இமாச்சலப் பிரதேசத்தில் பனிஏரிகளின் எண்ணிக்கை ஐந்து மடங்காக உயர்ந்துள்ளது. இது இப்பகுதி மக்களுக்கு பெரும் அச்சுறுத்தலாக மாறியுள்ளதோடு, downstream எனப்படும் கீழ்நோக்கிய பகுதிகளில் உள்ள நீர்மின் திட்டங்கள், குடியிருப்புகள் மற்றும் முக்கிய உள்கட்டமைப்புகளுக்குப் பெரும் வெள்ள அபாயத்தை ஏற்படுத்தியுள்ளதாக ஆய்வுகள் எச்சரித்துள்ளன.
ஐஐடி ரோபார் மற்றும் சிட்னி தொழில்நுட்பப் பல்கலைக்கழகம் இணைந்து நடத்திய கூட்டு ஆய்வின்படி, இமாச்சலப் பிரதேசத்தில் பனிஏரிகளின் எண்ணிக்கை 1990-ல் இருந்த 107 என்ற கணக்கிலிருந்து 2024-ல் 669 ஆக (525% அதிகரிப்பு) உயர்ந்துள்ளது. அவற்றின் பரப்பளவும் இரு மடங்காக விரிவடைந்துள்ளது.
கண்டறியப்பட்ட 669 ஏரிகளில், 88 ஏரிகள் பனிஏரி வெடிப்பு வெள்ள அபாயத்தைக் கொண்டுள்ளதாக அடையாளம் காணப்பட்டுள்ளன. குறிப்பாக, லாஹூல் மற்றும் ஸ்பிதி பகுதியில் உள்ள ஜீபாங் ஏரி 1970-களில் 27 ஹெக்டேராக இருந்தது, தற்போது 101 ஹெக்டேராக விஸ்வரூபம் எடுத்துள்ளது.
குலு, கின்னௌர் மற்றும் லாஹூல்-ஸ்பிதி மாவட்டங்கள் இந்த ஆபத்தான ஏரிகளுக்குக் கீழ் பகுதியில் அமைந்துள்ளன. இங்குள்ள பாண்டோ அணை, கோல்டாம் திட்டம், ராம்பூர் மற்றும் உல்-III நீர்மின் நிலையங்கள் கடுமையான வெள்ளப் பாதிப்புக்கு உள்ளாகலாம் என மாதிரிகள் மூலம் கணிக்கப்பட்டுள்ளது.
மேலும், குறுகிய ஆற்றுப் பாதைகளின் ஓரமாக அணைகள், தடுப்பணைகள், சுரங்கங்கள் மற்றும் பணியாளர் குடியிருப்புகள் அமைந்துள்ளதால், மாநிலத்தின் ஏராளமான நீர்மின் திட்டங்களும் இங்கு உள்ளன. ஒரு பனியாற்று ஏரிப் பேரலையானது (GLOF), இந்தப் பாதைகள் வழியாக அதிவேக நீர்ப் பெருக்கை அனுப்பக்கூடும், இதனால் கீழ்நிலையில் பெரும் சேதம் ஏற்பட வாய்ப்புள்ளது.
669 ஏரிகளில், 94 ஏரிகள் குறைந்தபட்சம் 0.02 சதுர கிலோமீட்டர் பரப்பளவைக் கொண்டுள்ளன, மேலும் இவற்றில் 88 ஏரிகள் புவி வெப்பமயமாதல் தூண்டுதல்களால் பாதிக்கப்படக்கூடியவை என அடையாளம் காணப்பட்டுள்ளன. 0.01 சதுர கிலோமீட்டர் அல்லது அதற்கும் குறைவான பரப்பளவு கொண்ட மிகச் சிறிய ஏரிகளின் எண்ணிக்கை, 1990-ல் வெறும் ஒன்பதாக இருந்து 2024-ல் 487 ஆக உயர்ந்து, மிகக் கடுமையான அதிகரிப்பைப் பதிவு செய்துள்ளது.
இயற்கை அணைகளின் உறுதியற்ற தன்மை உள்ளிட்ட காரணிகளின் அடிப்படையில், இந்த ஆய்வு ஒன்பது ஏரிகளை “மிக அதிக அபாயம்” உள்ளவை என்றும், 18 ஏரிகளை “அதிக அபாயம்” உள்ளவை என்றும், 26 ஏரிகளை “நடுத்தர அபாயம்” உள்ளவை என்றும் வகைப்படுத்தியது. அதன்படி, 73 ஏரிகளில் உறுதியற்ற இயற்கை அணைகள் இருப்பதும், 58 ஏரிகள் நிலநடுக்கங்களாலும், 52 ஏரிகள் பனி உள்ளகச் சிதைவுகளாலும், 44 ஏரிகள் பாறைச்சரிவுகளாலும் பாதிக்கப்படக்கூடியவை என்பதும் கண்டறியப்பட்டது.
