முட்டை என்பது மலிவு விலையில் கிடைக்கும் மிகச் சிறந்த சத்தான உணவுகளில் ஒன்றாகும். தினமும் ஒரு முட்டை சாப்பிடுவது உடல் நலத்திற்கு நல்லது என்று நிபுணர்கள் தெரிவிக்கின்றனர். முட்டைகளில் புரதம், கால்சியம், வைட்டமின்கள் மற்றும் தாதுக்கள் நிறைந்துள்ளன. குறிப்பாக, உடலுக்கு தேவையான உயர்தர புரதச்சத்து முட்டையில் அதிகமாக இருப்பதால், இது “முழுமையான உணவு” என்று கருதப்படுகிறது. தினமும் வேகவைத்த முட்டை சாப்பிடுவதால் கிடைக்கும் நன்மைகள் குறித்து பார்க்கலாம்.
முட்டையில் உள்ள ஊட்டச்சத்துக்கள்: ஒரு முட்டையில் சுமார் 77 கலோரிகள் மட்டுமே இருந்தாலும், உடலுக்கு தேவையான பல முக்கிய ஊட்டச்சத்துகளை வழங்குகிறது. அதில் வைட்டமின்கள் A, B5, B12, D, E, K மற்றும் B6 ஆகியவை அடங்கியுள்ளன. இதனுடன் ஃபோலேட், பாஸ்பரஸ், செலினியம், கால்சியம் மற்றும் துத்தநாகம் போன்ற தாதுக்களும் கிடைக்கின்றன. மேலும், ஒரு முட்டையில் சுமார் 6 கிராம் உயர்தர புரதமும், 5 கிராம் ஆரோக்கியமான கொழுப்புகளும் உள்ளதால், இது உடல் வளர்ச்சிக்கும், தசை வலிமைக்கும் முக்கிய பங்கு வகிக்கிறது.
புரதம்: முட்டைகள், உயர்தர புரதச்சத்து கொண்ட சிறந்த உணவாகக் கருதப்படுகின்றன. உடலுக்கு தேவையான ஒன்பது அத்தியாவசிய அமினோ அமிலங்களும் இதில் இருப்பது குறிப்பிடத்தக்கது. ஒரு வேகவைத்த முட்டையில் சுமார் 6 கிராம் புரதம் உள்ளது. இந்த புரதம் தசை வளர்ச்சிக்கும், உடல் வலிமை அதிகரிப்பிற்கும் முக்கிய பங்கு வகிக்கிறது. குறிப்பாக உடற்பயிற்சி செய்பவர்கள் மற்றும் வளர்பிறை வயதினருக்கு இது மிகவும் பயனுள்ளதாகும். மேலும், முட்டை சாப்பிடுவதால் நீண்ட நேரம் பசியை கட்டுப்படுத்த முடியும். இதனால் அதிக உணவு உட்கொள்ளும் பழக்கம் குறைந்து, உடல் எடையை கட்டுப்படுத்த உதவுகிறது.
முட்டைகளில் கொலஸ்ட்ரால் அதிகமாக இருந்தாலும், அவை இரத்தத்தில் உள்ள நல்ல கொலஸ்ட்ராலான HDL-ஐ அதிகரிக்கின்றன. சமீபத்திய ஆய்வுகளின்படி, பெரும்பாலான மக்களுக்கு உணவில் உள்ள கொலஸ்ட்ரால் இரத்தக் கொலஸ்ட்ராலை எதிர்மறையாகப் பாதிப்பதில்லை.
மூளை ஆரோக்கியத்திற்கு: முட்டைகளில் கோலின் (Choline) எனப்படும் முக்கிய ஊட்டச்சத்து அதிகமாக உள்ளது. இந்த சத்து, மூளை செல்களின் வளர்ச்சிக்கும், நரம்பு செல்கள் இடையே தகவல் பரிமாற்றத்தை கட்டுப்படுத்தும் மூலக்கூறுகள் உருவாகவும் உதவுகிறது. இதனால் நினைவாற்றல் மேம்படுகிறது, மனநிலையை சமநிலைப்படுத்துகிறது, தசை கட்டுப்பாட்டை சீராக வைத்திருக்க உதவுகிறது. குறிப்பாக, கர்ப்பிணிப் பெண்களுக்கு கோலின் மிகவும் அவசியமானது. இது கருவில் வளரும் குழந்தையின் மூளை வளர்ச்சிக்கு முக்கிய பங்கு வகிக்கிறது.
