சென்னையில் கூடுதல் வரதட்சணை கேட்டு கணவர் மற்றும் புகுந்த வீட்டினர் அளித்த சித்திரவதை காரணமாக, 27 வயதான தனியார் பள்ளி ஆசிரியை தற்கொலை செய்து கொண்ட சம்பவம் பெரும் சோகத்தையும் அதிர்ச்சியையும் ஏற்படுத்தியுள்ளது.
சென்னையை அடுத்த கோவிலம்பாக்கத்தில், புவனேஸ்வரி என்ற இளம்பெண், தனியார் பள்ளி ஆசிரியையாகப் பணியாற்றி வந்தார். கடந்த 2024 செப்டம்பர் மாதம் திருமணமான இவருக்கு 1 வயதில் ஆண் குழந்தை உள்ளது. திருமணத்தின் போது புவனேஸ்வரியின் பெற்றோர் ரூ. 15 லட்சம் மதிப்பிலான கார், மணப்பெண்ணுக்கு 50 சவரன் நகை மற்றும் மணமகனுக்கு 20 சவரன் நகை என மொத்தம் 70 சவரன் தங்க நகைகளை வரதட்சணையாக வழங்கியுள்ளனர்.
திருமணம் முடிந்து 2 ஆண்டுகள் கூட ஆகாத நிலையில், தொடர்ந்து கூடுதல் வரதட்சணை கேட்டு கணவர் மற்றும் அவரது குடும்பத்தினர் புவனேஸ்வரியை மனரீதியாகவும் உடல்ரீதியாகவும் சித்திரவதை செய்து வந்ததாகக் கூறப்படுகிறது. சமீபத்தில் குழந்தையின் முதல் பிறந்தநாளின் போது புவனேஸ்வரியின் பெற்றோர் குழந்தைக்குத் தங்கச் சங்கிலி பரிசளித்துள்ளனர். அதன் பிறகும் கணவன்-மனைவி இடையே மீண்டும் தகராறு ஏற்பட்டுள்ளது.
புவனேஸ்வரியின் தந்தை அளித்த புகாரின் பேரில் காவல்துறையினர் வழக்குப் பதிவு செய்து விசாரணை நடத்தி வருகின்றனர். திருமணமாகி 7 ஆண்டுகளுக்குள் சந்தேகத்திற்குரிய வகையில் மரணம் ஏற்பட்டுள்ளதால், இச்சம்பவம் குறித்து வருவாய் கோட்டாட்சியர் (RDO) விசாரணைக்கு உத்தரவிடப்பட்டுள்ளது.
பாரதிய நியாய சன்ஹிதா (BNS), 2023 சட்டப்பிரிவு 80-ன் கீழ், திருமணமாகி 7 ஆண்டுகளுக்குள் வரதட்சணைக் கொடுமையால் பெண் உயிரிழந்தால் குற்றவாளிக்குக் குறைந்தபட்சம் 7 ஆண்டுகள் சிறைத்தண்டனை விதிக்கப்படும். மேலும் பிரிவு 85-ன் கீழ் சொத்து அல்லது நகை கேட்டுத் துன்புறுத்துவதும் கடுமையான குற்றமாகும்.
தாயை இழந்து தவிக்கும் 1 வயது பிஞ்சுக் குழந்தையின் நிலை அப்பகுதியில் பெரும் சோகத்தை ஏற்படுத்தியுள்ளது.
