தற்போது நடைபெற்று வரும் போருக்கு மத்தியில், போர் நிறுத்தத்தை மேற்கொள்ளுமாறு ஈரானின் புதிய ஆட்சியின் ஜனாதிபதி அமெரிக்காவை வலியுறுத்தியுள்ளதாக அமெரிக்க ஜனாதிபதி டொனால்ட் டிரம்ப் இன்று தெரிவித்தார்.
தனது ட்ரூத் சோஷியல் தளத்தில் பதிவிட்டுள்ள டிரம்ப் “தனது முன்னோடிகளை விட மிகவும் தீவிரமயமற்றவராகவும், அதிக புத்திசாலியாகவும் இருக்கும் ஈரானின் புதிய ஆட்சி ஜனாதிபதி, அமெரிக்காவிடம் போர் நிறுத்தம் கோரியுள்ளார்! ஹோர்முஸ் ஜலசந்தி திறந்து, தடையின்றி, தெளிவாக இருக்கும்போது நாங்கள் பரிசீலிப்போம். அதுவரை, நாங்கள் ஈரானை முற்றிலுமாக அழிப்போம் அல்லது, அவர்கள் சொல்வது போல், கற்காலத்திற்குத் திருப்பி அனுப்புவோம்!!!” என்றும் குறிப்பிட்டுள்ளார்..
உலகின் எண்ணெய் விநியோகத்தில் சுமார் 20 சதவீதத்தைக் கொண்டுசெல்லும் குறுகிய கடல்வழிப் பாதையான ஹார்முஸ் நீரிணை, அதிகரித்து வரும் பதட்டங்களுக்கு மத்தியில் ஒரு முக்கிய பதற்றப் புள்ளியாக உருவெடுத்துள்ளது.
அமெரிக்க மற்றும் இஸ்ரேலியத் தாக்குதல்களுக்குப் பதிலடியாக, அந்த நீர்வழிப்பாதை வழியாக கப்பல் போக்குவரத்தைக் கட்டுப்படுத்த ஈரான் நடவடிக்கை எடுத்ததைத் தொடர்ந்து நிலைமை தீவிரமடைந்தது. இது உலகளாவிய எரிசக்தி விநியோகம் மற்றும் பிராந்திய ஸ்திரத்தன்மை குறித்த கவலைகளை எழுப்பியுள்ளது.
எனினும் போர்நிறுத்தக் கோரிக்கை விடுத்ததாக டிரம்ப் கூறியதற்கு ஈரான் இன்னும் பதிலளிக்கவில்லை. போரின் நிலை குறித்து அமெரிக்கர்களிடம் உரையாற்றுவதற்கு சில மணி நேரங்களுக்கு முன்பு டிரம்பின் இந்தக் கருத்துக்கள் வெளியாகியுள்ளன.
முன்னதாக நேற்று இந்த போர் குறித்து பேசிய டிரம்ப், முறையான ஒப்பந்தம் எட்டப்படாவிட்டாலும், ஈரானில் அமெரிக்காவின் நடவடிக்கை சில வாரங்களில் முடிவுக்கு வரக்கூடும் என்றும் குறிப்பிட்டிருந்தார்.
இதற்கு எவ்வளவு காலம் ஆகலாம் என்பதற்கான காலக்கெடுவைக் குறிப்பிட்ட டிரம்ப், வெள்ளை மாளிகையில் பேசுகையில், அமெரிக்கா “மிக விரைவில், அதாவது சுமார் “இரண்டு வாரங்களுக்குள், ஒருவேளை இரண்டு வாரங்கள், அல்லது மூன்று வாரங்களுக்குள் ஈரானில் இருந்து அமெரிக்கா வெளியேறும்” என்று கூறினார்.
அமெரிக்கப் படைகள் வெளியேறுவதற்கு முன்பு “வேலையை முடித்து வருகின்றன” என்றும் அவர் மேலும் கூறினார். “நான் செய்ய வேண்டியதெல்லாம் ஈரானை விட்டு வெளியேறுவதுதான், நாங்கள் அதை மிக விரைவில் செய்வோம், அவர்கள் வீழ்ந்துவிடுவார்கள்,” என்று டிரம்ப் கூறினார்.
ஈரானில் நடக்கும் போரின் நிலை குறித்து இதுவரை தெளிவின்மை நிலவி வருகிறது; அது எப்போது முடிவடையும், அதை முடிவுக்குக் கொண்டுவர என்ன தேவைப்படும் என்பது குறித்த தெளிவான தகவல்கள் எதுவும் வெளியாகவில்லை..
ஆனால் அமெரிக்காவிற்கும் இஸ்ரேலுக்கும் இடையிலான ஒருங்கிணைப்பு குறித்து முரண்பட்ட சமிக்ஞைகளை அளித்து, ஈரானுக்கு எதிரான இஸ்ரேலின் இராணுவ நடவடிக்கையைத் தொடரப்போவதாக பெஞ்சமின் நெதன்யாகு உறுதியளித்தார். “இந்த நடவடிக்கை இன்னும் முடிவடையவில்லை… நாங்கள் பயங்கரவாத ஆட்சியைத் தொடர்ந்து நசுக்குவோம்,” என்று கூறிய நெதன்யாகு, அமெரிக்கா பின்வாங்கினாலும் இஸ்ரேல் ஈரானைத் தொடர்ந்து தாக்கக்கூடும் என்பதைச் சுட்டிக்காட்டினார்.
Read More : ‘இது எங்கள் போர் அல்ல’: ஈரான் மோதல்.. டிரம்பின் கோரிக்கையை புறக்கணித்த இங்கிலாந்து பிரதமர்..!
