விநாயகர் சதுர்த்தி தொடர் விடுமுறை முடிந்து சொந்த ஊர்களிலிருந்து சென்னை நோக்கித் திரும்பிய வாகனங்கள், செங்கல்பட்டு அருகே தேசிய நெடுஞ்சாலையில் அடுத்தடுத்து மோதி விபத்துக்குள்ளானது பெரும் பரபரப்பை ஏற்படுத்தியுள்ளது.
தொடர் விடுமுறையைக் கொண்டாடுவதற்காகச் சென்னையிலிருந்து லட்சக்கணக்கான மக்கள் தங்களது சொந்த ஊர்களுக்குச் சென்றிருந்த நிலையில், விடுமுறை முடிவடைந்ததை ஒட்டி இன்று காலை முதலே தென் மாவட்டங்களிலிருந்து சென்னை நோக்கிப் பல்லாயிரக்கணக்கான வாகனங்கள் படையெடுக்க தொடங்கின.
இந்த நிலையில், சென்னை – திருச்சி தேசிய நெடுஞ்சாலையில் செங்கல்பட்டு அடுத்த புலிப்பாக்கம் பகுதியில் சென்று கொண்டிருந்த கார் ஒன்று எதிர்பாராத விதமாகத் திடீரென பிரேக் பிடித்து நின்றது. இதனால், அதன் பின்னால் அதிவேகமாக வந்துகொண்டிருந்த கார்கள் கட்டுப்பாட்டை இழந்து ஒன்றன்பின் ஒன்றாக அடுத்தடுத்து மோதி விபத்துக்குள்ளாகின. இந்தத் தொடர் விபத்தில் மொத்தம் 7 கார்கள் பலத்த சேதமடைந்தன.
விபத்தில் சிக்கிய கார்களில் இருந்த பயணிகளுக்கு நல்வாய்ப்பாகப் பெரிய அளவிலான அசம்பாவிதங்கள் இன்றி லேசான காயங்கள் மட்டுமே ஏற்பட்டன. தகவலறிந்து சம்பவ இடத்திற்கு விரைந்து வந்த போலீஸார், காயமடைந்தவர்களை மீட்டு முதலுதவி சிகிச்சைக்காக உடனடியாக மருத்துவமனைக்கு அனுப்பி வைத்தனர். இந்த விபத்தின் காரணமாக சென்னை – திருச்சி தேசிய நெடுஞ்சாலையில் சுமார் 2 கிலோ மீட்டர் தூரத்திற்கு வாகனங்கள் அணிவகுத்து நின்று கடும் போக்குவரத்து நெரிசல் ஏற்பட்டது. விபத்துக்குள்ளான கார்களை கிரேன் மூலம் அப்புறப்படுத்திய போலீஸார், போக்குவரத்தை சீர் செய்யும் பணியில் தீவிரமாக ஈடுபட்டனர்.
