இந்திய ரிசர்வ் வங்கி, புதிய டிஜிட்டல் பணப்பரிவர்த்தனை மின்-ஆணை கட்டமைப்பை உடனடியாக அமல்படுத்தியுள்ளது. இது முந்தைய அனைத்து சுற்றறிக்கைகளையும் ரத்து செய்து, அட்டைகள், யுபிஐ மற்றும் ப்ரீபெய்ட் கட்டணக் கருவிகள் மூலம் செய்யப்படும் தொடர் கொடுப்பனவுகளுக்கு சீரான விதிகளைக் கொண்டு வந்துள்ளது என CNBCTV18 செய்தி வெளியிட்டுள்ளது. இந்த புதிய அமைப்பு உள்நாட்டு மற்றும் வெளிநாட்டு கொடுப்பனவுகள் இரண்டிற்கும் பொருந்தும். இந்தக் கட்டமைப்பின் கீழ், ஒரு மின்-ஆணையை ஒருமுறை பதிவு செய்ய வேண்டும்.
பின்னர், AFA (கூடுதல் காரணி அங்கீகாரம்) தேவைப்படுகிறது. வாடிக்கையாளர்கள் தங்கள் ஆணையை எப்போது வேண்டுமானாலும் மாற்றலாம் அல்லது ரத்து செய்யலாம்.
புதிய விதிகள் நிலையான கொடுப்பனவுகள் மற்றும் மாறும் மதிப்புடைய தொடர் கொடுப்பனவுகள் இரண்டையும் அனுமதிக்கின்றன. பயனர்கள் மாறும் மதிப்புடைய கொடுப்பனவுகளுக்கு ஒரு அதிகபட்ச வரம்பை நிர்ணயிக்கலாம். முதல் பரிவர்த்தனைக்கு AFA கட்டாயமாகும். நிர்ணயிக்கப்பட்ட வரம்பிற்குள் இருந்தால், அடுத்தடுத்த கொடுப்பனவுகள் எளிதாகச் செயல்படுத்தப்படும். ஒவ்வொரு கொடுப்பனவும் செய்யப்படுவதற்கு குறைந்தது 24 மணி நேரத்திற்கு முன்பு ஒரு முன்-பற்று எச்சரிக்கை அனுப்பப்படும். அதில் வணிகரின் பெயர், தொகை மற்றும் தேதி ஆகியவை அடங்கும். இது வாடிக்கையாளர் விரும்பவில்லை என்றால், கொடுப்பனவை நிறுத்துவதற்கான விருப்பத்தை வழங்கும். கொடுப்பனவு செய்யப்பட்ட பிறகும் ஒரு எச்சரிக்கை அனுப்பப்படும். அதில் புகார் அளிப்பதற்கான விவரங்கள் அடங்கும்.
உதாரணமாக, நீங்கள் நெட்ஃபிளிக்ஸ் அல்லது அமேசான் பிரைம் போன்ற ஒரு OTT சந்தாவைப் பயன்படுத்துகிறீர்கள் என்று வைத்துக்கொள்வோம். முன்பு, ஒவ்வொரு மாதமும் பணம் தானாகவே கழிக்கப்பட்டது. பல நேரங்களில், முன்கூட்டியே எந்தத் தெளிவான தகவலும் இல்லாமல் பரிவர்த்தனை நடந்துவிடும். ஆனால் புதிய விதிகளின்படி, பணம் செலுத்தப்படுவதற்கு குறைந்தது 24 மணி நேரத்திற்கு முன்பே உங்களுக்கு ஒரு எச்சரிக்கை (alert) கிடைக்கும். அதில், எவ்வளவு தொகை கழிக்கப்படும் மற்றும் எந்தத் தேதியில் கழிக்கப்படும் என்ற விவரங்கள் அடங்கியிருக்கும். உங்களுக்குத் தேவையில்லை என்றால், பணம் செலுத்துவதை நிறுத்துவதற்கான விருப்பமும் உங்களுக்கு இருக்கும். இது உங்கள் பணத்தின் மீது உங்களுக்கு அதிகக் கட்டுப்பாட்டை வழங்கும்.
FASTag மற்றும் NCMC தானியங்கி ரீசார்ஜ்களுக்கு, பற்று வைப்பதற்கு முந்தைய எச்சரிக்கை (Pre-debit alert) தேவையில்லை. AFA இல்லாமல் ஒரு முறை பணம் செலுத்துவதற்கு அதிகபட்சமாக ரூ. 15,000 அனுமதிக்கப்படுகிறது. அதற்கு மேற்பட்ட தொகைகளுக்குச் சரிபார்ப்பு (verification) தேவை. மொபைல் ரீசார்ஜ் அல்லது பிற தானியங்கிப் பணம் செலுத்துதல்களில், அதாவது ரூ. 15,000-க்குக் குறைவான சிறிய தொகைகளை OTP இல்லாமல் செலுத்தலாம். இருப்பினும், முதல் முறைக்குச் சரிபார்ப்பு கட்டாயமாகும். ஒவ்வொரு முறை பணம் செலுத்துவதற்கு முன்போ அல்லது பின்னரோ தகவல்களை வழங்கும் வகையில் இந்த அமைப்பு வடிவமைக்கப்பட்டுள்ளது, இது தற்செயலாகப் பணம் கழிக்கப்படும் அபாயத்தைக் குறைக்கிறது.
எனினும், காப்பீட்டு பிரீமியம், பரஸ்பர நிதி (Mutual Fund) சந்தாக்கள், கடன் அட்டை (Credit Card) கட்டணங்கள் போன்றவற்றுக்கு, இந்த வரம்பு ரூ. 1 லட்சமாக உயர்த்தப்பட்டுள்ளது. இந்தப் புதிய அமைப்பில் வாடிக்கையாளர் பாதுகாப்பிற்கும் அதிக முன்னுரிமை அளிக்கப்பட்டுள்ளது. அங்கீகரிக்கப்படாத பரிவர்த்தனைகளுக்கு ‘பூஜ்ஜியப் பொறுப்பு’ (Zero Liability) கொள்கை நடைமுறையில் இருக்கும். தகராறுகளைத் தீர்ப்பதற்கான ஒரு வழிமுறையும் கட்டாயமாக்கப்பட்டுள்ளது. ‘இ-மேண்டேட்’ (e-mandate) வசதியைப் பயன்படுத்திக்கொள்வதற்கு, எவ்விதக் கூடுதல் கட்டணங்களும் வசூலிக்கப்படக்கூடாது என்றும் ரிசர்வ் வங்கி (RBI) தெளிவுபடுத்தியுள்ளது.
