கணவன்-மனைவி உறவில் கருத்து வேறுபாடுகள் வருவது இயல்பானதுதான். ஆனால், சின்ன விஷயங்களுக்குக்கூட அடிக்கடி சண்டை ஏற்பட்டு, அது நீண்ட நேரம் நீடித்தால் உறவில் மன அழுத்தம் அதிகரிக்கலாம். இதுபோன்ற சூழலில் பிரச்சினைக்கான காரணத்தை மட்டும் தேடுவதற்குப் பதிலாக, ஒருவருக்கொருவர் பேசும் விதத்தை மாற்றுவது நல்ல மாற்றத்தை ஏற்படுத்தக்கூடும். குறிப்பாக கோபமாக இருக்கும் நேரத்தில் உடனடியாக பதில் சொல்லாமல், சிறிது நேரம் அமைதியாக இருப்பது முக்கியம்.
கோபத்தில் பேசப்படும் வார்த்தைகள் பின்னர் வருத்தத்தை ஏற்படுத்துவதோடு, தேவையில்லாத பிரச்சினையையும் பெரிதாக்கலாம். அதேபோல், துணைவர் பேசும்போது இடையில் குறுக்கிடாமல் முழுமையாகக் கேட்பது உறவில் புரிதலை அதிகரிக்க உதவும். “நீ எப்போதுமே இப்படித்தான்” என்று குற்றம் சாட்டுவதற்குப் பதிலாக, “இந்த விஷயம் எனக்கு வருத்தமாக இருந்தது” என்று உங்கள் உணர்வை வெளிப்படுத்துவது உரையாடலை சுமுகமாக்கும்.
பணம், குழந்தைகள், வீட்டு வேலை, குடும்ப உறுப்பினர்கள் போன்ற விஷயங்கள் பல தம்பதிகளிடையே கருத்து வேறுபாட்டை ஏற்படுத்தலாம். இதுபோன்ற விஷயங்களை சண்டையின் நடுவில் பேசாமல், இருவரும் அமைதியாக இருக்கும் நேரத்தில் பேசுவது நல்லது. மேலும், தினசரி பரபரப்பான வாழ்க்கையிலும் ஒருவருக்கொருவர் நேரம் ஒதுக்குவது முக்கியம். ஒன்றாக சாப்பிடுவது, சிறிது நேரம் பேசுவது அல்லது நாளில் நடந்த விஷயங்களை பகிர்ந்து கொள்வது போன்ற சின்ன விஷயங்கள்கூட உறவில் நெருக்கத்தை அதிகரிக்க உதவும்.
சண்டையே வரக்கூடாது என்பதல்ல; சண்டை வந்தாலும் ஒருவரை ஒருவர் காயப்படுத்தாமல் பிரச்சினையைத் தீர்க்க கற்றுக்கொள்வதுதான் ஆரோக்கியமான உறவுக்கு முக்கியம்.
Also Read: ஹோட்டல் சுவையில் குஸ்கா.. வீட்டிலேயே கமகமன்னு செய்வது எப்படி?
