இன்று திங்கட்கிழமை வர்த்தக தொடக்கத்தில் இந்திய பங்கு சந்தை மிக கடுமையான விற்பனை அழுத்தத்தைச் சந்தித்தது. சந்தை தொடங்கிய ஒரே மணி நேரத்திற்குள் சென்செக்ஸ் 900 புள்ளிகளுக்கும் அதிகமாக வீழ்ச்சியடைந்தது; நிஃப்டி 50 23,000 புள்ளிகளுக்குக் கீழே சரிந்தது.
வர்த்தக தொடக்கத்தில் பிஎஸ்இ சென்செக்ஸ் நிறுவனங்களின் மொத்த சந்தை மதிப்பு சுமார் ரூ.4,82,16,004 கோடியாக இருந்தது. ஆனால், காலை 10:15 மணியளவில் அது ரூ.4,77,19,611 கோடியாக சரிந்து, முதலீட்டாளர்களுக்குச் சுமார் ரூ.4.9 லட்சம் கோடி இழப்பை ஏற்படுத்தியது. பங்கு சந்தையின் இந்தத் திடீர் வீழ்ச்சிக்கு ஒரே ஒரு காரணம் மட்டும் அல்லாமல், ஐந்து முக்கிய காரணங்கள் பின்னணியாக அமைந்துள்ளன.
கச்சா எண்ணெய் விலை மீண்டும் உயர்வு: அமெரிக்கா மற்றும் ஈரான் இடையே நிலவும் பதற்றமான சூழலால், ப்ரெண்ட் கச்சா எண்ணெய் விலை பேரலுக்கு $100 டாலருக்கு மேல் நீடிக்கிறது. இந்தியா தனது கச்சா எண்ணெய் தேவையில் பெரும்பகுதியை இறக்குமதி செய்வதால், எண்ணெய் விலை உயர்வு இறக்குமதிச் செலவையும் பணவீக்கத்தையும் அதிகரித்து, இந்திய ரூபாயின் மதிப்பிலும் அழுத்தத்தை ஏற்படுத்துகிறது.
அமெரிக்க பாண்ட் பாண்ட் ஈல்ட் (Bond Yields) உயர்வு: அமெரிக்காவின் 10 ஆண்டுகால டிரெஷரி பாண்ட் ஈல்ட் பல ஆண்டுகளில் இல்லாத அளவிற்கு உயர்ந்துள்ளது. இது டாலர் சார்ந்த நிலையான வருமான முதலீடுகளை ஈர்ப்பதால், இந்தியா போன்ற வளர்ந்து வரும் சந்தைகளில் உள்ள அபாயகரமான பங்கு முதலீடுகளிலிருந்து முதலீட்டாளர்கள் பணத்தை வெளியேற்றத் தொடங்கியுள்ளனர்.
வெளிநாட்டு முதலீட்டாளர்களின் (FII) தொடர் விற்பனை: உலகளாவிய பதற்றம் மற்றும் பாண்ட் ஈல்ட் உயர்வு காரணமாக வெளிநாட்டு முதலீட்டாளர்கள் இந்திய பங்குச் சந்தையிலிருந்து தொடர்ந்து தங்களது முதலீடுகளைத் திரும்பப் பெற்று வருகின்றனர். முக்கியமாகப் பெரிய நிறுவனங்களின் (Large-cap) பங்குகளை அவர்கள் விற்பனை செய்வது, சென்செக்ஸ் மற்றும் நிஃப்டியை உடனடியாகக் கீழ்நோக்கித் தள்ளுகிறது.
வங்கி மற்றும் நிதித் துறை பங்குகளின் வீழ்ச்சி: திங்கள்கிழமை வர்த்தகத்தில் வங்கி மற்றும் நிதித்துறை சார்ந்த பங்குகள் மிகக் கடுமையான சரிவைச் சந்தித்தன. பங்குச் சந்தை குறியீட்டில் (Indices) வங்கிப் பங்குகளுக்கு அதிக பங்களிப்பு (Weightage) இருப்பதால், இவை சரிவடையும் போது முழுச் சந்தையின் வீழ்ச்சியும் அதிகமாகப் பிரதிபலிக்கிறது.
உலகளாவிய நிச்சயமற்ற சூழல்: அமெரிக்க-ஈரான் மோதல் மற்றும் உலகளாவிய பொருளாதார நிச்சயமற்ற தன்மையால், சர்வதேச முதலீட்டாளர்கள் அபாயம் நிறைந்த முதலீடுகளைத் (Risk Assets) தவிர்க்கத் தொடங்கியுள்ளனர். ஏற்கனவே கடந்த வாரம் சென்செக்ஸ் மற்றும் நிஃப்டி தொடர்ந்து 7-வது வாரமாகச் சரிவைச் சந்தித்திருந்த நிலையில், உலகளாவிய இந்தச் சாதகமற்ற சூழல் விற்பனை அழுத்தத்தை மேலும் தீவிரமாக்கியுள்ளது.
