புரட்டாசி மாதம் பிறந்துவிட்டாலே பெரும்பாலான வீடுகளில் அசைவத்திற்குத் தடை விதிக்கப்பட்டு, பெருமாள் வழிபாடு களைகட்ட தொடங்கும். புரட்டாசியில் அசைவம் சாப்பிடக் கூடாது என்பதற்கு ஆன்மிக நம்பிக்கைகள் ஒருபுறமிருக்க, உடலைப் பாதுகாக்கும் வியக்கத்தக்க அறிவியல் காரணங்களும் நம் முன்னோர்களின் விதிகளுக்குப் பின்னால் பொதிந்துள்ளன.
ஆன்மிகமும் ஜோதிடப் பின்னணியும்:
ஜோதிட சாஸ்திரப்படி காலபுருஷ தத்துவத்தின் 6-வது ராசியான கன்னியில் சூரியன் சஞ்சரிக்கும் மாதமே புரட்டாசி. இந்தக் கன்னி ராசியின் அதிபதியாக விளங்குபவர் புதன் பகவான். புதனின் அதிதேவதை மகாவிஷ்ணு ஆவார். நவகிரகங்களில் புதன் ‘சைவத்திற்குரிய கிரகம்’ என்பதால், விஷ்ணுவின் அருளைப் பெறவும் புதனின் நற்பலன்களை அடையவும் இம்மாதம் முழுவதும் அசைவத்தைத் தவிர்த்து, பெருமாளை நினைத்து விரதம் கடைப்பிடிப்பது மரபாக மாறியது.
அறிவியல் ரீதியான மருத்துவக் காரணங்கள்:
பல மாதங்களாக கோடை வெயிலால் தகித்துக் கொண்டிருந்த பூமி, பருவமழையின் மழைநீரை ஈர்க்கும்போது நிலத்தில் இருக்கும் கடுமையான வெப்பத்தை வெளியேற்ற தொடங்கும்.
இந்தக் காலகட்டத்தில் கிளம்பும் புவி வெப்பமானது, கோடைக்கால வெயிலை விட மிக மோசமானது. இச்சூழலில் செரிமானத்திற்கு அதிக நேரம் எடுத்துக்கொள்ளும் அசைவ உணவை உட்கொண்டால், அது உடல் சூட்டை பன்மடங்கு அதிகரித்து செரிமானக் குறைபாடு, அஜீரணம் மற்றும் தீவிர வயிற்றுப் பிரச்சனைகளை உருவாக்கும்.
பருவமழையின் திடீர் வெப்ப மாற்றத்தால் காற்றில் நோய்க்கிருமிகள் எளிதில் பரவி சளி, காய்ச்சல், அலர்ஜி போன்ற உடல்நலக் கோளாறுகள் அதிகரிக்கும்.
துளசி தீர்த்தத்தின் மருத்துவ மகிமை:
இந்த சீதோஷ்ண மாற்றத்தால் உண்டாகும் உடல் உபாதைகளையும் கிருமித் தொற்றுகளையும் கட்டுப்படுத்தும் ஆற்றல் மூலிகையான துளசிக்கு உண்டு. இதனாலேயே, புரட்டாசி மாதத்தில் அசைவத்தை ஒதுக்கி விரதமிருந்து, பெருமாள் கோவில்களுக்குச் சென்று துளசி தீர்த்தம் அருந்தும் வழக்கத்தை நமது முன்னோர்கள் மிக நேர்த்தியாக அமைத்துள்ளனர்.
ஆன்மிகப் பக்தியோடு நமது உடல் நலனையும் பாதுகாக்கும் இத்தகைய உன்னதமான வாழ்வியல் முறையைப் பின்பற்றி, உடலையும் மனதையும் ஆரோக்கியமாகப் பேணுவோம்.
