சிறப்பு தீவிர திருத்த முறைமை (SIR) மற்றும் வாக்காளர் பட்டியலில் மேற்கொள்ளப்பட்ட மாற்றங்கள் தொடர்பாக இந்திய தேர்தல் ஆணையத்திற்குள் கருத்து வேறுபாடுகள் நிலவுவதாக வெளியான செய்தியைத் தொடர்ந்து, காங்கிரஸ் தலைவர் ராகுல் காந்தி மற்றும் எதிர்க்கட்சித் தலைவர்கள் தேர்தல் ஆணையம் மீது கடுமையான குற்றச்சாட்டுகளை முன்வைத்து வருகின்றனர்.
இந்திய தேர்தல் ஆணையம், பாஜக மற்றும் ஆர்.எஸ்.எஸ் அமைப்புகள் இணைந்து “வாக்குத் திருட்டில்” ஈடுபட்டுள்ளதாகச் சாடியுள்ள ராகுல் காந்தி, இது இந்திய மக்களுக்கெதிரான குற்றம் என்றும், நாட்டின் அரசியல் சாசனத்தின் மீதான நேரடித் தாக்குதல் என்றும் குற்றம் சாட்டியுள்ளார். மேலும், இத்தகைய தேசத்துரோகச் செயலில் ஈடுபட்டவர்களுக்கு எதிராக நிச்சயம் நீதி கிடைக்கும் என்றும் அவர் தனது சமூக வலைதளப் பதிவில் எச்சரித்துள்ளார்.
முன்னதாக, ‘தி இந்தியன் எக்ஸ்பிரஸ்’ நாளிதழ் வெளியிட்ட புலனாய்வு செய்தியில், தேர்தல் ஆணையர்களான சுக்பீர் சிங் சந்து மற்றும் விவேக் ஜோஷி ஆகியோர் தங்களுக்குத் தெரியாமல் பிறப்பிக்கப்பட்ட உத்தரவுகள் மற்றும் SIR நடைமுறைகள் குறித்து கடந்த 10 மாதங்களில் குறைந்தது 14 முறை எழுத்துப்பூர்வமாக ஆட்சேபனைகளைப் பதிவு செய்துள்ளதாகத் தெரிவிக்கப்பட்டது. வாக்காளர் சேர்க்கை, நீக்கம், படிவம் 6-ல் செய்யப்பட்ட மாற்றங்கள் மற்றும் வாக்காளர் தரவுத்தள அணுகல் போன்ற முக்கிய முடிவுகள் தங்களுக்குத் தெரியாமல் எடுக்கப்பட்டதாக அவர்கள் சுட்டிக்காட்டியிருந்தனர்.
இந்த விவகாரத்தைக் கையில் எடுத்துள்ள எதிர்க்கட்சிகள், தலைமைத் தேர்தல் ஆணையர் ஞானேஷ் குமாரைப் பதவி நீக்கம் செய்ய வேண்டும் என்றும், அவர் ஒரு நபர் சர்வாதிகாரமாகச் செயல்படுவதாகவும் குற்றம் சாட்டியுள்ளன. காங்கிரஸ் மூத்த தலைவர் ப.சிதம்பரம் நாடு முழுவதும் SIR நடைமுறையை உடனடியாக நிறுத்தி வைத்து பாராளுமன்றக் குழு மூலம் விசாரணை நடத்த வேண்டும் எனக் கோரியுள்ளார். மேலும், சமாஜ்வாதி கட்சித் தலைவர் அகிலேஷ் யாதவ், திரிணமூல் காங்கிரஸ் எம்பி சாகரிகா கோஷ் மற்றும் திமுக செய்தித் தொடர்பாளர் டி.கே.எஸ். இளங்கோவன் உள்ளிட்ட தலைவர்களும் தேர்தல் ஆணையத்தின் இச்செயல் ஜனநாயகத்திற்குப் பேரபாயம் எனக் கடுமையான கண்டனங்களைப் பதிவு செய்துள்ளனர்.
