குக்கர் வெடிக்க இதுதான் காரணமா?… பயன்படுத்தும் முன் இந்த விஷயங்களை தெரிஞ்சுக்கோங்க!

அன்றாட சமையலை வேகமாக முடிக்க உதவும் சாதனங்களில் பிரஷர் குக்கருக்கு முக்கிய இடம் உண்டு. சில நிமிடங்களில் உணவை சமைத்துவிடலாம் என்பதால் பெரும்பாலான வீடுகளில் இது தவிர்க்க முடியாத ஒன்றாகிவிட்டது. ஆனால், அவசரத்தில் குக்கரை சரியாகப் பயன்படுத்தாமல் இருப்பது ஆபத்தான விளைவுகளை ஏற்படுத்தலாம். குறிப்பாக அழுத்தம் மற்றும் அதிக வெப்பத்தில் இயங்குவதால், சிறிய கவனக்குறைவுகூட விபத்துக்கு வழிவகுக்கும். அதனால், குக்கரை பயன்படுத்தும் ஒவ்வொரு முறையும் சில அடிப்படை விஷயங்களை கவனிப்பது அவசியம்.

மூடியை திறப்பதில் அவசரம் வேண்டாம்

சமையல் முடிந்ததும் விசில் நின்றுவிட்டது என்பதற்காக உடனடியாக மூடியைத் திறக்கக்கூடாது. குக்கருக்குள் இருக்கும் அழுத்தம் முழுமையாகக் குறைந்த பிறகே திறக்க வேண்டும். அழுத்தம் இருக்கும்போது மூடியை வலுக்கட்டாயமாகத் திறந்தால், கொதிக்கும் உணவு அல்லது நீராவி வெளியேறி தீக்காயத்தை ஏற்படுத்தலாம்.

குக்கரை நிரப்பும்போது கவனம்

குக்கரில் உணவை அளவுக்கு அதிகமாக நிரப்புவது பாதுகாப்பானதல்ல. பொதுவாக, அதன் மொத்த கொள்ளளவில் மூன்றில் இரண்டு பங்குக்கு மேல் நிரப்பாமல் இருப்பது அவசியம். அரிசி, பருப்பு, பாஸ்தா போன்ற சமைக்கும்போது அளவு அதிகரிக்கும் உணவுகளுக்கு இன்னும் குறைவாகவே நிரப்ப வேண்டும். இல்லையெனில் உணவுத் துகள்கள் வென்ட் பகுதியில் சிக்கி நீராவி வெளியேறுவதைத் தடுக்கலாம்.

தண்ணீர் இல்லாமல் சமைக்காதீர்கள்

குக்கரில் போதுமான திரவம் இல்லாமல் உணவை சமைப்பது ஆபத்தை ஏற்படுத்தும். தண்ணீர் முழுவதும் வற்றிவிட்டால் குக்கர் அதிகமாக சூடாகி அதன் பாகங்கள் சேதமடையலாம். எனவே, சமைக்கும் உணவுக்கு ஏற்ப தேவையான அளவு தண்ணீர் அல்லது திரவத்தை சேர்க்க வேண்டும்.

விசில் மற்றும் வென்ட் பகுதியை சரிபார்க்கவும்

குக்கரின் வென்ட் பைப்பில் உணவுத் துகள்கள் அடைத்துள்ளதா என்பதை அவ்வப்போது பரிசோதிக்க வேண்டும். அடைப்பு இருந்தால் அழுத்தம் சரியாக வெளியேறாமல் போகலாம். விசில் பகுதியையும் ஒவ்வொரு பயன்பாட்டிற்குப் பிறகும் சுத்தம் செய்வது நல்லது.

ரப்பர் கேஸ்கெட்டை அலட்சியம் செய்யாதீர்கள்

மூடியில் இருக்கும் கேஸ்கெட் நீராவி கசிவைத் தடுக்க உதவும் முக்கியமான பகுதி. அது கெட்டியாகிவிட்டாலோ, விரிசல் ஏற்பட்டாலோ அல்லது சேதமடைந்தாலோ தொடர்ந்து பயன்படுத்தாமல் மாற்ற வேண்டும். கேஸ்கெட் சரியாகப் பொருந்துகிறதா என்பதையும் கவனிக்க வேண்டும்.

