அமெரிக்கா ஜனாதிபதி டொனால்ட் ட்ரம்ப் மற்றும் கொலம்பியா ஜனாதிபதி குஸ்டாவோ பெட்ரோ இடையே ஏற்பட்டுள்ள பதற்றம் மேலும் அதிகரித்துள்ளது. கடந்த வாரம் வெனிசுவேலாவிற்கு எதிராக அமெரிக்கா நடத்திய ராணுவ நடவடிக்கையின் பின்னர், அந்நாட்டு முன்னாள் தலைவர் நிக்கோலஸ் மதுரோ கைது செய்யப்பட்டார். இதைத் தொடர்ந்து, பெட்ரோ “வந்து என்னை பிடியுங்கள், நான் காத்திருக்கிறேன்” என்று ட்ரம்புக்கு பகிரங்க சவால் விடுத்துள்ளார்.
கொலம்பிய அதிபரைப் பற்றி ட்ரம்ப் கூறியது என்ன?
இதற்கு முன்பே ட்ரம்ப் கொலம்பியாவை பற்றி கடுமையாக விமர்சித்திருந்தார். ட்ரம்ப் “கொலம்பியா ஒரு நோயுற்ற மனிதனால் ஆளப்படுகிறது. அவர் கோகெய்ன் தயாரித்து அதை அமெரிக்காவிற்கு விற்க விரும்புகிறார்.. பெட்ரோவிடம் கோகெய்ன் ஆலைகளும் தொழிற்சாலைகளும் உள்ளன, அவர் இதை நீண்ட காலத்திற்கு செய்யப் போவதில்லை” என்றும் அவர் குற்றம் சாட்டினார்.
ட்ரம்புக்கு குஸ்டாவோ சவால்
எக்ஸ் சமூக வலைதளத்தில் ஒரு பதிவில், ட்ரம்ப் நிர்வாகத்தை பெட்ரோ கடுமையாக விமர்சித்து பதிவிட்டார்.. “அதிபரின் அதிகாரங்களைப் பிரித்து, அதிபர் ஒத்துழைக்க விரும்பவில்லை, ஆனால் அதிகாரிகள் ஒத்துழைக்கிறார்கள் என்று கூறும் திரு. ரூபியோவைப் பொறுத்தவரை, அவர் கொலம்பிய அரசியலமைப்பைப் படிக்க வேண்டும் என்று நான் கேட்டுக்கொள்கிறேன். ஏனெனில் அவரது தகவல் முற்றிலும் தவறானது. இது மாஃபியாவுடன் குடும்ப ரீதியாகவோ அல்லது வணிக ரீதியாகவோ தொடர்புடைய கொலம்பிய அரசியல்வாதிகளின் நலன்களின் விளைவாகும். அவர்கள் அமெரிக்காவிற்கும் கொலம்பியாவிற்கும் இடையிலான உறவுகள் முறிந்து, உலகில் கோகெய்ன் போதைப்பொருள் கடத்தல் வெடித்துச் சிதற வேண்டும் என்று விரும்புகிறார்கள்.” என்று தெரிவித்துள்ளார்.
கொலம்பியா உலகின் மிகப்பெரிய கோகெய்ன் உற்பத்தியாளராக இருந்தாலும், 2022-ல் தேர்ந்தெடுக்கப்பட்ட அதிபர் பெட்ரோ சட்டவிரோத போதைப்பொருள் நடவடிக்கைகளில் ஈடுபட்டுள்ளார் என்பதற்கு ட்ரம்ப் கூறுவது போல் எந்த ஆதாரமும் இல்லை. போதைப்பொருள் கடத்தலை எதிர்த்துப் போராடுவதில் கொலம்பியா நீண்ட காலமாக அமெரிக்காவின் பங்காளியாக இருந்து வருகிறது, இருப்பினும் கடந்த ஆண்டு டிரம்ப் பதவியேற்றதிலிருந்து இரு நாடுகளுக்கும் இடையிலான உறவுகள் மோசமடைந்துள்ளதாகக் கூறப்படுகிறது.
அதிபராவதற்கு முன்பு பொகோட்டாவின் மேயராகப் பணியாற்றிய பெட்ரோ, “நான் மீண்டும் ஆயுதம் தொடமாட்டேன் என்று சத்தியம் செய்தேன்… ஆனால் தாய்நாட்டிற்காக நான் மீண்டும் ஆயுதம் ஏந்துவேன்… வந்து என்னைப் பிடித்துப் பாருங்கள். நான் உங்களுக்காக இங்கே காத்திருக்கிறேன். என்னை அச்சுறுத்த வேண்டாம், நீங்கள் விரும்பினால் நான் உங்களுக்காக இங்கேயே காத்திருப்பேன்” என்று கூறியதாகவும் மேற்கோள் காட்டப்பட்டுள்ளது.
மதுரோவும் எச்சரிக்கை
அமெரிக்கப் படைகளால் கைது செய்யப்படுவதற்கு சில மாதங்களுக்கு முன்பு, 63 வயதான வெனிசுலா தலைவர் டிரம்பிற்கு இதேபோன்ற சவாலை விடுத்திருந்தார்.
ஆகஸ்ட் மாதம் ஒரு உரையில், நிக்கோலஸ் மதுரோ, “வந்து என்னைப் பிடித்துப் பாருங்கள். நான் மிராஃப்ளோரஸில் அவருக்காகக் காத்திருப்பேன். தாமதிக்காதே, கோழையே” என்று கூறியிருந்தார் என்பது குறிப்பிடத்தக்கது.
