உள்ளங்கை திடீரென அல்லது தொடர்ச்சியாக சிவந்து காணப்படுவதை பலர் சாதாரணமான சரும மாற்றமாக கருதி அலட்சியப்படுத்தி விடுகிறார்கள். ஆனால், ‘பால்மர் எரிதீமா’ (Palmar Erythema) என்று மருத்துவ உலகில் அழைக்கப்படும் இந்த உள்ளங்கை சிவத்தல், உடலின் உட்புறத்தில், குறிப்பாகக் கல்லீரலில் ஏற்படும் நாள்பட்ட பாதிப்புகளின் வெளிப்பாடாக இருக்கலாம் என்று மருத்துவ நிபுணர்கள் எச்சரிக்கின்றனர்.
ஹைதராபாத் யசோதா மருத்துவமனையின் அறுவைசிகிச்சை இரைப்பைக் குடலியல் துறைத் தலைவர் டாக்டர் டி.எல்.வி.டி. பிரசாத் பாபு இது குறித்துக் கூறுகையில், நாள்பட்ட கல்லீரல் பாதிப்பு ஏற்படும்போது உடலின் ஹார்மோன் வளர்சிதை மாற்றம் சீர்குலைகிறது என்று தெரிவிக்கிறார். இதனால் ரத்தத்தில் ஈஸ்ட்ரோஜன் மற்றும் ரத்தநாளங்களை விரிவடையச் செய்யும் வேதிப்பொருட்களின் அளவு அதிகரித்து, உள்ளங்கையின் மேல்மட்டத்தில் உள்ள ரத்தநாளங்கள் விரிவடைந்து சிவந்த நிறம் தோன்றுகிறது. இது கல்லீரல் சுருக்க நோய் (Cirrhosis) மற்றும் ஹெபடைடிஸ் ஆகியவற்றின் முக்கிய அறிகுறியாக இருந்தாலும், உள்ளங்கை சிவப்பதால் மட்டுமே ஒருவருக்குத் தீவிர கல்லீரல் பாதிப்பு உள்ளது என்று முழுமையாக முடிவு செய்துவிட முடியாது என்றும் அவர் கூறுகிறார்.
பொதுவாகக் கர்ப்பகாலம், தைராய்டு கோளாறுகள், கீல்வாதம் மற்றும் சில சருமப் பிரச்சினைகளாலும் உள்ளங்கை சிவக்கக்கூடும். அப்பல்லோ மருத்துவமனையின் பொது மருத்துவ நிபுணர் டாக்டர் சியாமளா அய்யங்கார் இது பற்றிக் கூறுகையில், உள்ளங்கை திடீரென சிவப்பாக மாறுவதுடன், அதிகப்படியான சோர்வு, கண் மற்றும் சருமத்தில் மஞ்சள் காமாலை, அல்லது உடலில் வீக்கம் ஆகியவை சேர்ந்து காணப்பட்டால், அதைச் சாதாரணமானதாக எண்ணாமல் உடனடியாக மருத்துவப் பரிசோதனைக்கு உட்படுத்த வேண்டும் என அறிவுறுத்துகிறார்.
உள்ளங்கை சிவப்பைக் கொண்டு மட்டுமே நோயை உறுதிசெய்ய முடியாது என்பதால், கல்லீரல் செயல்பாடு, தைராய்டு, ரத்த சர்க்கரை அளவு மற்றும் ஆட்டோஇம்யூன் குறிகாட்டிகளுக்கான ரத்தப் பரிசோதனைகள் அவசியமாகின்றன. மேலும், அல்ட்ராசவுண்ட் அல்லது ஃபைப்ரோஸ்கேன் (FibroScan) போன்ற சோதனைகள் மூலம் கல்லீரலின் தற்போதைய ஆரோக்கிய நிலை கண்டறியப்படுகிறது. இப்பாதிப்பு ஆரம்பக் கட்டத்திலேயே கண்டறியப்பட்டால், மதுப் பழக்கத்தைக் கைவிடுதல், ஹெபடைடிஸ் வைரஸ் தடுப்பு சிகிச்சைகள் மற்றும் உணவுமுறை மாற்றங்கள் மூலம் மூலக்காரணத்தைக் குணப்படுத்தி உள்ளங்கையின் சிவப்பைக் குறைக்கவும் கல்லீரலின் செயல்பாட்டை மீட்கவும் முடியும்.
எனவே, உடற்பயிற்சி மூலம் ஆரோக்கியமான உடல் எடையைப் பராமரித்தல், சீரான ஊட்டச்சத்து நிறைந்த உணவுகளை உட்கொள்ளுதல், மதுப் பழக்கத்தைத் தவிர்த்தல் மற்றும் சர்க்கரை நோயைக் கட்டுப்பாட்டில் வைப்பது போன்ற வழிமுறைகள் மூலம் கல்லீரல் ஆரோக்கியத்தைப் பாதுகாக்க முடியும். உடலின் உள்ளங்கையில் தோன்றும் சிறிய மாற்றங்களைக்கூட அலட்சியப்படுத்தாமல், உரிய நேரத்தில் மருத்துவ ஆலோசனை பெறுவது கடுமையான கல்லீரல் பாதிப்புகளிலிருந்து நம்மைப் பாதுகாக்கும்.
