரேலிய ஆராய்ச்சியாளர்கள் கண்டுபிடித்துள்ளனர்.
கோவிட் வைரஸ் 3 ஆண்டுகளுக்கு பிறகு மீண்டும் கம்பேக் கொடுத்துள்ளது. ஆசிய நாடுகள் கோவிட் பாதிப்பு படிப்படியாக அதிகரித்து வரும் நிலையில், இந்தியாவில் வைரஸ் பரவல் வேகமெடுத்துள்ளது. இந்தியாவில் மொத்த கொரோனா பாதிப்பு எண்ணிக்கை 7000-ஐ நெருங்கி உள்ளது. மாஸ்க் அணிவது, சமூக இடைவெளியை பின்பற்றுவது போன்ற கொரோனா பாதுகாப்பு நடவடிக்கைகளை மேற்கொள்வது நல்லது என்று நிபுணர்கள் தெரிவிக்கின்றனர்.
இந்த சூழலில் SARS-CoV-2 வைரஸிலிருந்து வரும் ஒரு புரதம், நோயெதிர்ப்பு மண்டலத்தை குழப்பி ஆரோக்கியமான செல்களைத் தவறாகத் தாக்கச் செய்யும் என்று இஸ்ரேலிய ஆராய்ச்சியாளர்கள் கண்டுபிடித்துள்ளனர்.. செல் ரிப்போர்ட்ஸ் இதழில் வெளியிடப்பட்ட இந்த ஆய்வு, கோவிட் சிக்கல்கள் எவ்வளவு கடுமையானதாக இருக்கலாம் என்பதை வெளிச்சம் போட்டுக் காட்டுகிறது. வைரஸிலிருந்து நோயெதிர்ப்பு சார்ந்த சேதத்தைத் தடுப்பதற்கான புதிய வழிகளை பரிந்துரைக்கிறது என்று நிபுணர்கள் தெரிவிக்கின்றனர்.
ஜெருசலேம் ஹீப்ரு பல்கலைக்கழக ஆராய்ச்சியாளர்கள், பொதுவாக பாதிக்கப்பட்ட செல்களுக்குள் வைரஸின் மரபணுப் பொருளை பேக் செய்ய உதவும் வைரஸின் நியூக்ளியோகாப்சிட் புரதம் (NP), அருகிலுள்ள பாதிக்கப்படாத எபிதீலியல் செல்களுக்கு பரவக்கூடும் என்பதைக் கண்டறிந்தனர்.
இந்த ஆரோக்கியமான செல்களின் மேற்பரப்பில் NP ஆனது நோயெதிர்ப்பு மண்டலத்தால் அச்சுறுத்தலாக தவறாக அடையாளம் காணப்படும். பின்னர் நோயெதிர்ப்பு அமைப்பு NP எதிர்ப்பு ஆன்டிபாடிகளை வரிசைப்படுத்துகிறது, இது இந்த பாதிக்கப்படாத செல்களின் அழிவுக்கு காரணமாகிறது. இந்த செயல்முறை நோயெதிர்ப்பு மறுமொழியின் ஒரு பகுதியாகும். இது வீக்கம் மற்றும் திசு சேதத்திற்கு வழிவகுக்கிறது, கடுமையான கோவிட் அறிகுறிகளுக்கும், நீண்ட கோவிட்க்கும் பங்களிக்கிறது.
“ஆய்வகத்தில் வளர்க்கப்பட்ட செல்கள், மேம்பட்ட இமேஜிங் மற்றும் கோவிட்-19 நோயாளிகளிடமிருந்து மாதிரிகள் ஆகியவற்றைப் பயன்படுத்தி, செல் மேற்பரப்பில் உள்ள ஒரு வகை மூலக்கூறுடன் NP பிணைக்கப்படுவதை ஆராய்ச்சியாளர்கள் கண்டறிந்தனர். இந்த பிணைப்பு புரதத்தை ஆரோக்கியமான செல்களில் கொத்தாக மாற்றி, நோயெதிர்ப்பு மண்டலத்தை மேலும் குழப்புகிறது. இதனால் நோயெதிர்ப்பு மண்டலம் ஆரோக்கியமான செல்களை தாக்கக்கூடும்” என்று விஞ்ஞானிகள் தெரிவித்துள்ளனர்.
இந்த கண்டுபிடிப்பு கோவிட் மற்றும் பிற வைரஸ் தொற்றுகளில் நோயெதிர்ப்பு தொடர்பான சிக்கல்களைக் குறைப்பதற்கான புதிய நம்பிக்கையை அளிக்கக்கூடும் என்று ஆராய்ச்சியாளர்கள் தெரிவிக்கின்றனர்.
இதனிடையே , NB.1.8.1 எனப்படும் புதிதாக அடையாளம் காணப்பட்ட கோவிட் மாறுபாடு சமீபத்தில் உலகின் பல பகுதிகளிலும் வேகமாகப் பரவி வருகிறது. இது புதிய கவலைகளை எழுப்புகிறது. ஓமிக்ரான் குடும்பத்தைச் சேர்ந்த இந்த மாறுபாடு முதன்முதலில் ஜனவரி 2025 இல் கண்டறியப்பட்டது, அதன் பின்னர் இந்தியா, அமெரிக்கா, இங்கிலாந்து, ஆஸ்திரேலியா, சீனா, மாலத்தீவுகள் மற்றும் எகிப்து உள்ளிட்ட நாடுகளை அடைந்துள்ளது.
உலக சுகாதார அமைப்பு (WHO) இதை அதிகாரப்பூர்வமாக “கண்காணிப்பின் கீழ் உள்ள மாறுபாடு” என்று பெயரிட்டுள்ளது, அதாவது இது கவனத்தை ஈர்க்கும் அளவுக்கு வேகமாக பரவுகிறது, ஆனால் ஒரு பெரிய அச்சுறுத்தலாக மாறவில்லை என்பது குறிப்பிடத்தக்கது.
