லண்டனில் மகாத்மா காந்தி சிலை முன்பு இந்தியத் தேர்தல் ஆணையத்துக்கும், தலைமைத் தேர்தல் ஆணையர் ஞானேஷ் குமாருக்கும் எதிராக நடைபெற்ற போராட்டத்தில், பிரதமர் மோடிக்கு ஆதரவான குழுவினரும் திரண்டதால் பரபரப்பு ஏற்பட்டது. வாக்காளர் பட்டியல் சிறப்பு தீவிரத் திருத்த நடவடிக்கைக்கு (SIR) எதிர்ப்புத் தெரிவித்து நடைபெற்ற இந்தப் போராட்டத்தில், இரு தரப்பினரும் எதிரெதிராக முழக்கமிட்டதால் பதற்றமான சூழல் நிலவியது.
லண்டனில் உள்ள பார்லிமென்ட் சதுக்கத்தில், மகாத்மா காந்தி சிலை அருகே சனிக்கிழமை இந்தப் போராட்டம் நடைபெற்றது. காங்கிரஸ் கட்சியின் வெளிநாட்டு அமைப்பான இந்தியன் ஓவர்சீஸ் காங்கிரஸின் இளைஞர் பிரிவு மற்றும் பிரிட்டனில் செயல்படும் இந்திய மாணவர் அமைப்புகள் இணைந்து இதனை ஏற்பாடு செய்திருந்தன. ‘ஸ்டாப் வோட் சோரி’ (Stop Vote Chori) என்ற பெயரில் நடைபெற்ற இந்தப் போராட்டத்துக்கு, பிரிட்டனில் உள்ள பல்வேறு இந்திய வம்சாவளி அமைப்புகளும் ஆதரவு தெரிவித்தன.
இந்த நிகழ்வில் சமூகச் செயற்பாட்டாளர் துருவ் ரதீ முக்கியப் பேச்சாளராகப் பங்கேற்றார். அவர் பேசுவதற்கு முன்பு, ‘இன்குலாப் ஜிந்தாபாத்’, ‘வந்தே மாதரம்’ உள்ளிட்ட முழக்கங்கள் எழுப்பப்பட்டன. தொடர்ந்து, இந்திய அரசியலமைப்பின் முகவுரையும் வாசிக்கப்பட்டது.
அப்போது, காந்தி சிலையின் மறுபுறத்தில் திரண்டிருந்த பிரதமர் மோடி ஆதரவாளர்கள் ‘மோடி, மோடி’ என முழக்கமிட்டனர். இரு குழுக்களும் தனித்தனியாக இருக்கும்படி லண்டன் மாநகரக் காவல்துறையினர் பாதுகாப்புப் பணியில் ஈடுபட்டனர். இருப்பினும், இரு தரப்பினரும் தங்களது முழக்கங்களை ஒருவரையொருவர் மிஞ்சும் வகையில் எழுப்பியதால் வாக்குவாதமும் பதற்றமும் அதிகரித்தது.
கூட்டத்தில் பேசிய துருவ் ரதீ, இந்தியாவில் நடைபெறும் தேர்தல் முறைகேடுகள் தொடர்பான குற்றச்சாட்டுகளுக்கு எதிராகக் குரல் கொடுப்பது அவசியம் என வலியுறுத்தினார். மேலும், தலைமைத் தேர்தல் ஆணையர் ஞானேஷ் குமாரை மாற்றி, ஆளுங்கட்சியும் எதிர்க்கட்சித் தலைவரும் இணக்கம் காணும் வகையில் புதிய நபரைத் தேர்வு செய்யும் வரை போராட்டங்கள் தொடரும் என்றும் அவர் கூறினார்.
இதற்கிடையே, மோடி அரசுக்கு ஆதரவு தெரிவிக்கும் வகையில், ‘இந்தியா டயஸ்போரா யுகே’ அமைப்பும் எதிர்ப்புப் போராட்டத்துக்கு அழைப்பு விடுத்திருந்தது. வலுவான, ஒருங்கிணைந்த, வளர்ச்சியடைந்த இந்தியாவை உருவாக்கும் பிரதமர் மோடியின் நோக்கத்துக்கு பிரிட்டனில் உள்ள இந்திய வம்சாவளியினர் ஆதரவாக இருப்பதாக அந்த அமைப்பின் நிறுவனர் ஹிர்தேஷ் குப்தா தெரிவித்தார்.
வெள்ளிக்கிழமை லண்டனில் உள்ள இந்தியத் தூதரகத்திற்கு வெளியேயும் போராட்டம் மற்றும் எதிர்ப்புப் போராட்டம் நடைபெற்ற நிலையில், சனிக்கிழமை பார்லிமென்ட் சதுக்கத்தில் அதிகளவிலானோர் திரண்டனர்.
இந்தியாவில் வாக்காளர் பட்டியலைச் சிறப்பு தீவிரத் திருத்தம் செய்யும் நடவடிக்கையை ரத்து செய்ய வேண்டும், தலைமைத் தேர்தல் ஆணையர் ஞானேஷ் குமாரைப் பதவியிலிருந்து நீக்க வேண்டும் உள்ளிட்ட கோரிக்கைகளை முன்வைத்து பல்வேறு போராட்டங்கள் நடைபெற்று வருகின்றன. மறுபுறம், இறந்தவர்கள், இரட்டைப் பதிவுகள், இடம்பெயர்ந்தவர்கள் மற்றும் தகுதியற்றவர்களின் பெயர்களைக் கண்டறிந்து வாக்காளர் பட்டியலைச் சரிசெய்வதே இந்த நடவடிக்கையின் நோக்கம் எனத் தேர்தல் ஆணையம் விளக்கம் அளித்துள்ளது.