கண் ஆரோக்கியம்: முட்டையின் மஞ்சள் கருவில் லுடீன் (Lutein) மற்றும் ஸீக்ஸாந்தின் (Zeaxanthin) போன்ற சக்திவாய்ந்த ஆன்டிஆக்ஸிடன்ட்கள் நிறைந்துள்ளன. இச்சத்துகள், வயதுக்கு ஏற்ப ஏற்படும் கண் தொடர்பான பிரச்சனைகளின் அபாயத்தை குறைக்க உதவுகின்றன. மேலும், முட்டையில் உள்ள வைட்டமின் A, கண் பார்வையை தெளிவாக வைத்திருக்கவும், இரவு பார்வை குறைபாடு போன்ற பிரச்சனைகளைத் தடுக்கவும் முக்கிய பங்கு வகிக்கிறது.எனவே, தினசரி உணவில் முட்டையை சேர்த்துக்கொள்வது, கண் ஆரோக்கியத்தை பாதுகாக்கவும் மேம்படுத்தவும் உதவுகிறது.
எலும்பு ஆரோக்கியத்திற்கு நல்லது: முட்டையின் மஞ்சள் கருவில் வைட்டமின் டி இயற்கையாகவே உள்ளது. கால்சியம் உறிஞ்சப்படுவதற்கு வைட்டமின் டி இன்றியமையாதது. இது எலும்புகள் மற்றும் பற்களை வலுப்படுத்த உதவுகிறது. வைட்டமின் டி குறைபாடு எலும்புகளை பலவீனப்படுத்துகிறது. தினமும் முட்டை சாப்பிடுவது எலும்புகளை வலுப்படுத்த உதவுகிறது.
நோய் எதிர்ப்பு சக்தியை அதிகரிக்கிறது: முட்டைகளில் உள்ள வைட்டமின் ஏ, வைட்டமின் பி12 மற்றும் செலினியம் போன்ற ஊட்டச்சத்துக்கள், நோய்த்தொற்றுகளிலிருந்து உடலைப் பாதுகாக்கும் நோய் எதிர்ப்புச் சக்தியை வலுப்படுத்த உதவுகின்றன.
எடை கட்டுப்பாடு: முட்டைகளில் கலோரிகள் குறைவாகவும், புரதச்சத்து அதிகமாகவும் உள்ளன. காலை உணவாக வேகவைத்த முட்டைகளைச் சாப்பிடுவது, நீண்ட நேரத்திற்குப் பசி எடுக்காமல் இருக்க உதவுகிறது. இது அளவுக்கு அதிகமாகச் சாப்பிடுவதையும், உடல் எடை அதிகரிப்பதையும் கட்டுப்படுத்துகிறது.
சருமம் மற்றும் கூந்தல் ஆரோக்கியத்திற்கு: முட்டைகளில் உள்ள வைட்டமின்கள் பி2, பி5, பி12 மற்றும் மெத்தியோனைன் போன்ற அமினோ அமிலங்கள் ஆரோக்கியமான சருமம், முடி மற்றும் நகங்களுக்கு அவசியமானவை.
இவற்றை நினைவில் கொள்ளுங்கள்:
* முட்டையை அதிக நேரம் சமைத்தால், அதிலுள்ள சில ஊட்டச்சத்துக்கள் குறைந்துவிடக்கூடும். எனவே, அதை மிதமான சூட்டில் சமைத்துச் சாப்பிடுவது நல்லது.
* பெரும்பாலானவர்களுக்கு, தினமும் ஒரு முட்டை சாப்பிடுவது இரத்தக் கொலஸ்ட்ரால் அளவைப் பாதிப்பதில்லை. இருப்பினும், ஏற்கனவே அதிக கொலஸ்ட்ரால் அல்லது இதய நோய் உள்ளவர்கள், தினமும் ஒரு முட்டையை அல்லது சில சமயங்களில் முட்டையின் வெள்ளைக் கருவை மட்டும் சாப்பிடுவது நன்மை பயக்கும்.
* சிலருக்கு முட்டையால் ஒவ்வாமை ஏற்படும். அத்தகையவர்கள் முட்டை சாப்பிடுவதை நிறுத்த வேண்டும்.
* சரியாக வேகவைக்கப்படாத முட்டைகளில் சால்மோனெல்லா பாக்டீரியா பரவும் அபாயம் உள்ளது. எனவே, முட்டைகளை நன்கு வேகவைத்துச் சாப்பிடுவது சிறந்தது.
* அவித்த முட்டைகள் மிகவும் சத்தான உணவாகும். அவை பல உடல்நல நன்மைகளை வழங்குகின்றன. ஆரோக்கியமானவர்கள் தினமும் ஒரு முட்டை சாப்பிடலாம். இருப்பினும், ஏதேனும் உடல்நலப் பிரச்சினைகள் உள்ளவர்கள் மருத்துவரை அணுக வேண்டும்.
