நவீன தொழில்நுட்பம் இசையை வேகமாகவும் எளிதாகவும் அணுகக்கூடியதாக மாற்றியிருந்தாலும், கருவிகளைக் கொண்டு மட்டுமே உருவாக்கப்படும் இசை காதுகளை மட்டுமே சென்றடைகிறது. ஆழ்ந்த உணர்வுகளிலிருந்து பிறக்கும் இசைதான் உண்மையாகவே இதயத்தைத் தொடுகிறது என்று இசைஞானி இளையராஜா தெரிவித்துள்ளார்.. 11வது அஜந்தா எல்லோரா சர்வதேச திரைப்பட விழாவின் (AIFF) பிரம்மாண்ட தொடக்க விழாவில் கலந்துகொண்ட போது அவர் இந்த கருத்தை தெரிவித்தார்..
உலகம் முழுவதும் பாராட்டப்பட்ட திரைப்படங்களைக் கொண்டாடும் வருடாந்திர விழாவான அஜந்தா-எல்லோரா சர்வதேச திரைப்பட விழா (AIFF), நேற்று எம்ஜிஎம் பல்கலைக்கழகத்தின் ருக்மணி அரங்கில், சிறப்பு விருந்தினர்கள் முன்னிலையில் அதிகாரப்பூர்வமாகத் தொடங்கி வைக்கப்பட்டது.
இந்தியத் திரைப்பட இசைக்கு ஆற்றிய இணையற்ற பங்களிப்பிற்காக, பத்ம விபூஷண் ஸ்ரீ இளையராஜாவுக்கு (மாநிலங்களவை உறுப்பினர்) பத்மபாணி விருது வழங்கப்பட்டது.. இதுவே இந்த நிகழ்வின் முக்கிய அம்சமாக இருந்தது. இந்த விருதில் ஒரு பாரம்பரிய பைத்தானி சால்வை, ஒரு நினைவுப் பரிசு, ஒரு பாராட்டுச் சான்றிதழ் மற்றும் ₹2,00,000 ரொக்கப் பரிசு ஆகியவை அடங்கும்.
பார்வையாளர்களிடையே உரையாற்றிய இளையராஜா, தனது படைப்புச் செயல்முறை குறித்த தகவல்களை பகிர்ந்துகொண்டார். “நான் இசையை அதிகமாக யோசிக்காமல் நேரடியாக எழுதுகிறேன். எனது திரை வாழ்க்கையில், 1,545 படங்களில் பணியாற்றியுள்ளேன்.. அதே எண்ணிக்கையிலான இயக்குநர்கள் மற்றும் தயாரிப்பாளர்களுடன் இணைந்து பணியாற்றியுள்ளேன். இன்றும் நான் நவீன தொழில்நுட்ப குறுக்குவழிகளைச் சார்ந்து இருப்பதில்லை. “நான் தொடர்ந்து உழைத்து வருகிறேன், மேலும் இசையின் வாழ்நாள் மாணவனாக என்னை நான் கருதுகிறேன்,” என்று கூறினார்.
தனது அயராத அர்ப்பணிப்பை நிரூபிக்கும் வகையில், இந்த விழாவுக்கு வருவது முன்பு, தனது 1,545-வது திரைப்படத்திற்கான இசையமைப்பை முடித்ததாக இளையராஜா தெரிவித்தார்.
டிஜிட்டல் யுகம் குறித்துப் பேசிய இளையராஜா, இசை உருவாக்கம் என்பது எல்லா இடங்களிலும் பரவிவிட்டதாகக் குறிப்பிட்டார். இன்று, பியானோவில் ஒரு விசையை அழுத்துவதன் மூலமே இசை உருவாக்கப்படுகிறது, மேலும் ஒவ்வொரு வீட்டிலும் கிராமத்திலும் ஒரு இசையமைப்பாளரைக் காண முடிகிறது. இருப்பினும், இந்த இயந்திரமயமான காலகட்டத்தில், பயிற்சி, உணர்வு மற்றும் இசைக்கருவியின் ஆன்மாவில் வேரூன்றிய இசை மட்டுமே உண்மையாகவே கேட்பவர்களின் உள்ளத்தைத் தொடுகிறது. “பத்மபாணி விருதைப் பெறுவதில் நான் மிகுந்த பெருமை அடைகிறேன், மேலும் இந்த விழா பெரும் வெற்றி பெற வாழ்த்துகிறேன்,” என்று அவர் மேலும் கூறினார்.
தனது தலைமை உரையில், வேந்தர் அங்குஷ்ராவ் கடம், கடந்த பத்தாண்டுகளாக, அஜந்தா எல்லோரா சர்வதேச திரைப்பட விழா, ‘இந்த உலகமே என் வீடு’ என்ற தாரக மந்திரத்திற்கு உண்மையாக இருந்து, சத்ரபதி சம்பாஜிநகருக்கும் உலகளாவிய கலாச்சார இயக்கங்களுக்கும் இடையே தொடர்ந்து ஒரு பாலமாக இருந்து வருகிறது என்று கூறினார்.