பாதுகாப்பு வால்வை கவனியுங்கள்

குக்கரில் உள்ள பாதுகாப்பு வால்வு அவசர நேரத்தில் முக்கிய பங்கு வகிக்கிறது. அது பழுதடைந்திருந்தால் அல்லது சேதமடைந்திருந்தால், குக்கரை பயன்படுத்தாமல் உரிய உதிரிபாகத்தைக் கொண்டு மாற்றுவது அவசியம்.

கைப்பிடி தளர்ந்திருந்தால் பயன்படுத்தாதீர்கள்

குக்கரின் கைப்பிடி உடைந்திருந்தாலோ, மூடி சரியாக லாக் ஆகாவிட்டாலோ அதை பயன்படுத்துவது ஆபத்தானது. சிறிய சேதம் என்றாலும் அதை அலட்சியப்படுத்தாமல் சரிசெய்த பிறகே பயன்படுத்த வேண்டும்.

காலியான குக்கரை சூடாக்க வேண்டாம்

உணவு அல்லது தண்ணீர் இல்லாமல் குக்கரை அடுப்பில் வைத்து சூடாக்குவது அதன் அடிப்பகுதி மற்றும் பிற பாகங்களை சேதப்படுத்தலாம். எனவே, காலி குக்கரை ஒருபோதும் அடுப்பில் வைக்கக்கூடாது.

அதிக தீயில் தொடர்ந்து வைக்க வேண்டாம்

தேவையான அழுத்தம் உருவான பிறகு, உற்பத்தியாளர் கூறிய வழிமுறைக்கு ஏற்ப தீயை குறைத்து சமைப்பது நல்லது. தொடர்ந்து அதிக தீயில் வைத்திருப்பதால் உணவு கருகுவதுடன், குக்கருக்கும் தேவையற்ற அழுத்தம் ஏற்படலாம்.

Deep Fry செய்ய குக்கரை பயன்படுத்தாதீர்கள்

பிரஷர் குக்கர் அழுத்தத்தில் சமைப்பதற்காக வடிவமைக்கப்பட்டது. அதிக அளவு எண்ணெய் வைத்து பொரிப்பதற்கு அதை பயன்படுத்துவது பாதுகாப்பான நடைமுறை அல்ல.

சேதமடைந்த குக்கரை உடனே மாற்றுங்கள்

குக்கரின் அடிப்பகுதி வளைந்திருந்தால், ஆழமான கீறல்கள் இருந்தால் அல்லது மூடி சரியாகப் பொருந்தவில்லை என்றால் தொடர்ந்து பயன்படுத்துவதை தவிர்க்க வேண்டும். தேவையானால் உற்பத்தியாளர் பரிந்துரைக்கும் முறையில் பழுதுபார்க்கவோ அல்லது புதிய குக்கரை பயன்படுத்தவோ வேண்டும்.

சுத்தம் செய்வதும் முக்கியம்

ஒவ்வொரு பயன்பாட்டிற்குப் பிறகும் மூடி, கேஸ்கெட், விசில், வென்ட் பைப் மற்றும் குக்கரின் உட்பகுதியை நன்றாக சுத்தம் செய்ய வேண்டும். உணவுத் துகள்கள் தேங்காமல் இருப்பதை உறுதி செய்வது அடுத்தடுத்த பயன்பாட்டில் சிக்கல்களைத் தவிர்க்க உதவும்.

மேலும், அனைத்து பிரஷர் குக்கர்களும் ஒரே மாதிரியான வடிவமைப்பில் இருப்பதில்லை. எனவே, உங்கள் குக்கருடன் வழங்கப்பட்டுள்ள பயனர் கையேட்டில் கூறப்பட்டுள்ள நிரப்பும் அளவு, பயன்படுத்தும் முறை, சுத்தம் செய்தல் மற்றும் உதிரிபாகங்களை மாற்றுவது தொடர்பான வழிமுறைகளைப் பின்பற்றுவது மிகவும் முக்கியம்.

சமையலை வேகமாக்கும் பிரஷர் குக்கர், பாதுகாப்பாக பயன்படுத்தும்போதுதான் உண்மையில் பயனுள்ளதாக இருக்கும். ஒவ்வொரு முறையும் பயன்படுத்துவதற்கு முன் குக்கரின் நிலையை ஒருமுறை சரிபார்ப்பதை வழக்கமாக்கிக் கொள்ளுங்கள்.

Also Read: கடையில் கிடைக்கும் டீ போல வீட்டிலும் சுவையான டீ வேண்டுமா?… இதை மட்டும் செய்யுங்க!