தமிழகத்தில் வடகிழக்கு பருவமழை தொடங்கவுள்ள நிலையில் மேற்கொள்ளப்பட வேண்டிய முன்னெச்சரிக்கை நடவடிக்கைகள் குறித்து அதிகாரிகள் தீவிர ஆலோசனையில் ஈடுபட்டு வரும் நிலையில், சென்னை வானிலை மையத்தின் ரேடார் பழுதாகி செயல்படாமல் உள்ளது அதிர்ச்சியை ஏற்படுத்தியுள்ளது.
சூப்பர் எல்நினோ தாக்கம் காரணமாக தட்ப வெப்ப நிலையில் அதிக மாற்றங்கள் ஏற்படும் என்று வானிலை ஆய்வாளர்கள் ஏற்கனவே பல்வேறு எச்சரிக்கை தகவல்களை வெளியிட்டு உஷார்படுத்தி உள்ளனர்.கடும் வெப்பம், வறட்சி, பெரு வெள்ளம் ஆகியவை ஏற்பட வாய்ப்பு உள்ளதாக கணிக்கப்பட்டுள்ளது.
இருப்பினும், சென்னை மற்றும் புறநகர் பகுதியை பொறுத்தவரையில் பருவமழை காலங்களான அக்டோபர், நவம்பர், டிசம்பர் மாதங்களில் வெள்ள பாதிப்பு அதிகமாகவே இருக்கும். இந்த பாதிப்பு வரலாறு காணாத வகையில் இருக்கும் என்று கூறப்படுகிறது.
தற்போது சூப்பர் எல் நினோவால் பெரு வெள்ளம் ஏற்படுவதற்கு அதிக வாய்ப்புகள் இருப்பதாக வானிலை ஆய்வாளர்கள் கணித்து இருப்பது பொதுமக்களிடையே சற்று பீதியையும் ஏற்படுத்தி இருக்கிறது.
இருப்பினும், இந்த ஆண்டு, அடுத்த மாதம் 3 அல்லது 4-வது வாரத்தில் வடகிழக்கு பருவமழை தொடங்கும் என எதிர்பார்க்கப்படுகிறது. இந்நிலையில், வடகிழக்கு பருவமழை முன்னேற்பாடுகள் குறித்து அமைச்சர்கள், துறை செயலர்கள் மற்றும் அனைத்து மாவட்ட ஆட்சியர்கள், சென்னை மாநகராட்சி ஆணையர் ஆகியோருடன் முதல்வர் விஜய் தலைமை செயலகத்தில் நேற்று ஆலோசனை நடத்தினார்.
இந்தநிலையில், சென்னை துறைமுக கட்டிடத்தில் செயல்பட்டு வரும் வானிலை ஆய்வு மையத்தின் ரேடார் பழுதாகி செயல்படாமல் உள்ளதாக அதிர்ச்சி தகவல் வெளியாகியுள்ளது. அதாவது, 2018ம் ஆண்டு பழுதான இந்த ரேடாருக்கு, உரிய உதிரி பாகங்கள் கிடைக்காமல் இருப்பதால், பழுது நீக்குவதில் சிக்கல் நீடிக்கிறது. வடகிழக்கு பருவமழை நெருங்கி வரும் நிலையில், வானிலையின் முழுமையான செயல்பாட்டை அறிய முடியாத நிலையில் வானிலை மையம் உள்ளது. இது மக்களிடையே மேலும் பீதியை ஏற்படுத்தியுள்ளது.
