கோடைக்காலத்தில் சில உணவுப் பொருட்கள் விரைவில் கெட்டுப்போகும் அபாயம் அதிகமாக இருக்கும். குறிப்பாக பால், தயிர், சமைத்த சாதம், நறுக்கிய பழங்கள், சாலட், பேக்கரி பொருட்கள், மேலும் வெங்காயம் மற்றும் பூண்டு சேர்க்கப்பட்ட உணவுகள் போன்றவை நீண்ட நேரம் வைத்திருக்கக் கூடாது. இந்த வகை உணவுகளை தயாரித்த 24 மணி நேரத்திற்குள் உட்கொள்ளுவது பாதுகாப்பானது. இல்லையெனில், அவை கெட்டு உடல்நலப் பிரச்சனைகளை ஏற்படுத்தக்கூடும்.
பால் மற்றும் பால் பொருட்கள்: பால் மற்றும் பால் சார்ந்த உணவுகள் கோடைக்காலத்தில் மிக விரைவாக கெட்டுப்போகும். குறிப்பாக பால், பனீர், தயிர் மற்றும் கஸ்டர்ட் போன்றவற்றை 6 முதல் 8 மணி நேரத்திற்குள் உட்கொள்ளுவது பாதுகாப்பானது. இதற்கு மேல் அவற்றை வெளியில் வைத்திருந்தால் கெட்டுப்போகும் அபாயம் அதிகம். ஆகவே, அவற்றை நீண்ட நேரம் பயன்படுத்த வேண்டுமெனில் குளிர்சாதனப் பெட்டியில் சேமித்து வைப்பது நல்லது.
சமைத்த சாதம்: சமைத்த சாதம் கோடைக்காலத்தில் மிகவும் விரைவில் புளித்துவிடும் மற்றும் கெட்டுப்போகும். எனவே, ஒரு நாள் அல்லது இரண்டு நாட்கள் பழைய சாதத்தை சாப்பிடுவது தவிர்க்கப்பட வேண்டும். புதியதாக சமைத்த சாதத்தை உடனே சாப்பிடுவது தான் பாதுகாப்பானது. இருப்பினும், இரவில் மீதமுள்ள சாதத்தில் தயிர் சேர்த்து வைத்தால், அதை மறுநாள் காலையில் சாப்பிடலாம்; இது உடலுக்கும் நல்லது.
பழங்கள்: வாழைப்பழம், நறுக்கிய ஆப்பிள், பப்பாளி, மாம்பழம் போன்ற பழங்கள் கோடைக்காலத்தில் மிகவும் விரைவில் கருமையாகி அழுகிவிடும். அதனால், இவ்வகை பழங்களை வெட்டியவுடன் உடனே சாப்பிடுவது நல்லது. நீண்ட நேரம் வெளியில் வைத்தால் சுவையும், சத்துக்களும் குறைந்து கெட்டுப்போகும் அபாயம் அதிகம்.
சாலட்: கோடைக்காலத்தில் சாலட்டை முன்கூட்டியே நறுக்கி வைத்து சேமிப்பது தவிர்க்கப்பட வேண்டும். காற்றில் வெளிப்படுவதால் அது விரைவில் கெட்டுப்போகும்.
தக்காளி, வெள்ளரிக்காய், வெங்காயம், எலுமிச்சை போன்றவற்றை சாப்பிடும் நேரத்திலேயே நறுக்கி உடனடியாக சாப்பிடுவது பாதுகாப்பானதும் ஆரோக்கியமானதும் ஆகும்.
பேக்கரி பொருட்கள்: கேக், ரொட்டி, பேஸ்ட்ரி, பீட்சா போன்ற பேக்கரிப் பொருட்கள் கோடைக்காலத்தில் ஈரப்பதம் காரணமாக விரைவில் பூஞ்சை பிடிக்கும். 24 மணி நேரத்திற்கு மேல் குளிர்சாதனப் பெட்டியில் வைக்க வேண்டாம். அவற்றை விரைவாகச் சாப்பிடுவது நல்லது.
வெங்காயம் மற்றும் பூண்டு: பருப்பு மற்றும் குழம்புகளில் வெங்காயம், பூண்டு பயன்படுத்தினால், அவற்றை 24 மணி நேரத்திற்கு மேல் வைத்திருக்க வேண்டாம். கோடை காலத்தில் வெங்காயம், பூண்டு மற்றும் மசாலாப் பொருட்கள் விரைவில் கெட்டுவிடும். அவற்றைக்கொண்டு சமைக்கப்படும் உணவுகளும் கெட்டுப்போவதோடு, துர்நாற்றமும் வீசும். எனவே, அவற்றைச் சமைத்த உடனேயே சாப்பிட்டுவிட வேண்டும்.
