இன்றைய காலத்தில் பெரும்பாலான வீடுகளில் வாஷிங் மெஷின் அத்தியாவசிய மின் சாதனமாக உள்ளது. இது துணி துவைக்கும் வேலையை மிகவும் எளிதாக்குகிறது. ஆனால், பலரும் செய்யும் ஒரு பொதுவான தவறு என்னவென்றால், ஒரே நேரத்தில் அதிக துணிகளை மெஷினில் நிரப்புவதுதான். நேரம், தண்ணீர், மின்சாரம் மிச்சமாகும் என்று நினைத்து இப்படிச் செய்வார்கள். ஆனால் இது மெஷினுக்கும், துணிகளுக்கும் நல்லதல்ல.
வாஷிங் மெஷினில் அதன் கொள்ளளவை விட அதிக துணிகளை போடும்போது, மோட்டார் அதிக சுமையுடன் வேலை செய்ய வேண்டியிருக்கும். இதனால் மோட்டார், பெல்ட், பேரிங் போன்ற உள் பாகங்கள் விரைவில் சேதமடையலாம். இதன் காரணமாக மெஷினின் ஆயுள் குறைவதோடு, பழுது பார்க்கும் செலவும் அதிகரிக்கும்.
அதிக துணிகள் ஒன்றோடொன்று நெருக்கமாக இருப்பதால் அவை சுதந்திரமாக நகர முடியாது. இதனால் தண்ணீரும், சவர்க்காரமும் அனைத்து துணிகளிலும் சமமாக படராது. இதன் விளைவாக துணிகளில் இருக்கும் அழுக்கு முழுமையாக நீங்காமல் போகலாம். சில நேரங்களில் சவர்க்கார எச்சங்களும் துணிகளில் ஒட்டிக்கொண்டே இருக்கும்.
மெஷினை அளவுக்கு அதிகமாக நிரப்பினால் ஏற்படும் சில பிரச்சினைகள்:
- துணிகளில் உள்ள கறைகள் முழுமையாக நீங்காது.
- சவர்க்கார எச்சம் துணிகளில் தங்கிவிடும்.
- துர்நாற்றம் நீங்காமல் இருக்கலாம்.
- துணிகள் அதிக சுருக்கத்துடன் வெளிவரும்.
- வெள்ளை நிற ஆடைகள் மங்கலாக தோன்றலாம்.
வாஷிங் மெஷினின் கொள்ளளவு என்பது துணிகளின் எண்ணிக்கையை அல்ல, அவற்றின் மொத்த எடையை குறிக்கிறது. பொதுவாக 6 கிலோ மெஷினில் 8 முதல் 10 இலகுரக ஆடைகள், 7 கிலோ மெஷினில் 11 முதல் 13 ஆடைகள், 8 கிலோ மெஷினில் 14 முதல் 16 ஆடைகள் வரை துவைக்கலாம். ஆனால் ஜீன்ஸ், டவல், போர்வை, படுக்கை விரிப்பு போன்ற கனமான துணிகள் அதிக எடை கொண்டவை. எனவே அவற்றை குறைந்த எண்ணிக்கையில் மட்டுமே துவைக்க வேண்டும்.
மெஷினில் சரியான அளவு துணிகள் இருக்கிறதா என்பதை தெரிந்துகொள்ள ஒரு எளிய வழியும் உள்ளது. துணிகளை போட்ட பிறகு, டிரமின் மேல் பகுதியில் உங்கள் கையை எளிதாக நுழைக்க முடிந்தால் அது சரியான அளவு. கையை நுழைக்க முடியாத அளவுக்கு நிரம்பியிருந்தால் துணிகளை குறைக்க வேண்டும்.
ஜீன்ஸ், டவல், போர்வை போன்றவை தண்ணீரை உறிஞ்சிய பிறகு மிகவும் கனமாகிவிடும். அவற்றை இலகுரக துணிகளுடன் சேர்த்து துவைத்தால் மெஷினின் சமநிலை பாதிக்கப்படும். அதிக அதிர்வு ஏற்படுவதுடன், மெஷினுக்கும் சேதம் ஏற்பட வாய்ப்புள்ளது. எனவே கனமான துணிகளை தனியாக துவைப்பது நல்லது.
அதேபோல், அதிக சவர்க்காரம் பயன்படுத்தினால் துணிகள் அதிகமாக சுத்தமாகும் என்பது தவறான நம்பிக்கை. தேவைக்கு அதிகமாக சவர்க்காரம் பயன்படுத்தினால் அதிக நுரை உருவாகும். சவர்க்கார எச்சம் துணிகளில் தங்கும். மெஷினுக்குள் சோப்பு படிவம் உருவாகி துர்நாற்றம் மற்றும் பூஞ்சை பிரச்சினையும் ஏற்படலாம். எனவே உற்பத்தியாளர் பரிந்துரைக்கும் அளவையே பயன்படுத்த வேண்டும்.
வாஷிங் மெஷின் நீண்ட நாட்கள் நன்றாக செயல்பட வேண்டுமெனில் சில பழக்கங்களை கடைப்பிடிக்க வேண்டும். மெஷினை முழுவதுமாக நிரப்பாமல் சுமார் 70 முதல் 80 சதவீதம் வரை மட்டுமே துணிகளை போடுங்கள். துணிகளின் வகைக்கு ஏற்ற வாஷ் மோடை தேர்வு செய்யுங்கள். கனமான மற்றும் இலகுரக துணிகளை தனித்தனியாக துவையுங்கள். துணிகளின் பாக்கெட்டுகளில் நாணயம், சாவி போன்ற பொருட்கள் உள்ளனவா என்று முன்பே சரிபார்க்க வேண்டும். மாதத்திற்கு ஒருமுறை மெஷினை சுத்தம் செய்வதும் அவசியம். துவைத்த பிறகு மெஷின் கதவை சில நேரம் திறந்து வைத்தால் ஈரப்பதம் குறைந்து துர்நாற்றம் வராமல் தடுக்கலாம். லிண்ட் ஃபில்டரை தவறாமல் சுத்தம் செய்ய வேண்டும்.
ஒரே நேரத்தில் அதிக துணிகளை துவைப்பது நேரத்தை மிச்சப்படுத்துவது போல தோன்றினாலும், அது மெஷினின் செயல்திறனையும் ஆயுளையும் பாதிக்கலாம். அதே நேரத்தில் துணிகளும் முழுமையாக சுத்தமாகாது. எனவே மெஷினின் கொள்ளளவுக்கு ஏற்ற அளவில் துணிகளை போட்டு, சரியான அளவு சவர்க்காரம் பயன்படுத்தி துவைத்தால் மெஷினும் நீண்ட நாள் நன்றாக இயங்கும்; துணிகளும் சுத்தமாக இருக்கும்.
