தமிழகத்தில் ஆங்கிலேயர் ஆட்சிக் காலத்தில் அறிமுகப்படுத்தப்பட்டு பல தலைமுறைகளாக நடைமுறையில் இருந்து வந்த நிலவரி வசூலிக்கும் முறை, நடப்பு 1436-ஆம் பசலி ஆண்டு முதல் முழுமையாக ரத்து செய்யப்படுவதாக சட்டப்பேரவையில் வருவாய்த்துறை அமைச்சர் கே.ஏ. செங்கோட்டையன் அறிவிப்பை வெளியிட்டுள்ளார். இந்த அதிரடி முடிவின் மூலம் மாநிலம் முழுவதும் உள்ள லட்சக்கணக்கான விவசாயிகள் மற்றும் நில உரிமையாளர்கள் நீண்டகால வரிச் சுமையிலிருந்தும், வருவாய்த் துறையின் தேவையற்ற நிர்வாக நடைமுறைகளிலிருந்தும் முழு விடுதலை பெறுகின்றனர்.
சட்டப்பேரவையில் வருவாய்த்துறை மானியக் கோரிக்கை மீதான விவாதத்தின்போது பேசிய அமைச்சர், விவசாயிகளின் நலனைக் காப்பதிலும், நில உரிமையாளர்களின் சுமைகளைக் குறைப்பதிலும் அரசு எப்போதும் முன்னுரிமை அளித்து வருவதாக தெரிவித்தார்.
பசலி ஆண்டு என்றால் என்ன?
முகலாயப் பேரரசர் அக்பர் காலத்தில் நில வருவாய் கணக்கீட்டிற்காக தொடங்கப்பட்ட சூரிய நாட்காட்டி அடிப்படையிலான முறையே ‘பசலி ஆண்டு’ (Fasli Year) எனப்படுகிறது. தமிழக வருவாய்த் துறையில் ஜூலை 1 முதல் அடுத்த ஆண்டு ஜூன் 30 வரையிலான 12 மாதங்கள் ஒரு பசலி ஆண்டாக கணக்கிடப்படுகிறது. அந்த வகையில் நடப்பு ஆண்டு 1436-ஆம் பசலி ஆண்டாக குறிக்கப்படுகிறது.
ஆங்கிலேயர் கால நிலவரி முறை (ரயத்துவாரி):
பிரிட்டிஷ் கிழக்கிந்திய கம்பெனி ஆட்சியில் சர் தாமஸ் மன்றோ உள்ளிட்டோரால் அறிமுகப்படுத்தப்பட்ட ரயத்துவாரி முறையின் கீழ், நிலத்தின் தரம் (நன்செய், புன்செய், நத்தம், மானாவாரி) மற்றும் பாசன வசதிக்கேற்ப அரசால் நிலவரி (தீர்வை) விதிக்கப்பட்டு கிராம நிர்வாக அலுவலர் (VAO) மூலம் ஆண்டிற்கு ஒருமுறை வசூலிக்கப்பட்டு வந்தது.
விவசாயிகளுக்குக் கிடைக்கும் நன்மைகள் :
* ஆண்டுதோறும் கிராம நிர்வாக அலுவலகங்களுக்குச் சென்று வரி செலுத்தி ரசீது வாங்கும் கட்டாயம் தவிர்க்கப்படுகிறது.
* வறட்சி, வெள்ளம் போன்ற இயற்கை பேரிடர் காலங்களிலும் வரி பாக்கி மற்றும் நிலுவைத் தொகை என்ற சுமை விவசாயிகளை வாட்டாது.
* பட்டா மாறுதல், நில அளவீடு போன்ற வருவாய்த்துறைச் சேவைகளில் நிலவரி பாக்கி தொடர்பான சான்றிதழ் தாமதங்கள் முழுமையாக குறையும்.
Read More : உதயநிதிக்கு கண்ணியத்தை கற்றுக் கொடுங்க..!! அமைச்சர் ரமேஷ் காட்டம்..!! மன்னிப்புக் கேட்ட முதல்வர் விஜய்..!!
