வீட்டின் தரை மற்றும் சுவர்களில் பதிக்கப்பட்டுள்ள டைல்ஸ்கள் நாளடைவில் படியும் எண்ணெய் பிசுக்கு, சோப்பு அழுக்கு மற்றும் பிடிவாதமான உப்புக்கறைகளால் தங்களின் இயற்கை பளபளப்பை இழந்து மங்கலாகத் தொடங்கும். குறிப்பாக, குளியலறை மற்றும் சமையலறை டைல்ஸ்களை எவ்வளவுதான் வழக்கமாக சுத்தம் செய்தாலும் அவை பழைய தோற்றத்துடனேயே காட்சியளிக்கும். இதற்காக கடைகளில் விற்கப்படும் அதிக விலை கொண்ட ரசாயன திரவங்களை வாங்கிக் குவிக்க தேவையில்லை; வீட்டில் உள்ள எளிய பொருட்களைக் கொண்டே டைல்ஸ்களை எளிதாகப் புத்தம் புதியது போலப் பளிச்சிட வைக்க முடியும்.
டைல்ஸ்களில் படிந்துள்ள சாதாரண அழுக்குகளை நீக்க பேக்கிங் சோடாவும் வெள்ளை வினிகரும் சிறந்த தீர்வாகும். டைல்ஸ் மீது சிறிதளவு பேக்கிங் சோடாவைத் தூவி, வினிகரை ஸ்ப்ரே செய்து 10 முதல் 15 நிமிடங்கள் ஊறவைத்து மென்மையான ஸ்க்ரப்பரால் தேய்த்துக் கழுவினால் அழுக்குகள் பறந்துவிடும். அதேசமயம், குளியலறை மற்றும் சமையலறைப் பகுதிகளில் நீண்ட நாட்களாக உறைந்துபோன பிடிவாதமான உப்புக்கறைகளுக்குக் கல் உப்பு, எலுமிச்சை சாறு, துணி சோப்புத்தூள், பேக்கிங் சோடா மற்றும் வினிகர் கலந்த கெட்டியான பேஸ்ட்டைப் பூசி ஊறவைத்து தேய்த்து கழுவலாம். மேலும், டைல்ஸ் இடுக்குகளில் படியும் கருப்பு அழுக்குகளுக்கு பேக்கிங் சோடா பேஸ்ட்டை டூத் பிரஷ் மூலம் தேய்த்து சுத்தப்படுத்தலாம்.
டைல்ஸ்களை சுத்தம் செய்த பிறகு ஈரப்பதம் தேங்காமல் மைக்ரோஃபைபர் துணியால் துடைத்து உலர வைப்பது மீண்டும் நீர்க்கறை படியாமல் தடுக்கும். அதேநேரத்தில், பளபளப்புக்காகத் தரையில் தேங்காய் எண்ணெய் போன்ற எண்ணெய்களைத் தடவுவது ஆபத்தான வழுக்கலை ஏற்படுத்தும் என்பதால் அதைத் தவிர்க்க வேண்டும். மேலும், ப்ளீச் மற்றும் அம்மோனியா போன்ற வீரியமிக்க ரசாயனங்களை ஒன்றாகக் கலப்பது நச்சு வாயுவை உருவாக்கும் என்பதால் அத்தகைய தவறுகளைத் தவிர்ப்பது நல்லது. அன்றாடம் தண்ணீரை உடனுக்குடன் அகற்றுவதும், வாரமொருமுறை எளிய வீட்டுப் பொருட்களைக் கொண்டு ஆழமாகப் பராமரிப்பதும் டைல்ஸ்களை எப்போதும் புத்தம் புதிய பொலிவுடன் வைத்திருக்க உதவும்.
Read More : வடகிழக்கு பருவமழை எதிரொலி..!! சென்னையில் உச்ச அலெர்ட்..!! அதிகாரிகளுக்கு பறந்த அதிரடி உத்தரவு..!!
