நடப்பு பருவத்தில் சர்க்கரை உற்பத்தியானது ஆரம்ப மதிப்பீட்டை விட சுமார் 11 சதவீதம் வரை குறையக்கூடும் என்று மத்திய அரசு தெரிவித்துள்ளது. கரும்பை தாக்கும் நோய்கள் மற்றும் அதிகப்படியான மழையால் ஏற்பட்ட பயிர் சேதம் காரணமாக, உற்பத்தி 343 லட்சம் மெட்ரிக் டன்னிலிருந்து 306 லட்சம் மெட்ரிக் டன்னாக குறையும் என எதிர்பார்க்கப்படுகிறது.
கடந்த சில வாரங்களாக கிலோ ரூ.48.18-ஆக இருந்த சர்க்கரை விலை ரூ.55.70 ஆக உயர்ந்துள்ளது. உற்பத்தி குறைவு, பண்டிகைக் கால தேவை அதிகரிப்பு, சர்வதேச அளவில் விலை உயர்வு மற்றும் சிலரின் பதுக்கல் நடவடிக்கைகள் போன்ற காரணங்களால் விலை அதிகரித்துள்ளதாக அரசு தெரிவித்துள்ளது. எத்தனால் உற்பத்திக்கும் சர்க்கரை விலை உயர்வுக்கும் எந்தத் தொடர்பும் இல்லை என்றும் அரசு தெளிவுபடுத்தியுள்ளது.
சர்க்கரை விலையைக் கட்டுப்படுத்தவும் பதுக்கலைத் தடுக்கவும் அரசு பல்வேறு அதிரடி நடவடிக்கைகளை எடுத்துள்ளது. இதன்படி, நாடு முழுவதும் உள்ள சர்க்கரை வியாபாரிகளுக்கு 400 டன்கள் வரை மட்டுமே இருப்பு வரம்பு விதிக்கப்பட்டுள்ளதுடன், செப்டம்பர் 1 முதல் மொத்த நுகர்வோர் 15 நாட்களுக்கு மேல் சர்க்கரை இருப்பு வைத்திருக்க தடை விதிக்கப்பட்டுள்ளது.
பதுக்கலைக் கண்டறிய மத்திய மற்றும் மாநில அரசு அதிகாரிகள் அடங்கிய கூட்டுக்குழுவினர் ஆலைகளில் நேரடி ஆய்வு மேற்கொண்டு வருகின்றனர். மேலும், உள்நாட்டுத் தேவையைப் பூர்த்தி செய்யும் வகையில் 10 லட்சம் மெட்ரிக் டன் பச்சை சர்க்கரையை வரி இல்லாமல் இறக்குமதி செய்யவும், அக்டோபர் 15 முதல் கரும்பு அரவையை தொடங்கவும் அரசு அனுமதி அளித்துள்ளது.
விவசாயிகளின் நலன் மற்றும் நுகர்வோரின் நலன் இரண்டையும் பாதுகாப்பதில் அரசு தீவிரமாக செயல்பட்டு வருகிறது. பண்டிகைக் காலத் தேவைகளைப் பூர்த்தி செய்ய நாட்டில் போதுமான சர்க்கரை இருப்பு உள்ளதாகவும், சந்தை நிலவரங்கள் தொடர்ந்து கண்காணிக்கப்பட்டு வருவதாகவும் அரசு உறுதியளித்துள்ளது.
முன்னெச்சரிக்கை நடவடிக்கையாக, உள்நாட்டு இருப்பை மேலும் அதிகரிக்க 10 லட்சம் மெட்ரிக் டன் கச்சா சர்க்கரையை வரி இல்லாமல் இறக்குமதி செய்ய அரசு முடிவு செய்துள்ளது. மாநிலங்களும் சர்க்கரை ஆலைகளும் அக்டோபர் 15, 2026 முதல் கரும்பு அரவைப்பணியைத் தொடங்க அறிவுறுத்தப்பட்டுள்ளன. இதன் மூலம், அக்டோபர் மாத சர்க்கரை உற்பத்தி வழக்கமான 3-4 லட்சம் மெட்ரிக் டன்களிலிருந்து 10 லட்சம் மெட்ரிக் டன்களுக்கும் அதிகமாக உயரும் என்றும், பண்டிகைக் காலத்தில் சர்க்கரை கிடைப்பது மேலும் மேம்படும் என்றும் எதிர்பார்க்கப்படுகிறது.
