தமிழகத்தில் அரிசியின் விலை தொடர்ந்து அதிகரித்து வருவது, பொதுமக்களுக்கு கூடுதல் சுமையை ஏற்படுத்தியுள்ளது. குறுவை சாகுபடி பாதிக்கப்பட்டுள்ள நிலையில், கர்நாடகா, ஆந்திரா உள்ளிட்ட அண்டை மாநிலங்களிலும் நெல் விளைச்சல் குறைந்துள்ளதாக கூறப்படுகிறது. இதன் தாக்கமாக தமிழக சந்தைக்கு வரும் அரிசியின் வரத்து குறைந்து, பல்வேறு அரிசி ரகங்களின் விலை சுமார் 10 முதல் 30 சதவீதம் வரை உயர்ந்துள்ளது.
சென்னை கோயம்பேடு பகுதியில் உள்ள அரிசி மொத்த வியாபாரிகள் தெரிவிக்கும் தகவலின்படி, தமிழகத்திற்கு தஞ்சாவூர் மட்டுமின்றி ஆந்திரா மற்றும் கர்நாடகா உள்ளிட்ட மாநிலங்களில் இருந்தும் நெல் மற்றும் அரிசி அதிக அளவில் வருகிறது. குறிப்பாக கர்நாடகாவில் விளையும் பொன்னி சன்னரக அரிசிக்கு தமிழகத்தில் அதிக அளவில் வரவேற்பு உள்ளது.
தற்போது கர்நாடகாவில் நெல் விளைச்சல் குறைந்துள்ளதால், அங்குள்ள வியாபாரிகள் ஆந்திரா மற்றும் தஞ்சாவூர் பகுதிகளுக்கு வந்து அதிக அளவில் அரிசியை கொள்முதல் செய்து வருவதாக கூறப்படுகிறது. இதன் காரணமாக தமிழக சந்தையில் அரிசிக்கான தேவை அதிகரித்து, விலையும் உயர்ந்துள்ளது என வியாபாரிகள் தெரிவிக்கின்றனர்.
பொன்னி அரிசி விலை எவ்வளவு உயர்ந்துள்ளது?
விலை உயர்வின் தாக்கம் பொன்னி சன்னரக அரிசியிலும் காணப்படுகிறது. 26 கிலோ பொன்னி சன்னரக அரிசி முன்பு ரூ.1,400-க்கு விற்பனை செய்யப்பட்ட நிலையில், தற்போது அதன் விலை ரூ.1,700 ஆக அதிகரித்துள்ளது.
அதேபோல், 10 கிலோ பாக்கெட் அரிசியின் விலை ரூ.650-ல் இருந்து ரூ.800 ஆகவும், 5 கிலோ அரிசியின் விலை ரூ.350-ல் இருந்து ரூ.420 ஆகவும் உயர்ந்துள்ளது.
கர்நாடகாவில் இருந்து தமிழகத்திற்கு வரும் ஸ்டீம் வகை பொன்னி அரிசியின் விலையும் உயர்ந்துள்ளது. 26 கிலோ ராய்ச்சூர் பொன்னி அரிசி ரூ.1,250-ல் இருந்து ரூ.1,700 ஆக அதிகரித்துள்ளது. இதன் மூலம் இந்த வகை அரிசியில் மட்டும் சுமார் 30 சதவீதம் வரை விலை உயர்வு ஏற்பட்டுள்ளதாக வியாபாரிகள் கூறுகின்றனர்.
பாசுமதி அரிசி விலையும் அதிகரிப்பு:
பாசுமதி அரிசியின் விலையிலும் கணிசமான உயர்வு ஏற்பட்டுள்ளது. 30 கிலோ பாசுமதி அரிசி முன்பு ரூ.2,200 முதல் ரூ.2,300 வரை விற்பனை செய்யப்பட்டு வந்தது. தற்போது அதன் விலை ரூ.2,800 முதல் ரூ.3,000 வரை அதிகரித்துள்ளது.
ஒரு கிலோ பாசுமதி அரிசியின் விலையும் ரூ.70-ல் இருந்து ரூ.85 முதல் ரூ.90 வரை உயர்ந்துள்ளது. இதனால் பாசுமதி அரிசி வாங்கும் நுகர்வோருக்கும் கூடுதல் செலவு ஏற்பட்டுள்ளது.
வீட்டு பட்ஜெட்டில் கூடுதல் சுமை:
அரிசி விலை தொடர்ந்து அதிகரித்து வருவதால், குடும்பங்களின் மாதாந்திர செலவில் கூடுதல் சுமை ஏற்பட்டுள்ளது. அன்றாட உணவில் அரிசி முக்கிய இடம் பெறுவதால், விலை உயர்வு நீடிக்கும் பட்சத்தில் நடுத்தர மற்றும் குறைந்த வருமானம் கொண்ட குடும்பங்கள் அதிகம் பாதிக்கப்படக்கூடும்.
தற்போதைய நிலை நீடித்தாலும், புதிய நெல் வரத்து சந்தையில் அதிகரிக்கும் பட்சத்தில் வரும் டிசம்பர் மாதத்திற்குப் பிறகு அரிசி விலை குறைய வாய்ப்புள்ளதாக கோயம்பேடு அரிசி மொத்த வியாபாரிகள் தெரிவித்துள்ளனர்.
எனவே, வரும் காலங்களில் அரிசியின் விலை எந்த அளவுக்கு மாறும் என்பது நெல் வரத்து மற்றும் அண்டை மாநிலங்களில் நிலவும் விளைச்சலைப் பொறுத்தே அமையும் என வியாபாரிகள் தெரிவித்துள்ளனர்.
