தண்ணீர் குடித்தும் தாகம் தீரவில்லையா? உடலில் நடக்கும் இந்த மாற்றத்தை அலட்சியப்படுத்தாதீங்க!

தண்ணீர் உடலுக்கு மிகவும் அவசியமானது. தினமும் போதுமான அளவு தண்ணீர் குடிப்பது உடலின் நீர்ச்சத்தை பராமரிக்கவும், பல்வேறு உடல் செயல்பாடுகள் சீராக நடைபெறவும் உதவுகிறது. ஆனால், தேவையான அளவு தண்ணீர் குடித்த பிறகும் தொடர்ந்து தாகம் எடுத்துக்கொண்டே இருந்தால் அதை சாதாரணமாக எடுத்துக்கொள்ளக் கூடாது.

போதுமான அளவு தண்ணீர் குடித்தும் அடிக்கடி தாகம் ஏற்படுவது சில நேரங்களில் உடலில் வேறு ஏதேனும் மாற்றம் ஏற்பட்டிருப்பதற்கான அறிகுறியாக இருக்கலாம். குறிப்பாக, தண்ணீர் குடித்த சிறிது நேரத்திலேயே தொண்டை வறண்டு போவது, மீண்டும் மீண்டும் தண்ணீர் குடிக்க வேண்டிய நிலை ஏற்படுவது போன்ற அறிகுறிகள் தொடர்ந்து இருந்தால் காரணத்தை கவனிப்பது அவசியம்.

உடலுக்கு தண்ணீர் மட்டுமல்லாமல், சோடியம், பொட்டாசியம், குளோரைடு போன்ற எலக்ட்ரோலைட்டுகளும் தேவை. இவை உடலில் நீர் மற்றும் தாதுக்களின் சமநிலையை பராமரிப்பதில் முக்கிய பங்கு வகிக்கின்றன. குறிப்பாக சோடியம், உடலில் உள்ள நீரின் அளவை ஒழுங்குபடுத்துவதிலும் செல்களின் இயல்பான செயல்பாட்டிலும் முக்கியத்துவம் பெறுகிறது.

அதேபோல், ஒரே நேரத்தில் அளவுக்கு அதிகமாக தண்ணீர் குடிப்பதும் உடலுக்கு நன்மை தராது. குறுகிய நேரத்துக்குள் அதிக அளவு தண்ணீர் எடுத்துக்கொண்டால், ரத்தத்தில் உள்ள சோடியத்தின் செறிவு குறையும் வாய்ப்பு உள்ளது. இதனால் உடலில் நீர் மற்றும் எலக்ட்ரோலைட்டுகளின் இயல்பான சமநிலை பாதிக்கப்படலாம்.

எனவே, தாகம் எடுத்தால் தண்ணீர் குடிப்பதுடன், நாள் முழுவதும் தேவையான அளவு தண்ணீரை இடைவெளி விட்டு எடுத்துக்கொள்வது நல்லது. அதிகமாக தண்ணீர் குடிப்பதே ஆரோக்கியத்திற்கு சிறந்தது என்ற எண்ணத்தில், குறுகிய நேரத்தில் அதிக அளவு தண்ணீரை குடிப்பதை தவிர்க்க வேண்டும்.

தொடர்ந்து தண்ணீர் குடித்தும் தாகம் குறையாமல் இருப்பது, அடிக்கடி சிறுநீர் கழிப்பது, வாய் அல்லது தொண்டை தொடர்ந்து வறண்டு இருப்பது போன்ற மாற்றங்கள் நீடித்தால், அதை அலட்சியப்படுத்தாமல் மருத்துவரை அணுகுவது நல்லது. குறிப்பாக இந்த அறிகுறிகள் புதிதாகத் தோன்றி தொடர்ந்து நீடித்தால், அதன் பின்னணியில் இருக்கும் காரணத்தை மருத்துவ பரிசோதனை மூலம் கண்டறிவது அவசியம்.

Also Read: EPFO உறுப்பினர்களுக்கு சூப்பர் வசதி! இனி WhatsApp-லேயே PF Balance, Claim Status.. புதிய சேவை அறிமுகம்..