வெறும் 0.046 சதுர கிலோமீட்டர் பரப்பளவைக் கொண்டதும், 1.19 சதுர கிலோமீட்டர் பனியாற்றால் ஊட்டப்படுவதுமான ஹிம்சு ஏரி, ஹுர்லா கிராமத்திலிருந்து சுமார் 30 கிலோமீட்டர் தொலைவில் அமைந்துள்ளது. சட்லஜ் படுகையில் உள்ள, 0.363 சதுர கிலோமீட்டர் பரப்பளவைக் கொண்டதும், 4.91 சதுர கிலோமீட்டர் பனியாற்றால் ஊட்டப்படுவதுமான பெயரிடப்படாத ஒரு ஏரியும் அதிக அபாயம் உள்ளதாக அடையாளம் காணப்பட்டுள்ளது.
இயற்கையான அணைகள் உடைந்தால், பியாஸ் படுகை ஏரியிலிருந்து உச்சபட்ச நீர் வெளியேற்றம் வினாடிக்கு 1,385 கன மீட்டராகவும், சட்லெஜ் படுகை ஏரியிலிருந்து வினாடிக்கு 3,507 கன மீட்டராகவும் எட்டக்கூடும் என்றும், இது கீழ்நிலைப் பகுதிகளில் கடுமையான வெள்ளப்பெருக்கை ஏற்படுத்தக்கூடும் என்றும் ஆராய்ச்சியாளர்களின் மாதிரி கணிப்புகள் மதிப்பிட்டுள்ளன.
பியாஸ் படுகையில் மிக மோசமான சூழ்நிலை ஏற்பட்டால், பாண்டோ அணையின் பகுதிகள் மற்றும் உல்-III நீர்மின் நிலையம் உட்பட 94 கட்டிடங்கள் பாதிக்கப்படலாம். சட்லஜ் படுகையில், கோல்டம் திட்டம் மற்றும் ராம்பூர் நீர்மின் நிலையம் உட்பட குறைந்தது 588 கட்டிடங்கள் அபாயத்திற்கு உள்ளாகக்கூடும்.
தற்போதுள்ள அணைப் பாதுகாப்பு கட்டமைப்புகளில் புவி வெப்பமயமாதல் அபாயங்களை ஒருங்கிணைக்குமாறு அந்த ஆய்வு மாநில அரசை வலியுறுத்தியுள்ளது. மேலும், பாண்டோ அணைக்குக் குறைந்தபட்சம் 25 கிலோமீட்டர் தொலைவிலும், பக்ரா அணைக்கு 100 கிலோமீட்டர் தொலைவிலும் முன்கூட்டியே எச்சரிக்கை செய்யும் உணரிகளை நிறுவவும் அது பரிந்துரைத்துள்ளது.
இமாச்சலப் பிரதேச மாநில பேரிடர் மேலாண்மை ஆணையம், ஜீபாங் உள்ளிட்ட ஆபத்தான ஏரிகளைச் செயற்கைக்கோள் மற்றும் தொலைதூர உணர்திறன் தரவுகள் மூலம் தொடர்ந்து கண்காணித்து வருகிறது.
சி-டாக் (C-DAC) நிறுவனத்துடன் இணைந்து முன்கூட்டியே எச்சரிக்கும் அமைப்புகளை வலுப்படுத்தவும், நதிக்கரைகளில் சிவப்பு, மஞ்சள் மற்றும் பச்சை மண்டலங்களை நிர்ணயிக்கும் பணிகளையும் மாநில அரசு தீவிரப்படுத்தியுள்ளது.
இமயமலைப் பகுதியில் அதிகரித்து வரும் பருவநிலை மாற்றத்தால் ஏற்படும் பேரிடர்களைத் தவிர்க்க, ஐஐடி நிபுணர்கள் மற்றும் சுற்றுச்சூழல் ஆர்வலர்களைக் கொண்டு அறிவியல் பூர்வமான விரிவான ஆய்வுகளை மேற்கொள்ளுமாறு முதல்வர் சுக்விந்தர் சிங் சுகு மத்திய அரசை வலியுறுத்தியுள்ளார்.
