ChatGPT-ஐ உருவாக்கிய ஓபன்ஏஐ நிறுவனம், ஏஐ சாட்போட்டில் புதிய கஸ்டம் ஸ்டிக்கர் அம்சத்தை அறிமுகப்படுத்தியுள்ளது. இதன் மூலம் சாதாரண புகைப்படங்கள், ஐடியாக்கள் அல்லது ஜோக்குகளை உங்களது தனிப்பட்ட ஸ்டிக்கர்களாக எளிதாக மாற்றிக்கொள்ளலாம். ChatGPT Images மூலம் இயக்கப்படும் இந்த புதிய அம்சம், வலைதளம் (Web), ஆண்ட்ராய்டு (Android) மற்றும் ஐஓஎஸ் (iOS) உள்ளிட்ட அனைத்து தளங்களிலும் கிடைக்கவுள்ளது.
ChatGPT ஸ்டிக்கர்ஸ்: இதன் சிறப்பம்சம் என்ன?
இதன் மிகப்பெரிய பிளஸ் என்னவென்றால், நீங்கள் இனி ஏற்கனவே தயாராக இருக்கும் ஸ்டிக்கர் பேக்குகளை மட்டுமே பயன்படுத்த வேண்டும் என்ற அவசியமில்லை. உதாரணமாக, உங்கள் நாயின் புகைப்படத்தை அனிமேஷன் ஸ்டிக்கராக மாற்றலாம்.
அல்லது வாட்ஸ்அப் குழுக்களில் பயன்படுத்துவதற்கான ரியாக்ஷன் ஸ்டிக்கர் போன்றவற்றை உங்களது சொந்த வர்ணனையோடு உருவாக்கலாம். இந்த ஸ்டிக்கர்கள் வெளிப்படையான பின்னணியைக் கொண்டுள்ளதால், வாட்ஸ்அப் மற்றும் ஐமெசேஜ் போன்ற மெசேஜிங் செயலிகளில் தடையின்றி பயன்படுத்த முடியும்.
ChatGPT Images இதன் எடிட்டிங் வேலைகளை கவனித்துக்கொள்வதால், உதாரணமாக “எனது பூனை போட்டோவை எடுத்து, அது தூங்குவது போலவும், அதில் ‘Not today!’ என்று ஸ்டைலாக எழுத்து இருப்பது போலவும் ஒரு ஸ்டிக்கர் செய்து கொடு” என்று நீங்கள் கட்டளையிட்டால், ChatGPT-யே அந்த எடிட்டிங் வேலைகள் அனைத்தையும் செய்து ஒரு ஸ்டிக்கரைத் தயாரித்துக் கொடுத்துவிடும்.
யார் இதைப் பயன்படுத்தலாம்?
ChatGPT Images வசதி உள்ள அனைவரும் இந்த ஸ்டிக்கர் அம்சத்தைப் பயன்படுத்தலாம். ஓபன்ஏஐ கூற்றுப்படி, Images 2.0 அனைத்து பயனர்களுக்கும் கிடைக்கிறது, அதே நேரத்தில் மேம்பட்ட டூல்ஸ் Plus, Pro மற்றும் Business பயனர்களுக்கு வழங்கப்பட்டு வருகிறது. சில கணக்குகளில் இந்த அம்சம் படிப்படியாக வெளியிடப்பட்டு வருகிறது.
ChatGPT ஸ்டிக்கர்களைப் பயன்படுத்துவது எப்படி?
ஸ்டிக்கர் உருவாக்குவதற்கான வழிமுறைகள்:
உங்கள் சாதனத்தில் (Android, iOS அல்லது Web) ChatGPT-ஐத் திறக்கவும்.
சைட் பாரில் உள்ள ‘Images’ பகுதிக்குச் செல்லவும்.
Stickers’ என்பதைத் தட்டவும்
ஒரு புகைப்படத்தைப் பதிவேற்றவும் அல்லது புதிய போட்டோ ஸ்டிக்கருக்கான உங்கள் யோசனையை டைப் செய்யவும்.
பின்னணி வெளிப்படையாக இருக்க வேண்டும் (PNG வடிவம்) எனில், ChatGPT-யிடம் கேட்கலாம், அது உடனே செய்து தரும்.
கதாபாத்திரத்தின் வெளிப்பாட்டை மாற்றுவது, டெக்ஸ்ட் சேர்ப்பது மற்றும் பாணியை மாற்றுவது போன்ற திருத்தங்களைச் செய்து கொள்ளலாம்.
சேமித்து எங்கு வேண்டுமானாலும் பகிர்ந்து கொள்ளலாம்.
ரியாக்ஷன் ஸ்டிக்கர்கள், தனிப்பயனாக்கப்பட்ட செல்லப்பிராணிப் படங்கள், கார்ட்டூன் போன்ற குடும்பப் புகைப்படங்கள், மீம் ஸ்டிக்கர்கள், பார்ட்டி அல்லது திருவிழா ஈமோஜிகள் என எதை வேண்டுமானாலும் உருவாக்கலாம். பல ஸ்டிக்கர்களில் ஒரே சீரான தோற்றத்தை (Consistent look) பராமரிக்கவும் ChatGPT-யிடம் நீங்கள் கோரலாம்.
சாதாரணப் படங்களை உருவாக்குவதைக் காட்டிலும், சாட்டிங் செயலிகளில் நீங்கள் பயன்படுத்த விரும்பும் படங்களை உருவாக்குவதில் இந்த ஸ்டிக்கர் அம்சம் கவனம் செலுத்துகிறது. பிரகாசமான பார்டர்கள் இல்லாமல் ஸ்டிக்கர்கள் கச்சிதமாகப் பொருந்துவதற்கு வெளிப்படையான பின்னணிகளே முக்கியக் காரணமாகும்.
மேலும் இந்த அப்டேட் மட்டுமின்றி, டெஸ்க்டாப்பில் ChatGPT Work மற்றும் Codex-ஐ ஆதரிப்பது, மின்னஞ்சல்கள் முதல் ஸ்கிரீன்ஷாட்கள் வரை பல புதிய ஒருங்கிணைப்புகளையும் ஓபன்ஏஐ வழங்கி வருகிறது.
