பிரதமர் நரேந்திர மோடி விரைவில் ரஷ்யாவிடம் இருந்து எண்ணெய் வாங்குவதை நிறுத்துவதாக உறுதியளித்துள்ளதாக அமெரிக்க அதிபர் டொனால்ட் டிரம்ப் கூறியுள்ளார்.
வெள்ளை மாளிகையில் செய்தியாளர்களிடம் பேசிய அதிபர் டிரம்ப், “ஆம், நிச்சயமாக. பிரதமர் நரேந்திர மோடி எனது நண்பர். எங்களுக்குள் மிகச் சிறந்த உறவு உள்ளது. இந்தியா ரஷ்யாவிடம் இருந்து எண்ணெய் வாங்குவது எனக்குப் பிடிக்கவில்லை. இருப்பினும், இந்தியாவால் அதை ‘உடனடியாக’ செய்ய முடியாது என்று பிரதமர் மோடி தன்னிடம் கூறியதாகவும், ஆனால் இந்த செயல்முறை ‘விரைவில் முடிவடையும்’ என்றும் டிரம்ப் கூறினார்.
ரஷ்யா மீது உலகளாவிய அழுத்தத்தை அதிகரிக்கும் முயற்சிகளில் இது ஒரு பெரிய படியாகும் என்று அவர் கூறினார். இருப்பினும், இதற்கு முன்னர் இந்தியா-பாகிஸ்தான் போர்நிறுத்தம் குறித்து டிரம்ப் தவறான கூற்றுக்களை வெளியிட்டார் என்பது குறிப்பிடத்தக்கது.
இந்தியாவை நம்பகமான கூட்டாளியாக கருதுகிறாரா என்று ஏஎன்ஐ கேள்வி எழுப்பியது. அதற்கு டிரம்ப், “ஆம், நிச்சயமாக. அவர் (பிரதமர் மோடி) என்னுடைய நண்பர். எங்களுக்குள் நல்ல உறவு உள்ளது. இந்தியா ரஷ்யாவிலிருந்து எண்ணெய் வாங்குவதில் நான் மகிழ்ச்சியடையவில்லை. இருப்பினும், இந்தியா ரஷ்யாவிலிருந்து எண்ணெய் வாங்காது என்று அவர் இப்போது எனக்கு உறுதியளித்துள்ளார்.
மேலும், சீனாவையும் அதே காரியத்தை செய்ய வைப்பேன். அதிபர் புடினிடமிருந்து நாங்கள் விரும்புவது இதை நிறுத்த வேண்டும். உக்ரைன் மக்களை கொல்வதை நிறுத்த வேண்டும். ரஷ்யர்கள் உக்ரைன் மக்கள் மீது தாக்குதல் நடத்துவதை நிறுத்துவோம்.
இந்தியா எண்ணெய் வாங்கவில்லை என்றால், அது மிகவும் எளிதாக்குகிறது. இந்தியாவின் எண்ணெய் கொள்முதல் மறைமுகமாக உக்ரைன் மீதான ரஷ்யாவின் படையெடுப்பை அதிகரிக்கிறது. தொடர்ச்சியான வர்த்தகம் பல மக்களை இழந்த இந்த அபத்தமான போரை ரஷ்யா தொடர அனுமதிக்கிறது. இவ்வாறு அதிபர் டிரம்ப் கூறினார். ரஷ்யாவிலிருந்து எண்ணெய் வாங்குவது, எரிசக்தி பாதுகாப்பு மற்றும் பொருளாதார ஸ்திரத்தன்மைக்கு இன்றியமையாதது என மத்திய அரசு தெளிவுப்படுத்தி உள்ளது.
சீனாவுக்கு அடுத்தபடியாக ரஷ்யாவின் இரண்டாவது பெரிய எண்ணெய் வாங்குபவர் இந்தியா என்பது குறிப்பிடத்தக்கது. இந்தியா ரஷ்யாவிலிருந்து எண்ணெய் வாங்குவதை நிறுத்தினால், அது மாஸ்கோவின் முதன்மை வாடிக்கையாளர்களில் ஒரு பெரிய மாற்றத்தைக் குறிக்கும், மேலும் ரஷ்ய எண்ணெயை வாங்கும் பிற நாடுகளுக்கு ஒரு புதிய சூழ்நிலையை உருவாக்கும்.
