ஸ்மார்ட்போன் இல்லாமலேயே பல அன்றாட டிஜிட்டல் பணிகளை மேற்கொள்ளும் வகையில் புதிய தலைமுறை கையடக்க ஏஐ சாதனத்தை மெட்டா அறிமுகப்படுத்தியுள்ளது. உள்ளங்கையில் அடங்கும் அளவிலான இந்த சாதனம், எதிர்காலத்தில் மக்கள் தொழில்நுட்பத்துடன் தொடர்பு கொள்ளும் முறையில் மாற்றத்தை ஏற்படுத்தும் வகையில் வடிவமைக்கப்பட்டுள்ளது.
மார்க் ஜுக்கர்பெர்க் அறிமுகப்படுத்தியுள்ள இந்த சாதனத்துக்கு ‘மியூஸ் சார்ம்’ என பெயரிடப்பட்டுள்ளது. வழக்கமான ஸ்மார்ட்போனைப் போல பெரிய திரையுடன் இல்லாமல், சிறிய கீ செயின் அல்லது சாவிக் கொத்து போன்ற வடிவில் எளிதாக எடுத்துச் செல்லும் வகையில் இது உருவாக்கப்பட்டுள்ளது.
சாதனத்தில் பொருத்தப்பட்டுள்ள செயற்கை நுண்ணறிவு வசதி மூலம் குரல் வழியாக பல்வேறு பணிகளை மேற்கொள்ள முடியும். பயனர்கள் ஏஐ உடன் உரையாடுவதுடன், வீடியோக்களை பார்ப்பது, பயண முன்பதிவு செய்வது, மின்னஞ்சல்களை நிர்வகிப்பது போன்ற பணிகளையும் மேற்கொள்ளும் வகையில் இதன் செயல்பாடுகள் அமைக்கப்பட்டுள்ளன.
இதன் தோற்றத்திலும் தொழில்நுட்ப அம்சங்கள் கவனம் பெற்றுள்ளன. சிறிய ஓஎல்இடி திரை இடம்பெற்றுள்ளதுடன், பயனரை நோக்கி அசைவது மற்றும் கையசைப்பது போன்ற தனித்துவமான அம்சங்களும் சாதனத்தில் இடம்பெற்றுள்ளன.
மேலும், அதிவேக இணைப்புக்காக 5ஜி வசதி, புகைப்படம் மற்றும் வீடியோ தொடர்பான பயன்பாடுகளுக்கான கேமரா, பாதுகாப்பை அதிகரிக்கும் கைரேகை சென்சார் உள்ளிட்ட வசதிகளும் இதில் இடம்பெற்றுள்ளன.
கிறிஸ்துமஸ் மற்றும் புத்தாண்டு விற்பனை காலத்தை முன்னிட்டு டிசம்பர் மாதத்தில் இந்த சாதனம் சந்தைக்கு வரலாம் என்ற எதிர்பார்ப்பு நிலவுகிறது. ஸ்மார்ட்போனை மையமாகக் கொண்ட தற்போதைய டிஜிட்டல் பயன்பாட்டுக்கு மாற்றாக, செயற்கை நுண்ணறிவை மையப்படுத்திய புதிய சாதனங்களுக்கான சந்தையை இது உருவாக்குமா என்பதே தொழில்நுட்பத் துறையின் அடுத்த எதிர்பார்ப்பாக உள்ளது.
Also Read: 12 நாட்களில் 5 சம்பவங்கள்.. சிறுமிகளுக்கு எதிரான குற்றங்களால் அதிர்ச்சி!
