டோக்கியோ பகுதி உட்பட கிழக்கு ஜப்பானில் இன்று (ஞாயிற்றுக்கிழமை) அதிகாலையில் 5.9 ரிக்டர் அளவிலான மிதமான நிலநடுக்கம் ஏற்பட்டது. இதனால் குறைந்தது 23 பேர் காயமடைந்ததாக அதிகாரிகள் தெரிவித்தனர். இந்த நிலநடுக்கத்தால் சுனாமி ஆபத்து எதுவும் இல்லை.
ஜப்பான் வானிலை ஆய்வு மையத்தின் தகவல்படியும், இபாராகி மாகாணத்தின் தெற்குப் பகுதியில் 70 கி.மீ ஆழத்தில் இந்த நிலநடுக்கம் மையம் கொண்டிருந்தது. அடிக்கடி நிலநடுக்கங்கள் ஏற்படும் இப்பகுதியின் அளவை அமெரிக்க புவியியல் ஆய்வு மையம் 5.8 எனப் பதிவு செய்தது.
நான்கு மாகாணங்களைச் சேர்ந்த 23 பேர் காயமடைந்தனர். இதில் சைதாமாவில் 9 பேரும், கனாகவாவில் 9 பேரும், சிபாவில் 4 பேரும், இபாராகியில் ஒருவரும் அடங்குவர். தூங்கிக் கொண்டிருந்தபோது ஏற்பட்ட நிலநடுக்கத்தால் திடுக்கிட்டு எழுந்து கீழே விழுந்தும், தளவாடப் பொருட்கள் மீது மோதியும் பெரும்பாலானோர் காயமடைந்தனர். யோக்கோகாமாவில் படுக்கையிலிருந்து கீழே விழுந்து இடுப்பில் பலத்த காயமடைந்த 80 வயது மூதாட்டியும் இதில் அடங்குவார்.
இந்த நிலநடுக்கம் டோக்கியோவை உலுக்கியதுடன், மொபைல் போன்களில் அவசரகால எச்சரிக்கைகளையும் ஏற்படுத்தியது. மிடோ மற்றும் சைதாமா நகரங்களில் சாலைப் போக்குவரத்து வழக்கம்போல் இயங்கியதாக என்.எச்.கே தொலைக்காட்சி காட்டியது. சேதங்களை மதிப்பிடுவதற்காக அரசாங்கம் ஒரு குழுவை அமைத்துள்ளதாக பிரதமர் சானே தகாய்ச்சி எக்ஸ் தளத்தில் தெரிவித்தார்.
டோக்கியோ மற்றும் நாரிதா விமான நிலையத்திற்கான விரைவு ரயில்களும், வடகிழக்கு பகுதி ரயில்களும் தாமதமாகின. எனினும், ஷின்கன்சென் புல்லட் ரயில்கள் வழக்கம்போல் இயங்கின என்று கிழக்கு ஜப்பான் ரயில்வே கம்பெனி தெரிவித்தது.
டோக்கியோவின் கோட்டோ வார்டில் நிலத்தடி குடிநீர் குழாய் வெடித்து சாலையில் தண்ணீர் பெருக்கெடுத்தது. பின்னர் அந்த குழாய் பழுதுபார்க்கப்பட்டு கசிவு தடுத்து நிறுத்தப்பட்டது. மேலும், டோக்கியோவில் சுமார் 460 வீடுகளில் ஏற்பட்ட மின்தடை ஞாயிற்றுக்கிழமை காலைக்குள் சீரமைக்கப்பட்டது.
அணுமின் நிலையங்கள் மற்றும் அணுசக்திப் பொருட்கள் கையாளப்படும் பிற வசதிகளில் எந்தவிதமான அசாதாரணமான பாதிப்புகளும் பதிவாகவில்லை என்று அணுசக்தி ஒழுங்குமுறை ஆணையம் தெரிவித்துள்ளது.அதிகாரிகள் தொடர்ந்து சேத விவரங்களை மதிப்பிட்டு வருகின்றனர்.
கடந்த மாதம் ஜப்பானின் கியூஷு தீவின் குமாமொட்டோ பகுதியில் தாக்கிய 7.1 ரிக்டர் அளவிலான நிலநடுக்கத்தில் 38 பேர் உயிரிழந்தனர் மற்றும் 364 பேர் காயமடைந்தனர். மேலும் 1,500-க்கும் மேற்பட்ட கட்டிடங்கள் தரைமட்டமானதுடன், கிட்டத்தட்ட 20,000 கட்டிடங்கள் சேதமடைந்தன.
