சமூக வலைதளங்களில் ஆபாசத்தைத் தூண்டும் வகையிலான பதிவுகள் மற்றும் வீடியோக்களை வெளியிட்டதாக எழுந்த புகாரில், நடிகை தர்ஷா குப்தா, திருச்சி சாதனா உள்ளிட்ட 12 பேர் மீது சேலம் மாநகர சைபர் கிரைம் போலீசார் வழக்குப்பதிவு செய்துள்ளனர். இந்த விவகாரம் தொடர்பாக அடுத்தகட்ட விசாரணை தீவிரமாக நடைபெற்று வருகிறது.
இன்ஸ்டாகிராம், யூடியூப் உள்ளிட்ட சமூக வலைதளங்களில் சிலர் கட்டண அடிப்படையில் பாலியல் தன்மை கொண்ட புகைப்படங்கள், வீடியோக்கள் மற்றும் பேச்சுகளை வெளியிட்டு வருவதாக புகார் தெரிவிக்கப்பட்டுள்ளது. குறிப்பிட்ட தொகையை செலுத்தும் பயனர்களுக்கு மட்டும் கூடுதல் உள்ளடக்கங்களை வழங்கும் வகையில் சில கணக்குகள் செயல்படுவதாகவும் கூறப்படுகிறது. இதன் மூலம் சிலர் கணிசமான அளவில் வருமானம் ஈட்டுவதாகவும் புகாரில் குறிப்பிடப்பட்டுள்ளது.
இந்த நிலையில், சேலம் மாவட்டம் வலசையூரைச் சேர்ந்த வழக்கறிஞர் அஜித்சாக்கோ என்பவர் சேலம் மாநகர சைபர் கிரைம் போலீசில் புகார் அளித்தார். சமூக வலைதளங்களில் வெளியாகும் இதுபோன்ற உள்ளடக்கங்கள் இளம் வயதினரை தவறான பாதைக்கு அழைத்துச் செல்லும் அபாயம் இருப்பதாகவும், குறிப்பாக 18 வயதுக்குட்பட்டவர்கள் இவற்றை அணுகுவதைத் தடுக்க நடவடிக்கை எடுக்க வேண்டும் என்றும் அவர் வலியுறுத்தினார்.
தனது புகாரில், திருச்சி சாதனா, நடிகை தர்ஷா குப்தா உள்ளிட்ட 12 பேர் சமூக வலைதளங்களில் ஆபாசத்தைத் தூண்டும் வகையில் பேசுவதுடன், அதுதொடர்பான உள்ளடக்கங்களை வெளியிட்டு வருவதாக வழக்கறிஞர் குறிப்பிட்டிருந்தார். இதுபோன்ற செயல்பாடுகளால் இளைஞர்களின் மனநிலையில் பாதிப்பு ஏற்படுவதற்கான வாய்ப்பு இருப்பதாகவும், சம்பந்தப்பட்டவர்கள் மீது சட்டப்படி நடவடிக்கை எடுக்க வேண்டும் என்றும் அவர் கேட்டுக்கொண்டார்.
புகாரைப் பெற்ற சைபர் கிரைம் போலீசார், சம்பந்தப்பட்ட சமூக வலைதள கணக்குகள் மற்றும் பதிவுகள் குறித்து ஆய்வு மேற்கொண்டனர். வெளியிடப்பட்டதாகக் கூறப்படும் புகைப்படங்கள், வீடியோக்கள் மற்றும் பிற டிஜிட்டல் பதிவுகள் தொடர்பாக விசாரணை நடத்தப்பட்டதைத் தொடர்ந்து, 12 பேர் மீது வழக்குப்பதிவு செய்யப்பட்டுள்ளதாக கூறப்படுகிறது.
இணையவழியாக ஆபாசமான தகவல்கள் அல்லது காட்சிகளை வெளியிடுவது மற்றும் பரப்புவது தொடர்பாக தகவல் தொழில்நுட்பச் சட்டத்தின் கீழ் நடவடிக்கை எடுக்கப்படலாம். குறிப்பாக, IT Act, 2000-ன் பிரிவு 67, மின்னணு வடிவில் ஆபாசமான உள்ளடக்கங்களை வெளியிடுதல் அல்லது பரப்புதல் தொடர்பான குற்றங்களை உள்ளடக்கியதாகும்.
அதேபோல், 18 வயதுக்குட்பட்ட சிறார்களை பாலியல் தன்மை கொண்ட உள்ளடக்கங்களுக்கு உட்படுத்துவது தொடர்பாக போக்சோ சட்டம் மற்றும் தகவல் தொழில்நுட்பச் சட்டத்தின் பிரிவு 67B போன்ற பிரிவுகள் பொருந்தக்கூடும். சிறார்களை நோக்கி ஆபாச உள்ளடக்கங்களை உருவாக்குதல், பகிர்தல், விற்பனை செய்தல் அல்லது அவர்களை இதுபோன்ற நடவடிக்கைகளுக்கு ஈர்த்தல் ஆகியவை சட்டரீதியாக தீவிரமாகக் கருதப்படுகின்றன.
எனவே, சமூக வலைதளங்களில் கட்டண அடிப்படையில் வழங்கப்படும் உள்ளடக்கங்களில் வயது வரம்பு மற்றும் சிறார்களின் பாதுகாப்பு தொடர்பான விதிமுறைகள் முக்கியத்துவம் பெறுகின்றன. இந்த வழக்கில் குற்றச்சாட்டுகளின் உண்மைத் தன்மை, சம்பந்தப்பட்ட பதிவுகளின் தன்மை மற்றும் அவை சிறார்களை சென்றடைந்தனவா என்பது உள்ளிட்ட அம்சங்களை போலீசார் தொடர்ந்து விசாரித்து வருகின்றனர்.
12 பேர் மீது வழக்குப்பதிவு செய்யப்பட்டுள்ள நிலையில், அவர்களை விசாரணைக்கு உட்படுத்துவதற்கான அடுத்தகட்ட நடவடிக்கைகளையும் சைபர் கிரைம் போலீசார் மேற்கொண்டு வருவதாக தகவல்கள் தெரிவிக்கின்றன.
Also Read: ராட்சத வெள்ளம்!. பலி எண்ணிக்கை 469 ஆக உயர்வு!. சுமார் 200 இந்தியர்கள் மாயம்!. சீனா புதிய பேரிடர் எச்சரிக்கை!.
