மேஜர் லீக் சாக்கர் (MLS) சாம்பியனான லியோனல் மெஸ்ஸியின் இன்டர் மியாமி அணியின் புதிய தலைமைப் பயிற்சியாளராக மற்றொரு அர்ஜென்டினா நாட்டைச் சேர்ந்த கிறிஸ்டியன் “கிலி” கொன்சாலேஸ் (Cristian “Kily” Gonzalez) நியமிக்கப்பட்டுள்ளார்.
சூப்பர் ஸ்டார் மெஸ்ஸியின் சொந்த ஊரான ரொசாரியோவைச் சேர்ந்த கொன்சாலேஸ், இடைக்காலப் பயிற்சியாளர் கில்லர்மோ ஹோயோஸின் கீழ் மியாமி அணி சந்தித்து வரும் மோசமான தோல்விகளைச் சரிசெய்யும் முயற்சியில் களமிறங்குகிறார். 52 வயதான கொன்சாலேஸ், தனது விளையாட்டு காலத்தில் இன்டர் மிலன், வலென்சியா மற்றும் சராகோசா போன்ற ஐரோப்பிய கிளப் அணிகளுக்காக இடது விங் வீரராக விளையாடியுள்ளார். மேலும், 1995 முதல் 2005 வரை அர்ஜென்டினா அணிக்காக 56 சர்வதேச போட்டிகளிலும் விளையாடிய அனுபவம் கொண்டவர்.
கடந்த 2020-ல் மேலாண்மை துறைக்கு மாறிய இவர், மியாமிக்கு வருவதற்கு முன்பு அர்ஜென்டினாவின் மூன்று கிளப் அணிகளுக்குப் பயிற்சியாளராகப் பணியாற்றியுள்ளார்.
உலகக் கோப்பை இடைவேளைக்குப் பிறகு, மான்செஸ்டர் யுனைடெட் அணியில் இருந்து பிரேசிலின் கேசமிரோ சேர்க்கப்பட்டிருந்தாலும், நடப்பு சாம்பியனான இன்டர் மியாமி அணி சற்று தடுமாறி வருகிறது. இடைக்காலப் பயிற்சியாளர் கில்லர்மோ ஹோயோஸ் தலைமையில் விளையாடிய கடந்த ஐந்து ஆட்டங்களில் நான்கு போட்டிகளை மியாமி அணி தோல்வியைச் சந்தித்துள்ளது. இதனால் கிழக்குப் பிரிவில் (Eastern Conference) இரண்டாவது இடத்தில் உள்ள இக்குழு, முதலிடத்தில் இருக்கும் நாஷ்வில் அணியை விட 10 புள்ளிகள் பின்தங்கியுள்ளது.
இதனிடையே, அமெரிக்க பணி அனுமதிப் பத்திரம் அதிகாரப்பூர்வமாக அங்கீகரிக்கப்படும் வரை கில்லர்மோ ஹோயோஸ் இடைக்காலப் பயிற்சியாளராகத் தொடர்வார் என்று கிளப் நிர்வாகம் தெரிவித்துள்ளது. முன்னதாக ஏப்ரல் மாதம் ஜாவியர் மஸ்செரானோ தனிப்பட்ட காரணங்களுக்காக விலகியதை அடுத்து ஹோயோஸ் பொறுப்பேற்றிருந்தது குறிப்பிடத்தக்கது.
