மன்னார் வளைகுடா மற்றும் அதனை ஒட்டிய தென் தமிழகக் கடலோரப் பகுதிகளின் மேல் நிலவும் வளிமண்டல மேலடுக்கு சுழற்சி காரணமாக, தமிழகத்தில் இன்று முதல் வரும் அக்டோபர் 9-ஆம் தேதி வரை பரவலாக மழை பெய்ய வாய்ப்புள்ளதாக சென்னை மண்டல வானிலை ஆய்வு மையம் கூறியுள்ளது. அரபிக்கடல் வரை நீளும் காற்றழுத்தத் தாழ்வுப் பாதை காரணமாக மேற்குத் தொடர்ச்சி மலையை ஒட்டிய மாவட்டங்கள் உள்ளிட்ட 5 மாவட்டங்களில் அதீத கனமழை வெளுத்து வாங்கும் என எச்சரித்துள்ளது.
இது தொடர்பாக வானிலை ஆய்வு மையம் வெளியிட்டுள்ள அறிக்கையில், மன்னார் வளைகுடா முதல் மத்திய கிழக்கு அரபிக்கடல் வரை வடதமிழகம் மற்றும் கேரளப் பகுதிகள் வழியாகக் காற்றழுத்தத் தாழ்வுப் பாதை இன்று(அக். 5) மற்றும் நாளை (அக். 6) கோவை மலைப்பகுதிகள், நீலகிரி, தேனி, கிருஷ்ணகிரி மற்றும் தர்மபுரி ஆகிய மாவட்டங்களில் மணிக்கு 40 முதல் 50 கி.மீ. வேகத்தில் பலத்த காற்று, இடி மின்னலுடன் கூடிய கனமழைக்கு வாய்ப்புள்ளது.
அதேபோல், இன்று டெல்டா மாவட்டங்கள், தென் மாவட்டங்கள் மற்றும் கொங்கு மண்டலம் உள்ளிட்ட பெரும்பாலான மாவட்டங்களிலும், புதுச்சேரி, காரைக்கால் பகுதிகளிலும் இடி, மின்னலுடன் கூடிய மிதமான மழை பதிவாகக்கூடும். தலைநகர் சென்னையைப் பொறுத்தவரை வானம் பொதுவாக மேகமூட்டத்துடன் காணப்படும் எனவும், நகரின் ஒரு சில இடங்களில் மாலை அல்லது இரவு நேரங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும் எனவும் வானிலை மையம் கணித்துள்ளது.
