ஆசிய விளையாட்டுப் போட்டியின் ஆண்கள் ஹாக்கி அரையிறுதியில், பாகிஸ்தானை 4-3 என்ற கோல் கணக்கில் வீழ்த்தி இந்திய அணி அதிரடியாக இறுதிப்போட்டிக்கு முன்னேறியுள்ளது.
ஹர்மன்பிரீத் சிங் தலைமையிலான இந்திய அணி ஆட்டத்தின் இரண்டாம் கால்பகுதியில் 3-0 என வலுவான முன்னிலையில் இருந்தது. கேப்டன் ஹர்மன்பிரீத் சிங் 2 கோல்களையும், சுக்ஜீத் சிங் 1 கோலையும் அடித்தனர். இருப்பினும், இரண்டாம் கால்பகுதியின் இறுதியில் பாகிஸ்தான் தனது முதல் கோலை அடித்து ஆட்டத்திற்குள் திரும்பியது.
மூன்றாம் கால்பகுதியின் போது இந்திய வீரர் தில்பிரீத் சிங்கிற்குப் பச்சை அட்டை காண்பிக்கப்பட்டு வெளியேற்றப்பட்டதால், இந்தியா ஒரு வீரர் குறைவாக விளையாடியது. இந்த வாய்ப்பைப் பயன்படுத்திய பாகிஸ்தான் மீண்டும் ஒரு கோல் அடித்தது. தொடர்ந்து ஆட்டத்தின் 49-வது நிமிடத்தில் பாகிஸ்தானின் வஹீத் ரானா மேலும் ஒரு கோல் அடிக்க, ஆட்டம் 3-3 என சமநிலையை அடைந்தது. இதனால் ஆட்டத்தில் கடும் பரபரப்பு தொற்றிக்கொண்டது.
ஆட்டம் சமனில் முடிந்து ‘பெனால்டி’ நிலைக்குச் செல்லும் என்று எதிர்பார்க்கப்பட்ட நிலையில், போட்டி முடிவடைய கடைசி 49 வினாடிகள் மட்டுமே இருந்தபோது, இந்திய வீரர் அபிஷேக் அசாத்தியமாக ஒரு ‘மேஜிக்’ கோலை அடித்தார். இதன் மூலம் 4-3 என்ற கணக்கில் பாகிஸ்தானை வீழ்த்தி இந்தியா அபார வெற்றி பெற்றது.
கடந்த 28 ஆண்டுகளில் முதல்முறையாக ஆசிய விளையாட்டுப் போட்டியின் ஆண்கள் மற்றும் பெண்கள் ஹாக்கி அணிகள் இரண்டுமே ஒரே நேரத்தில் இறுதிப்போட்டிக்கு முன்னேறி வரலாற்றுச் சாதனை படைத்துள்ளன. பெண்கள் அணி இறுதிப்போட்டியில் தென் கொரியாவை எதிர்கொள்கிறது. ஆண்கள் அணி மலேசியா – தென் கொரியா இடையேயான இரண்டாவது அரையிறுதியில் வெற்றி பெறும் அணியுடன் மோதவுள்ளது.
இத்தொடரில் இதுவரை தோல்வியே சந்திக்காமல் வெற்றி நடைபோட்டு வரும் இந்திய அணி, இறுதிப்போட்டியில் வெற்றி பெற்று தங்கம் வெல்லும் பட்சத்தில், லாஸ் ஏஞ்சலஸ் ஒலிம்பிக் போட்டிக்கு நேரடியாகத் தகுதி பெறும் வாய்ப்பைப் பெறும் என்பது குறிப்பிடத்தக்கது.
