சென்னை சூப்பர் கிங்ஸ் அணி, தனது வீரர் ஒருவர் அணியின் ஆடும் 11 வீரர்கள் பட்டியலை ஒரு பந்தயத் தரகருக்குக் கசியவிட்டதாக வந்த சமீபத்திய செய்திகள் குறித்து அணி நிர்வாகம் செப்டம்பர் 25 அன்று நடைபெற உள்ள அதன் வருடாந்திர பொதுக் குழு கூட்டத்தில் விவாதிக்க உள்ளது. ஊழலைச் சற்றும் சகித்துக்கொள்ள முடியாது என்றும், இந்த விவகாரத்தில் தகுந்த நடவடிக்கை எடுக்கப்படும் என்றும் சிஎஸ்கே நிர்வாகம் கூறியதாக கிரிக்பஸ் செய்தி வெளியிட்டுள்ளது.
கடந்த 2025 ஐபிஎல் சீசனின் போது ஐந்து முறை சாம்பியனான சிஎஸ்கே அணிக்கு எதிராக மேட்ச் பிக்ஸிங் குற்றச்சாட்டுகளை ‘தெஹல்கா’ (Tehelka) ஊடகத்தின் ரகசிய விசாரணை எழுப்பியுள்ளது.
முன்னாள் ரஞ்சி டிராபி வீரர் ரச்சித் பாட்டியா, ஒரு பந்தயத் தரகராக மாறுவேடத்தில் இருந்த நிருபரிடம், அணியில் உள்ள டெல்லியைச் சேர்ந்த ஒரு வீரர் மூலம் அதிகாரப்பூர்வ அறிவிப்புகளுக்கு முன்பே அணியின் ஆடும் 11 வீரர்கள் பட்டியலைத் தான் அணுகியதாகக் கூறியதை அது மேற்கோள் காட்டியுள்ளது.
சமூக வலைத்தளமான ஸ்னாப்சாட் (Snapchat) மூலம் லண்டனைச் சேர்ந்த தரகர்களுக்கு சிஎஸ்கே-வின் ஆடும் லெவனை முன்கூட்டியே அனுப்பி 2025-ல் ஐந்து ஐபிஎல் போட்டிகளை ஃபிக்ஸிங் செய்ததாக பாட்டியா அந்த வீடியோவில் கூறியுள்ளார். இந்தத் தகவலுக்காக ஒரு போட்டிக்கு 60 லட்சம் ரூபாய் வீதம் மொத்தம் 3 கோடி ரூபாய் தனக்கு வழங்கப்பட்டதாக அவர் தெரிவித்தார்.
அவருக்கு தெரிந்த அந்த வீரர் ஏலத்தில் தேர்ந்தெடுக்கப்பட்டால், 2026 சீசனுக்கான சிஎஸ்கே ஆடும் லெவன் விவரங்களையும் முன்கூட்டியே ஏற்பாடு செய்ய முடியும் என்று பாட்டியா கூறியதாகவும், ஆனால் பின்னர் அந்த வீரருக்கு ஏற்பட்ட காயம் காரணமாக அந்த ஏற்பாடு தடைபட்டதாக அவர் கூறியதாகவும் தகவல்கள் தெரிவிக்கின்றன.
அந்த அறிக்கையில் சிஎஸ்கே வீரரின் பெயர் வெளிப்படையாகக் குறிப்பிடப்படவில்லை. மேலும், சிஎஸ்கே குறித்த பாட்டியாவின் எந்தவொரு குற்றச்சாட்டும் இதுவரை தனிப்பட்ட முறையில் நிரூபிக்கப்படவில்லை.
இதற்கிடையே, டெல்லி பிரீமியர் லீக் போட்டிகளையும் ஃபிக்ஸிங் செய்ய பாட்டியா முன்வந்ததாகவும், தேவைப்பட்டால் ஸ்பாட் ஃபிக்ஸிங்கிற்காக மெதுவாக பேட்டிங் செய்யவோ அல்லது ரன் அவுட் ஆகவோ அதே வீரர் தயாராக இருப்பார் என்று கூறியதாகவும் தெரிகிறது.
இந்தச் செய்தி சமூக வலைத்தளங்களில் வைரலான சில மணிநேரங்களில், டெல்லி மற்றும் மாவட்ட கிரிக்கெட் சங்கம் (DDCA) இந்த அறிக்கைகள் சரிபார்க்கப்படாதவை என்று கூறியது. அதேவேளையில், தங்களின் வீரர்களில் ஒருவரான வன்ஷ் பேடி (Vansh Bedi), ஒரு மர்ம நபர் தன்னை மேட்ச் பிக்ஸிங்கிற்காக அணுகியதாகத் தங்களுக்குத் தெரிவித்ததாகவும், அது குறித்து பிசிசிஐ-யிடம் புகார் அளிக்கப்பட்டுள்ளதாகவும் DDCA தெரிவித்தது.
மறுப்பு தெரிவித்த வீரர்: வன்ஷ் பேடி 2025-ல் சிஎஸ்கே அணியில் இடம்பெற்றிருந்தார். கணுக்கால் காயம் காரணமாக சீசனின் பாதியிலேயே அவர் வெளியேறினார். 2026-ல் அவரை அணி தக்கவைக்கவில்லை, மேலும் ஏலத்திலும் அவர் விலைபோகவில்லை. குற்றச்சாட்டுகளில் அவரது பெயர் நேரடியாகக் குறிப்பிடப்படாவிட்டாலும், காயத்தால் அவர் விலகியதைக் குறிப்பிட்டு சமூக வலைத்தளங்களில் சிலர் அவரை இந்த வழக்குடன் தொடர்புபடுத்தினர். ஆனால், அவருக்கும் இதற்கும் எந்தத் தொடர்பும் இல்லை என வன்ஷ் பேடி மறுத்துள்ளார்.
சிஎஸ்கே கடந்து வந்த பாதை: சிஎஸ்கே அணி ஏற்கனவே ஐபிஎல் தொடரில் இரண்டு ஆண்டுகள் தடை விதிக்கப்பட்டிருந்தது குறிப்பிடத்தக்கது. 2013 ஐபிஎல் சீசனில் அணி நிர்வாகி குருநாத் மெய்யப்பன் சூதாட்டத்தில் ஈடுபட்டது நிரூபிக்கப்பட்டதை அடுத்து, 2016 மற்றும் 2017 சீசன்களில் அந்த அணி விளையாடத் தடை விதிக்கப்பட்டது. தற்போது மீண்டும் எழுந்துள்ள இந்தக் குற்றச்சாட்டு கிரிக்கெட் வட்டாரத்தில் பரபரப்பை ஏற்படுத்தியுள்ளது.
