தினமும் குளிக்கணுமா? தினமும் குளிப்பதால் சருமத்திற்கு என்ன நடக்கும் தெரியுமா?

வெயில், தூசி, மாசு மற்றும் அதிக வியர்வை போன்ற காரணங்களால் உடலை சுத்தமாக வைத்திருப்பது அவசியமாகிறது. ஆனால், அனைவரும் தினமும் குளிக்க வேண்டுமா? என்ற கேள்விக்கு ஒரே பதில் இல்லை. ஒருவரின் உடல் செயல்பாடு, காலநிலை, வியர்வையின் அளவு மற்றும் சருமத்தின் தன்மையைப் பொறுத்து குளிக்கும் முறையை மாற்றிக்கொள்ளலாம்.

Cleveland Clinic-ன் தோல் மருத்துவர் டாக்டர் ஷில்பி கெதர்பால் கூறுகையில், பொதுவாக தினமும் ஒருமுறை குளிப்பது நல்ல பழக்கமாக இருந்தாலும், அது அனைவருக்கும் கட்டாயமான விதி அல்ல. ஒருவர் அதிகமாக உடற்பயிற்சி செய்கிறாரா, அதிகம் வியர்க்கிறாரா, வெப்பமான அல்லது ஈரப்பதம் அதிகம் உள்ள பகுதியில் வசிக்கிறாரா என்பதையும் கருத்தில் கொள்ள வேண்டும்.

உதாரணமாக, உடற்பயிற்சி அல்லது கடுமையான உடல் உழைப்புக்குப் பிறகு உடலில் அதிகமாக வியர்வை ஏற்பட்டிருந்தால் குளிப்பது அவசியமாக இருக்கலாம். அதேபோல், வெயில் அதிகமாக இருக்கும் நாட்களில் வழக்கத்தைவிட அதிகமாக குளிக்க வேண்டிய தேவை சிலருக்கு ஏற்படலாம். மறுபுறம், உடல் செயல்பாடு குறைவாக இருக்கும் நாட்களில் குளிக்கும் முறையை அதற்கேற்ப மாற்றிக்கொள்ளலாம்.

ஆனால் அடிக்கடி குளிப்பது என்றாலே சருமத்திற்கு நல்லது என்று அர்த்தமில்லை. குறிப்பாக அதிக சூடான தண்ணீரில் நீண்ட நேரம் குளிப்பது சருமத்தில் உள்ள இயற்கையான ஈரப்பதத்தை குறைத்து, வறட்சி மற்றும் அரிப்பை ஏற்படுத்தலாம். எனவே, மிகவும் சூடான தண்ணீரைத் தவிர்த்து, மிதமான சூட்டில் இருக்கும் தண்ணீரை பயன்படுத்துவது நல்லது.

குளிக்கும் நேரத்தையும் குறைவாக வைத்துக்கொள்வது சருமத்திற்கு உதவும். Cleveland Clinic பரிந்துரைப்படி, குளிப்பதை சுமார் 5 நிமிடங்களுக்குள் முடிப்பது சருமம் அதிகமாக வறண்டு போவதைத் தவிர்க்க உதவும்.

சோப்பை தேர்வு செய்வதிலும் கவனம் தேவை. அதிக வாசனை கொண்ட அல்லது சருமத்தை உலரச் செய்யக்கூடிய கடுமையான சோப்புகளை தவிர்த்து, மென்மையான கிளென்சர்களை பயன்படுத்தலாம். குறிப்பாக சென்சிட்டிவ் அல்லது வறண்ட சருமம் உள்ளவர்கள் உடல் முழுவதும் தினமும் சோப்பு பயன்படுத்த வேண்டிய அவசியமில்லை. முகம், அக்குள் மற்றும் இடுப்புப் பகுதிகள் போன்ற அதிகமாக வியர்வை மற்றும் துர்நாற்றம் ஏற்படும் பகுதிகளை சுத்தமாக வைத்திருப்பதில் கவனம் செலுத்தலாம்.

குளித்த பிறகு உடலை துணியால் வேகமாக தேய்த்து உலர்த்துவதற்குப் பதிலாக, மெதுவாக ஒத்தி உலர்த்துவது நல்லது. அதன்பிறகு சில நிமிடங்களுக்குள் வாசனை இல்லாத மாய்ஸ்சரைசரை பயன்படுத்தினால் சருமத்தில் ஈரப்பதத்தை தக்கவைக்க உதவும்.

முடியை தினமும் குளிப்பதற்காக கட்டாயம் ஷாம்பு செய்ய வேண்டியதில்லை. முடியின் தன்மை மற்றும் எண்ணெய்ப்பசையைப் பொறுத்து ஷாம்பு பயன்படுத்தும் இடைவெளியை மாற்றிக்கொள்ளலாம்.

முகத்தைப் பொறுத்தவரை, பெரும்பாலானவர்களுக்கு காலை மற்றும் இரவு என தினமும் இரண்டு முறை சுத்தம் செய்வது பரிந்துரைக்கப்படுகிறது. எண்ணெய்ப்பசை அல்லது முகப்பரு அதிகம் உள்ளவர்கள் உடற்பயிற்சிக்குப் பிறகும் முகத்தை சுத்தம் செய்ய வேண்டியிருக்கலாம். வறண்ட அல்லது சென்சிட்டிவ் சருமம் உள்ளவர்கள் மென்மையான முறையைப் பின்பற்றுவது நல்லது.

அதேநேரத்தில், தினமும் குளிப்பதை முழுமையாக தவிர்ப்பதும் சரியான அணுகுமுறை அல்ல. தினசரி குளிப்பது உடலில் படிந்துள்ள அழுக்கு மற்றும் வெளிப்புற ஒவ்வாமை ஏற்படுத்தக்கூடிய பொருட்களை அகற்ற உதவும் என தோல் நிபுணர்கள் தெரிவிக்கின்றனர். எனவே, குளிப்பதை எவ்வளவு அடிக்கடி செய்கிறோம் என்பதுடன், எப்படி குளிக்கிறோம் என்பதும் முக்கியம்.

எனவே, தினமும் குளிப்பது அனைவருக்கும் ஒரே மாதிரியான கட்டாய விதி அல்ல என்றாலும், உடலை சுத்தமாக வைத்திருப்பது முக்கியம். உங்கள் உடல் செயல்பாடு, காலநிலை மற்றும் சருமத்தின் தன்மைக்கு ஏற்ப குளிக்கும் முறையை அமைத்துக்கொள்ளலாம். அதிக சூடான தண்ணீர், நீண்ட நேர குளியல் மற்றும் கடுமையான சோப்புகளை தவிர்ப்பதன் மூலம் சருமத்தின் இயற்கையான பாதுகாப்பு அடுக்கை பாதுகாக்க முடியும். தொடர்ந்து சருமத்தில் வறட்சி, அரிப்பு, வெடிப்பு அல்லது எரிச்சல் இருந்தால் தோல் மருத்துவரை அணுகுவது நல்லது.

Also Read: குழந்தைகள் வெளியில் அடம்பிடிக்கிறார்களா? பெற்றோர்கள் கட்டாயம் தெரிந்துகொள்ள வேண்டிய 5 எளிய வழிகள்!