தமிழக சட்டமன்றத் தேர்தல் நெருங்கி வரும் வேளையில், பிரதான எதிர்க்கட்சியான அதிமுகவுக்கு பேரிடியாக ஒரு செய்தி வெளியாகியுள்ளது. அதிமுகவின் மூத்த தலைவரும், முன்னாள் சபாநாயகருமான தனபாலின் மகன் லோகேஷ் தமிழ்செல்வன், நடிகர் விஜய்யின் ‘தமிழக வெற்றிக் கழகத்தில்’ தன்னை இணைத்துக் கொண்டுள்ளார். தற்போது அவினாசி தொகுதி அதிமுக எம்.எல்.ஏ-வாக தனபால் பதவி வகித்து வரும் சூழலில், அவரது சொந்த மகனே மாற்றுப் பாதைக்கு சென்றிருப்பது எடப்பாடி பழனிசாமி மற்றும் அதிமுகவின் முன்னணித் தலைவர்களிடையே பெரும் அதிர்ச்சியை ஏற்படுத்தியுள்ளது.
அதிமுகவின் மிக முக்கியமான முகங்களில் ஒருவராகக் கருதப்படும் லோகேஷ் தமிழ்செல்வன், கட்சிக்குள் பல்வேறு பொறுப்புகளை வகித்தவர். குறிப்பாக, கடந்த 2024 மக்களவை தேர்தலில் நீலகிரி தொகுதியில் அதிமுகவின் அதிகாரப்பூர்வ வேட்பாளராக களமிறங்கி, மிகக் குறுகிய காலத்திலேயே பெரும் கவனத்தை ஈர்த்தவர். கொங்கு மண்டலத்தின் முக்கியத் தலைவர்களில் ஒருவராக உருவெடுப்பார் என்று எதிர்பார்க்கப்பட்ட நிலையில், அவர் திடீரென தவெக-வின் கொள்கைகளை ஏற்று விஜய் பக்கம் சாய்ந்திருப்பது அதிமுகவின் தேர்தல் வியூகங்களுக்குப் பின்னடைவாகப் பார்க்கப்படுகிறது.