புகழ்பெற்ற இளையராஜாவுக்கு பத்மபாணி விருதை வழங்குவதில் நாங்கள் மிகுந்த மகிழ்ச்சி அடைகிறோம் என்று அங்குஷ்ராவ் கடம் கூறினார். ” இளையராஜாவின் இசை தமிழ், தெலுங்கு, மலையாளம், கன்னடம், இந்தி மற்றும் மராத்தி சினிமா ரசிகர்கள் அனைவரின் இதயங்களிலும் ஒரு நிரந்தர இடத்தைப் பிடித்துள்ளது. இந்திய இசையின் ஆன்மாவாக, 7,000-க்கும் மேற்பட்ட பாடல்கள் மற்றும் 1,500-க்கும் மேற்பட்ட திரைப்படங்களுக்கு இசையமைத்த மகத்தான படைப்புகளுடன் திகழ்கிறார். இந்த கௌரவத்தை ஏற்றுக்கொண்ட அவருக்கு நாங்கள் மனமார்ந்த நன்றியைத் தெரிவித்துக் கொள்கிறோம்.” என்று தெரிவித்தார்..
விழாவின் தலைவர் நந்தகிஷோர் காக்லிவால், இந்த விழாவின் தனித்துவமான தலைமைப் பண்பை எடுத்துரைத்தார். 5 இயக்குநர்களைக் கொண்ட குழுவால் வழிநடத்தப்படும் ஒரே விழா இதுவாகத்தான் இருக்கும் என்றும் அவர் குறிப்பிட்டார். பத்மபாணி மற்றும் கோல்டன் கைலாஸ் போன்ற விருதுகளில் பிரதிபலிக்கும் இந்த விழாவின் ஆழமான வரலாற்று வேர்களையும் அவர் வலியுறுத்தினார். இந்த நிகழ்விற்காகவே சென்னையிலிருந்து வருகை தந்த இளையராஜாவை அவர் அன்புடன் வரவேற்றார். அந்த இசை மேதையின் இசைப் பயணம் ஒன்பது மொழிகளில் 7,000-க்கும் மேற்பட்ட பாடல்களைக் கொண்டது என்றும் அவர் குறிப்பிட்டார்.
ஆஸ்கார் விருது வென்ற ரசூல் பூக்குட்டி, இளையராஜாவை ஒரு அரிய மற்றும் உணர்வுப்பூர்வமான ஆத்மா என்று புகழாரம் சூட்டினார்.. இளையராஜாவின் அசாதாரணமான வாழ்நாள் படைப்புகளைக் கொண்டாடும் இந்த வாய்ப்பு கிடைத்ததற்கு நாங்கள் உண்மையிலேயே நன்றியுள்ளவர்களாக இருக்கிறோம் என்றும் அவர் கூறினார். விழாவின் ஏற்பாட்டாளர்களுக்கும் அவர் நன்றி தெரிவித்தார்.
இயக்குநர் சுனில் சுக்தங்கர், இந்த ஆண்டு விழாவில் 70 திரைப்படங்கள் திரையிடப்படும் என்று தெரிவித்தார். சர்வதேச FIPRESCI நடுவர் குழுவை அவர் வரவேற்றதுடன், சினிமாவில் சிறப்பை ஊக்குவிக்கும் வகையில் வடிவமைக்கப்பட்ட பல்வேறு போட்டிப் பிரிவுகளையும் குறிப்பிட்டார்.
விழாவில் கலந்துகொண்ட தமிழ் சமூக உறுப்பினர்களின் சிறப்பு வேண்டுகோளின் பேரில், இளையராஜா தனது பிரபலமான “ஜனனி ஜனனி…” பாடலின் சில வரிகளைப் பாடினார். இது அரங்கம் முழுவதையும் நெகிழச் செய்தது. மேலும், சத்ரபதி சம்பாஜிநகரைச் சேர்ந்தவரும், தென்னிந்தியத் திரையுலகில் வளர்ந்து வரும் நடிகையுமான பாக்கியஸ்ரீ போர்ஸ், அவரது வெற்றிப் பயணத்திற்காக இந்த நிகழ்வில் கௌரவிக்கப்பட்டார்.
மகாராஷ்டிர துணை முதல்வர் அஜித் பவாரின் துயரமான மறைவு குறித்து இயக்குநர் சந்திரகாந்த் குல்கர்னி இரங்கல் செய்தி வாசிக்கப்பட்டது.. பிரமுகர்கள் அவரது நினைவிற்கு மௌனமான, மனமார்ந்த அஞ்சலி செலுத்தினர். அவருக்கு மரியாதை செலுத்தும் விதமாக, தொடக்க விழா எளிமையான முறையில் நடத்தப்பட்டது.
