வீட்டிலோ அல்லது அலுவலகத்திலோ அமரும்போது கால் மேல் கால் போட்டு அமரும் பழக்கம் நம்மில் பலருக்கு உண்டு. இவ்வாறு அமர்வது தற்காலிகமாக வசதியாகத் தோன்றினாலும், நீண்ட நேரம் இதே நிலையில் இருப்பது உடலின் கீழ்ப்பகுதிக்கு அதிக அழுத்தத்தை அளிக்கும். இது மூட்டுகளை, குறிப்பாக முழங்கால், இடுப்பு மற்றும் கணுக்கால் பகுதிகளை மெல்லப் பாதிக்கும் என்று நிபுணர்கள் கூறுகின்றனர்.. மணிக்கணக்கில் கால் மேல் கால் போட்டு அமர்வதால் ஏற்படக்கூடிய முக்கிய உடல்நலப் பிரச்சினைகளை இப்போது பார்ப்போம்.
கடுமையான முழங்கால் வலி : கால்களை மடித்து அமர்வது முழங்கால் மூட்டுகள் மற்றும் அதைச் சுற்றியுள்ள தசைகளின் மீது அதிக அழுத்தத்தை ஏற்படுத்துகிறது. ஏற்கனவே மூட்டுவலி (ஆர்த்ரிடிஸ்) உள்ளவர்களுக்கோ அல்லது கடந்த காலத்தில் முழங்கால் காயம் ஏற்பட்டவர்களுக்கோ இந்தப் பழக்கம் வலியை மேலும் தீவிரமாக்கும் என்று டாக்டர் வருண் தேஜா எச்சரிக்கிறார்.
இடுப்பு மூட்டுகளில் கூடுதல் சுமை : நீண்ட நேரம் கால்களை ஒன்றன் மேல் ஒன்றாகப் போட்டு அமர்வது, முதுகின் கீழ்ப்பகுதியில் உள்ள இடுப்பு மூட்டுகளுக்குக் கடுமையான அழுத்தத்தை அளிக்கிறது. இது உடல் அமைப்பைப் (posture) பாதிப்பதோடு மட்டுமல்லாமல், நீண்ட கால அடிப்படையில் முதுகுவலி மற்றும் மூட்டு வலிக்கும் முக்கிய காரணமாக அமைகிறது.
கால்களில் மரத்துப்போதல் – நரம்பு அழுத்தம் : கால்களை மடிக்கும்போது, அப்பகுதியில் உள்ள ரத்த நாளங்கள் மற்றும் நரம்புகள் மீது அழுத்தம் ஏற்படுகிறது. இது கால்களில் ரத்த ஓட்டத்தை தற்காலிகமாக மந்தமாக்குகிறது. இதன் விளைவாக, கால்கள் மரத்துப்போதல், அசைக்க முடியாமை அல்லது ஊசியால் குத்துவது போன்ற கடுமையான கூச்ச உணர்வு ஏற்படுதல் போன்ற பாதிப்புகள் உண்டாகின்றன என்று மருத்துவர் விளக்குகிறார்.
மூட்டுகளில் இறுக்கம் அதிகரித்தல் : ஏற்கனவே மூட்டுவலி அல்லது வாதம் (rheumatism) போன்ற மூட்டுப் பிரச்சினைகள் உள்ளவர்கள், கால்களை ஒன்றன் மேல் ஒன்றாகப் போட்டு மணிக்கணக்கில் அசையாமல் அமர்ந்திருந்தால், அவர்களின் மூட்டுகள் மேலும் இறுக்கமடைகின்றன. அமரும்போதும் எழுந்திருக்கும்போதும் ஏற்படும் கடுமையான வலியுடன், உடல் நெகிழ்வுத்தன்மையும் (flexibility) வெகுவாகக் குறைகிறது.
எலும்பியல் நிபுணரின் ஆலோசனை : கால் மீது கால் போட்டு அமர்வது தவறல்ல; ஆனால், மணிக்கணக்கில் ஒரே நிலையில் இருப்பது ஆபத்தானது என்று நிபுணர்கள் கூறுகின்றனர்… அலுவலகத்திலோ அல்லது வீட்டிலோ அமர்ந்திருக்கும்போது, ஒவ்வொரு 30 முதல் 40 நிமிடங்களுக்கும் ஒருமுறை உங்கள் கால்களின் நிலையை மாற்றிக்கொள்ள வேண்டும். இடைவேளையில் இருக்கையிலிருந்து எழுந்து ஒரு நிமிடம் கால்களை நீட்டி அசைப்பதோ அல்லது நடப்பதோ ரத்த ஓட்டத்தைச் சீராக்கும். இது மூட்டு வலி ஏற்படும் அபாயத்தைத் தடுக்கும்.
